Президенты пресс-секретарь Босыкты Наталья куыд фехъусын кодта, афтæмæй 16 июны Президент Гаглойты Аланы бахæсмæ гæсгæ Хицауады Сæрдар Джуссойты Константин æмæ Уæлвæткон уавæрты министрады сæргълæууæг Гассеты Ибрагим ацыдысты Дзауы районы горæт Къуайсамæ æмæ фембæлдысты бынæттон цæрджытимæ, уыцы бон горæты территорийыл 4,3 баллы магнитудæйы зæххæнкъуыст кæй уыд, уый тыххæй.

«Гаглойты Алан бахæс кодта Джуссойты Константин æмæ Гассеты Ибрагимæн, цæмæй фембæлой Къуайсайы цæрджытимæ, байхъусой сæм æмæ развæлгъау мадзæлттæ райсой, зæххæнкъуыст фæлхатт куы æрцæуа, уæд цæрджыты æдасдзинад сифтонг кæныны тыххæй», – загъта пресс-секретарь.

Банысан кæнын хъæуы уый, æмæ зæххæнкъуысты фæстиуæгæн ницы зиæнттæ æрцыд. Зæххæнкъуысты эпицентр уыд Гуырдзыстоны сейсмоактивон районы.

 

Уынгты сæвæрдзысты цатыртæ

Фæстаг дыууæ къуырийы дæргъы Къуайсайы цалдæр зæххæнкъуыст кæй уыд, уый тыххæй бирæуæладзыгон хæдзæртты раз сараздзысты цатыртæ, хæдзæрттæ æфхæрд баййæфтой æви нæ, уый сбæрæг кæнын æмæ тыхст цæрджытæ – уыдон сты абоны бон Къуайсайы царды реалитæ.

Горæты мэры хæстæ æххæстгæнæг Хуыгаты Ибрагим радзырдта, зæгъгæ, Къуайсайы уавæр æндыгъд кæй у, адæм сæ хæдзæрттæм бацæуын кæй тæрсынц, уый тыххæй къухдариуæгад аскъуыддзаг кодта цæрджытæн уынгты цатыртæ сæвæрын.

«Знон нæм зæххæнкъуыст цыппар хатты уыд, уый фæстæ дæр фæлхатт цыдысты. Адæм тынг тарст сты. Уыдон нæ уæндынц  сæ хæдзæрттæм бахизын,  уымæн æмæ нæм фæстаг рæстæджы арæх вæййы зæххæнкъуыстытæ. Амæйразмæ цæрджытæ æнæхъæн æхсæв уынджы уыдысты. Уый  тыххæй аскъуыддзаг кодтам бирæуæладзыгон хæдзæртты раз цатыртæ сæвæрын, цæмæй адæм гом арвы бын ма æхсæвиуат кæной, фæлæ – цатырты», – загъта Хуыгайы фырт.

Йæ ныхæстæм гæсгæ, премьер-министр Джус­сойты Константин æмæ  уæлвæткон уавæрты министр Гассеты Ибрагим цæрджытимæ фембæлдысты æмæ сын загътой, цæмæй рæстæгмæ рацæуой Цхинвалы уазæгдонмæ. Цæрджытæй иутæ сразы сты уыцы фæндоныл.

Мэры хæстæ æххæстгæнæг ма йæ ныхасмæ бафтыдта, зæгъгæ, æнхъæлмæ кæсынц сæрмагонд къамисы æрцыдмæ, цæмæй  сбæрæг кæна бирæуæладзыгон хæдзæртты уавæр æмæ уы­наф­фæ рахæсса,  хæдзæртты ма цæрæн ис, æви нæ, уый тыххæй.

 

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.