Национ бангы совет сфидар кодта Джиоты Жаннæйы Республикæ Хуссар Ирыстоны гом акционерон æхсæнад «Акционерон Æфснайæн бангы» директоры бынатмæ. Уæдмæ Джиоты чызг куыста РХИ-йы Национ бангы сæйраг аудиторæй.

2014 азæй фæстæмæ уыд гом акционерон æхсæнад «Акционерон Æфснайæн бангы» управленийы органты сконды. Джиоты чызджы ацы бынатмæ снысан кæныны фæндон ист æрцыд æмхъæлæсæй. Национ бангы совет ма сфидар кодта кредиттæ радтыны тыххæй ног процентон бæрцтæ.

Рабадты Зассеты Феликс куыд банысан кодта, афтæмæй кредиттæ радтыны тыххæй процентон бæрц фæкъаддæр кæныны фарстыл уый размæ уынаффæ кодтой РХИ-йы Президент Бибылты Анатолиимæ.

«Цæрджытæн, афтæ ма астæуккаг æмæ чысыл бизнесæн кредитон фæрæзтæ æнцондæр райсыны æмæ экономикæйы реалон секторы тыххæй фæндон хæссын, цæмæй æруынаффæ кæнæм РХИ-йы бангты максималон процентон бæрц сфидар кæныныл æмæ уа 15 проценты», – загъта Зассейы фырт.

Абоны бон максималон процентон ставкæ у 16,5 %.

Национ бангы советы уæнгтæ æмхъæлæсæй сразы сты ног процентон бæрцыл, кæцы йæ тыхы бацæудзæн 2019 азы 15 мартæй.

Comments are closed, but trackbacks and pingbacks are open.