Æрдæг азы дæргъы мидхъуыддæгты министрады службæтæ æмæ управленитæ цы бакуыстой, уый фæдыл сарæзтой хыгъдон æмбырдтæ. Министры хæдивджытæй алчидæр йæ хъус дары кæцыдæр управленимæ æмæ службæмæ æмæ ацы æмбырдты уыдон дæр хайад райстой. Хыгъдон æмбырдтæм ма фæуазæг сты прокуратурæйы минæвæртæ дæр, кæцытæ лæмбынæг равзæрстой мидхъуыддæгты органты куыст.
Милицийы æхсæнадон фæтк хъахъхъæныны фадыджы æмбырдмæ фæуазæг сты ведомствæйы сæргълæууæг Наниты Игорь æмæ йæ хæдивæг Пухаты Мераб.
Фæндагон змæлды æдасдзинады управленийы сæргълæууæг Джиоты Алан æрдзырдта сæ бакæнгæ куысты фæдыл æмæ банысан кодта, æрдæг азы дæргъы фаронмæ абаргæйæ кæй фæфылдæр сты фæндагон-транспортон цаутæ, фæлæ фæндагон змæлды æдасдзинады фæткойтæ та шофыртæ къаддæр райдыдтой халын.
«Фаронмæ абаргæйæ ацы аз 13 аварийы фылдæр æрцыд, – æдæппæт сты 71. Адонæй 18 аварийы не ‘мбæстæгтæ райстой алыгъуызон цæфтæ, дыууæ адæймаджы та дзы, хъыгагæн, фæмардысты. Фæндагон-транспортон цауты аххосаг сæйраджыдæр баст у ма-шинæты бирæнымæцимæ. Бонæй-бонмæ машинæтæ кæнынц фылдæр æмæ горæты фæндæгтыл та уыйбæрц бынат нал ис, нарæг кæй сты, уый фæстиуæгæн. Фæндагон змæлды æдасдзинады инспектортæ æрвылбон дæр иннæ службæтимæ уадзынц рейдон мадзæлттæ, цæмæй фæткхалджыты бæрндзинадмæ кæной. 6 мæйы дæргъы 269 шофыры ивар æрцыдысты нозтджынæй машинæ скъæрыны тыххæй, 3 шофырыл та конд æрцыд уголовон хъуыддæгтæ нозтджынæй дыккаг хатт машинæ кæй скъæрдтой, уый тыххæй», – банысан кодта Джиоты Алан.
Милицийы иннæ службæты æмæ управлениты хистæртæ дæр бæстонæй радзырдтой сæ бакæнгæ куысты тыххæй æмæ иумийагæй сисгæйæ иууылдæр банысан кодтой, фыдракæндтæ кæй фæкъаддæр сты фаронмæ абаргæйæ. Наниты Игорь хыгъдтæ хынцгæйæ æрæмбырдуæвджытæн загъта бузныджы ныхæстæ æмæ сæм бахатыд, цæмæй ма милицийы куысты цы хъæндзинæдтæ ис, уыдон цыбыр рæстæгмæ аиуварс кæной.
«Ацы аз нын уыд уæззау аз, уымæн æмæ æгас дунейы фæзынд коронавирусы инфекци æмæ нæ республикæйы дæр баконд æрцыд карантинон режим. Эпидемиологон уавæр хынцгæйæ нæ республикæйы къухдариуæгад дæр райста бирæ мадзæлттæ. Коронавирусимæ баст карантинон мадзæлттæ æххæст кæныны хъуыддаджы милицийы кусджытæ райстой активон хайад, – зæгъæн ис æмæ иууыл фылдæр уæз æрцыдис махыл. Æз абоны бон райгонд дæн сымахæй, уымæн æмæ уæ служ-бæйон хæстæ сæххæст кодтат иттæг хорз æмæ не ‘мбæстæгты æдасдзинад бахъахъхъæнынмæ бахастат егъау хайбавæрд», – загъта ведомствойы сæргълæууæг.
Наниты Игорь ма хорзыл банымадта, криминагенон уавæр нæм кæй фæхуыздæр, уый дæр.
«Фыдракæндты нымæц æгас республикæйы кæй фæкъаддæр ис, уый нысан кæны, нæ куысты кæй исæм раст уынаффæтæ, нæ кусджыты профессионалон æмвæзад кæй бæрзонд кæны. Службæйон дисциплинæ бонæй-бонмæ хъуамæ кæна хуыздæр, уымæн æмæ уыимæ баст сты нæ ведомствойы æнтыстытæ дæр æмæ уæ курæг дæн, цæмæй уæ дæлбар кусджытыл сымахæрдыгæй цæуа æмбæлон контроль. Нæ дарддæры куысты та æппæт тыхтæ здахдзыстæм нæ республикæйы фæтк æрæвæрыны хъуыддагмæ æмæ архай-дзыстæм, цæмæй нæм уа сабырдзинад», – банысан кодта министр.
Милицийы районты управлениты хистæртæ сæ хыгъдты банысан кодтой, 6 мæйы дæргъы кæй хъахъхъæдтой æхсæнадон фæтк æмæ адæмы æдасдзинад. Цхинвалы районы фаронмæ абаргæйæ ацы аз фыдракæндтæ раргом кодтой фылдæр хæттыты – 94,7 %, фарон та уыд 88,8 %.
Знауыры районы ацы аз æрцыд 2 фыдракæнды æмæ сæ раргом кодтой. Фарон та дзы æрцыд 7 фыдракæнды æмæ дзы 6 раргом ис. Ленингоры районы ацы аз фыдракæнд не ‘рцыд. Горæт Цхинвалы дæр бæрæг фæкъаддæр сты фыдракæндтæ æмæ фæхуыздæр сæ раргом кæныны хъуыддаг дæр – 29 фыдракæндæй раргом ис 26, фарон та уыдысты 39 æмæ дзы раргом ис 31. Дзауы районы та æрцыд 4 фыдракæнды æмæ дзы раргом ис 3. Фарон та уыдысты 8 æмæ дзы раргом ис 6.
Джиоты Александр
Comments are closed, but trackbacks and pingbacks are open.