3-æм скъолайы 2-æм къласы ахуыргæнинæгтæ сæ къласгæс Хъуылымбегты Медеяимæ экскурсийы уыдысты национ музейы. Æхсызгонæй сыл сæмбæлдысты музейы кусджытæ. Уыдон сæ базонгæ кодтой ирон адæмы истори æмæ культурæйыл дзурæг бирæ алыгъуызон экспонаттимæ. Базонгæ сты, рагон ирон хæдзары цавæр мигæнæнтæ æмæ кусæнгæрзтæ уыд, стæй сын цавæр нысаниуæг уыдис, уыдæттимæ.
Æвæдза, куыд куырыхон уыдысты нæ фыдæлтæ, куыд диссаджы стыр аргъ кодтой аивадæн: Сырдоны фæндырæн, Ацæмæзы уадындзæн, Сосланы кафтæн. Музыкæйы ахадындзинад стыр кæй уыд, ууыл дзурæг сты, музейы цы рагон музыкалон инструменттæ ис, уыдон.
Сабиты цæстæнгас сæхимæ здæхтой Тугъанты Махарбеджы зындгонд куыстытæ дæр.
Зындгонд куыст «Нарты куывд», фыццаджыдæр, æрбалæууы зæрдыл. Махарбеджы куыст цыма райгас кæны зæронд кадджыты хъайтарты.
Ирыстойнаг нывгæнджытæй бирæтæ равдыстой се сфæлдыстады Нарты эпос, фæлæ алчидæр йæхирдыгонау æмбары æмæ уыны алцыдæр. Æмæ уымæ гæсгæ, кæсджытæ дæр нывтæ уынынц авторы цæстæй.
Иу ныхасæй, музейы залты экспозицитыл зилгæйæ, сывæллæттæ райстой стыр æхцондзинад, кастысты сæм цымыдисæй æмæ арф тæлмæнтимæ здæхтысты фæстæмæ. Дызæрдыггаг нæу, ахæм экскурситæ кæй ахъаз кæнынц рæзгæ фæлтæры удварнон-хæрзæгъдауон рæзтæн, сæ дунеæмбарынад сын райтынг кæнынæн.
Дриаты Лейла
Comments are closed, but trackbacks and pingbacks are open.