Республикæ Хуссар Ирыстоны Президенты Барамындæй Хицауады Сæрдары хæдивæг – Экономикон рæзты министрæй нысан æрцыд Тадтаты Дзамболат. Дзыллон-информацион фæрæзты кусджыты фарстытæн дзуапп кæнгæйæ, министрады ног сæргълæууæг радзырдта сæ разылæууæг хæстæ æмæ  банысангонд плæнтты тыххæй.

«Фыццаджы уал мæн бузныджы ныхæстæ зæгъын фæнды Бибылты Анатолийæн йе ‘ууæнкдзинады тыххæй. Æмбæхсинаг нæу, мæнæн тынг æхсызгон у, республикæйы къухдариуæгад мыл кæй баууæндыд куысты ахæм ахсджиаг фадыг, фæлæ уыимæ иумæ  æз хорз æмбарын, Республикæ Хуссар Ирыстоны Экономикон рæзты министрады раз цы ахсджиаг æмæ бирæпланон хæстæ лæууы, уый. Бæлвырдæй зæгъын мæ бон у, министрады йæ хæстæ кæй æххæст кæны республикæйы Хицауады куысты иууыл ахсджиагдæр фадыджы.

Æз цæттæ дæн  мæ коллективимæ æппæт тыхтæ æмæ зонындзинæдтæ радтын нæ разылæууæг хæстæ скъуыддзаг кæнынæн. Æнæмæнгхъæуæг у, министрады активы цы позитивондзинад ис, уый бахъахъхъæнын æмæ рæзт адарддæр кæнын. Фыццаджы уал экономикон уавæр стабилизаци кæнын, республикæйы бюджет ифтонг кæнын, чысыл æмæ астæуккаг амалиуæгадæн æххуыс кæнын, æддагбазарадон ахастытæ рæзын кæнын национ приоритеты цæстæнгасæй æмæ бирæ æндæртæ», – загъта Тадтаты Дзамболат.

Уый ма банысан кодта, зæгъгæ, экономикон политикæ реализаци кæныны уавæртæ аивгъуыйгæ аз тынг фæивтой. Коронавирусон инфекци æмæ йæ бауромыны фæдыл мадзæлттæй фæкъаддæр ис экономикон активондзинад æмæ кæцыдæр экономикон бæрæггæнæнтæ, кæцытæм гæсгæ сæйраг акцент арæзт æрцæудзæн экономикæйы фæдфæдылон цыд сифтонг кæнын æмæ республикæйы экономикон хъомысад рауæрæх кæныны фарстытыл.

«Экономикон рæзты министрад цы сæйраг хæстæ æххæст кæны, уымæй уæлдай ма сæйраг хъусдард здæхт æрцæудзæн архайды ахæм здæхтытæм, куыд товартæ лхæныны фадыджы закъондæттынад фæхуыздæр кæнын, куыстытæ æмæ лæггæдтæ паддзахадон домæнтæм гæсгæ сифтонг кæнын, стратегион план кæныны иумæйаг комплексон здæхт аразын, план æмæ прогноз кæныны макроэкономикæйы системæ фæхуыздæр кæнын».

Тадтаты Дзамболаты ныхæстæм гæсгæ, приоритетон здæхтытæй сæ иу у инвестицион политикæйы рæзт, ис инвестортæн преференцитæ рауæрæх кæныны фадат 2021 азы кæцыдæр инвестпроекттæ реализаци кæнынæн.

«Афтæ ма скъуыддзаг кæндзыстæм экономикæйы реалон секторы рæзты фарстытæ, чысыл æмæ астæуккаг амалиуæгадæн æххуыс кæнын, чысыл æмæ астæуккаг бизнесы архайджыты нымæц фæфылдæр кæнын, афтæ ма чысыл æмæ астæуккаг амалиуæгадты субъектты архайдæй хъалонон æфтиæгты гуырахст», – банысан кодта Тадтаты Дзамболат.

Хицауады Сæрдары хæдивæг – Экономикон рæзты министр ма фехъусын кодта, зæгъгæ, 2021 азы реализаци æрцæудзæн Паддзахадон программæ «2021 азы Республикæ Хуссар Ирыстоны чысыл æмæ астæуккаг амалиуæгадæн баххуыс кæнын» æхцайы фæрæзты гуырахст 49 милуан сомæй фылдæр.

«Экономикон рæзты министрады сæйраг тыхтæ паддзахадон управленийы æххæстбарджын органтимæ здæхт æрцæудзысты экономикон уавæр стабилизаци кæнын æмæ республикæйы хæлцадон æдасдзинад сифтонг кæнынмæ», – загъта Тадтаты Дзамболат.

Comments are closed, but trackbacks and pingbacks are open.