Президент Бибылты Анатоли фембæлд, нæ горæты хисæрмагонд такситыл чи кусы, уыцы адæмимæ. «Таксисттæ – хисæрмагонд амалиуæгадон куыст чи кæны, уыдон хъуамæ фидой фиддонтæ. Мах сбæлвырд кодтам фиддоны бæрц æмæ у 450 сомы мæй. Мах не ‘ппæт фиддонтæ куы нæ фидæм, уæд афтæмæй нæ бон куыд бауыдзæн пенситæ æмæ сывæллæттæн æххуысы æхцатæ фидын?» – банысан кодта Бибылты Анатоли.

Бирæ быцæуты фæстæ, иуæй-иу амалиуæггæнджытæ бахастой фæндон, цæмæй сын уа алы бон дæр хъалон хицæнæй фидыны фадат. Уымæн æмæ æрвылбон нæ кусынц, æмæ сын 450 сомы лæууы зынаргъ.

Уымæй дарддæр разы нæ уыдысты, паддзахадон регистраци кæнгæйæ æртæ азæн цы 880 сомы фидынц, уымæй, афтæ ма документтæ аразгæйæ цы къуылымпытыл æмбæлынц, уымæй дæр. Хъалонтæ æмæ фиддонты комитеты сæрдар Къацты Владимир куыд радзырдта, афтæмæй хъалонфидджыты номхыгъды фыст сты 160 таксисты æмæ дзы хъалонтæ та фидынц æрмæстдæр 20.

«Иннæтæ загътой, зæгъгæ сæ куыст рæстæгмæ æрурæдтой. Æцæгæй та уымæн рæстдзинадимæ иумиагæй ницы ис»,-  банысан кодта Къадзты фырт.

Паддзахады сæргълæууæг дыууæ фарсмæ дæр байхъусгæйæ, банысан кодта, зæгъгæ, кæд таксистты зæрдæмæ нæ цæуынц, хицауад сын цы хатыртæ кæны, уыдон, уæд бакусын хъæуы нымайæнтæ сæвæрыны фарстыл æмæ уыдонмæ гæсгæ фиддонтæ фидыныл. Фæлæ Президент куыд загъта, уымæ гæсгæ сын нымайæнтæм гæсгæ фидын  слæудзæн зынаргъдæр. Президенты хъуыдымæ гæсгæ хуыздæр уаид, ныронг цы куысты уавæртæ уыд, уыдоныл сразы уæвын.

Уазæгты Марфа 

Comments are closed, but trackbacks and pingbacks are open.