Æрæджы Знауыры астæуккаг скъолайы педколлек-тив сæ директор Хуыгаты Валяйы сæргълæудæй ацы районы администрацийы ахуыры хайадимæ сорганизаци кодтой фембæлд Хуссар Ирыстоны зонад-иртасæн институты хистæр зонадон кусæг, Бигъуылаты Иринæимæ. Ацы адæймагимæ фембæлд æрвылхаттау уыдис хъарм, цымыдисон æмæ дзы хайад чи райста, уыдон æй сæ зæрдыл бадардзысты дæргъвæтин рæстæджы. Мадзалы организатортæ æмæ хайадисджыты æрдыгæй бирæ арфæйаг ныхæстæ загъдæуыд Иринæйæн æрмæст сылгоймæгты бæрæгбоны цытæн нæ, фæлæ ма йæ райгуырæн боны сæраппонд дæр. Нæ чиныгкæсджытæ æмæ зонадон интеллигенци хорз зонгæ сты Иринæйы куыстытимæ, стæй йæ зонынц дзырдарæхст æмæ æргомзæрдæ адæймагæй. Иринæ чингуытæ ныффыста Хетæгкаты Къостайыл, Гаглойты Рутеныл, Джиоты Порайыл. Чиныг «Сердца наполненные светом» та фыст у нæ рухстауджытыл. Уыдонæй уæлдай Иринæ ныртæккæ цæттæ кæны дыууæ куысты. Ныхасы рацæуджытæ куыд банысан кодтой, афтæмæй уый ирон адæмы зынгæ гоймæты тыххæй цы чингуытæ ныффыста, уыдон сты арф æмæ бындурон.
Бигъуылаты Иринæ райгуырд 1936-æм азы, уæды Сталиниры. Æнтыстджынæй каст фæцис сылгоймæгты скъола, фæстæдæр та ахуырмæ бацыд Мæскуыйы историон-архивон институтмæ æмæ йæ каст фæцис æнтыстджынæй. Фембæлдмæ æрбацæуджытæн Иринæ лæмбынæг æрдзырдта, зонады фæндагыл цæугæйæ цы цæлхдуртыл сæмбæлд, æппæт уыдæтты тыххæй. Уæлдæр ахуыргæнæндон каст куы фæцис, уæд куыста архивы, фæлæ уый хорз æмбæрста, йæ бон бирæ фылдæр кæй у саразын æмæ тырныдта, цæмæй йæ кусынмæ райстаиккой Зонад-иртасæн институтмæ æмæ æппынфæстагмæ уыцы хъуыддаг дæр йæ къухты бафтыд.
Æрæмбырдуæвджытæ Бигъуылаты чызгæн загътой арфæйы æмæ бузныджы ныхæстæ куыд бæрæгбоны, афтæ йæ райгуырæн боны цытæн дæр. Йæ номыл сывæллæттæ бацæттæ кодтой бæрæгбонон концерт дæр, цыран хайад райстой Знауыры астæуккаг скъолайы ахуырдзаутæ æмæ поселочы сабидоны сывæллæттæ. Ахуырдзаутæ Иринæйæн бакастысты сæхи фыст æмдзæвгæтæ дæр.
Сылгоймæгты дунеон боны æмæ йæ райгуырæн боны цытæн Бигъуылаты Иринæйæн Знауыры астæуккаг скъолайы æмæ районы ахуырады хайады номæй бакодтой зæрдылдарæн лæвæрттæ.
БÆРÆГБОНЫ ЦЫТÆН
Сылгоймæгты бæрæгбоны цытæн цымыдисон мадзал уагъд æрцыд Знауыры районы Культурæйы хæдзары. «Сылгоймаг у цард рæсугъдгæнæг æмæ хæдзары фарн» – ахæм хъарм ныхæстæй райдыдта бæрæгбонон концерт. Концерт бацæттæ кода районы администрацийы культурæйы хайад. Сылгоймæгты бæрæгбон барæсугъд кодтой зарæггæнджытæ, классикон шансоны æххæстгæнæг, æхсæнадæмон æмæ УФ-йы конкурсты лауреат Тасойты Игорь æмæ Икъаты Ибрагим дæр.
Районы администрацийы номæй сылгоймæгтæн арфæйы ныхæстæ загъта Знауыры районы администрацийы сæргълæууæджы хæдивæг Дзанайты Гиви: «Арфæ уын кæнын бæрæгбоны цытæн, нæ зынаргъ сылгоймæгтæ, нанатæ, хотæ æмæ чызджытæ. Мæ зæрдæ уын зæгъы амонд, фарн æмæ æнæниздзинад, æнтыстджын ут уæ алы хъуыддаджы дæр. Мæ цæст уын уарзы царды иууыл хуыздæр хæрзиуджытæ», – загъта уый.
Кокайты Заринæ
Comments are closed, but trackbacks and pingbacks are open.