Мæскуыйы кæронмæ бахæццæ X-æм Æхсæнадæмон конкурс «Вершина успеха». Хайад дзы райстой Уæрæсейы æппæт регионтæй, 400  сывæллонæй фылдæр. Афтæ ма Хуссар Ирыстон, Луганскы Адæмон Республикæ æмæ Беларусийæ.

Гуырахстджын конкурсы сæ арæхстдзинад равдыстой Цхинвалы гимназ «Альбион»-ы фараст ахуыргæнинаджы РХИ-йы сгуыхт ахуыргæнæг Дзабиты Екатеринæйы разамындæй æмæ аст номинацийы бацахстой 1-аг æмæ 2-аг бынæттæ.

Мæскуымæ сæ курдиат равдисынмæ æрцыдысты æвзонг кафæг Гуыбиаты Мария æмæ вокалон къорд «Булæмæргъ». Къорды сконды ис аст хайадисæджы – Цхуырбаты Мария, Коцты Виктория, Хуыбиаты Аннæ, Тедеты Олеся, Цхуырбаты Андрей, Яралова Янæ, Чысиаты Александр æмæ Зассеты Максим.

Не ‘взонг зарæггæнджытæ бацахстой фыццаг æмæ дыккаг бынæттæ ахæм номинациты, куыд «Отечество мое», «Народный вокал», «Эстрадный вокал» æмæ «Золотой хит».

Жюрийы зæрдæмæ тынг фæцыд зарæг «Три белых коня». Сывæллæттæ ацы зарæджы тыххæй райстой фыццаг бынат. Жюри саргъ кодта сабиты сыгъдæг интонаци æмæ хъæлæсты рæсугъддзинадæн.

Вокалон ансамблы бындур ссис зынгæ трио «Булæмæргъ». Уый иу æмæ дыууæ конкурсы не ссардта хъусджыты зæрдæтæ. Ансамблы ног сконд баххæст æрцыд цыппар лæппу æмæ иу чызгæй.

Музыкалон къухдариуæггæнæджы ныхæстæм гæсгæ, конкурсмæ бацæттæ кодтой фондз вокалон номыры, иу  хореографион, дыууæ та  аив кæсынæй.

Солон номыртæ «Хореография», «Художественное чтение» æмæ «Эстрадный вокал»-ы номинациты равдыстой Гуыбиаты Мария, Цхуырбаты Мария æмæ Зассеты Максим.

Жюри стыр аргъ скодта Гуыбиаты Марияйы кафт «Танец маленькой горянки»-йæн. Уыдоны дисы бафтыдта æвзонг кафæджы змæлды рæсугъддзинад æмæ къахфындзыл лæууыны арæхстдзинад. Цхуырбаты Мария бацахста 2-аг бынат Киплингы æмдзæвгæ «Сумей»-йы аив бакæсыны тыххæй. Зассеты Максим зынгæ классик Некрасовы æмдзæвгæ «Железная дорога» бакæсгæйæ, бацахста 2-аг бынат.

Зассеты Максим ма азарыд зарæг «Пой со мной». Жюри стыр аргъ скодта Максимы зæлланггæнæг сыгъдæг хъæлæсæн.

«Куы йæ базыдтам, конкурсы хайад исдзыстæм, уæд ма нын цæттæ кæнынмæ баззад иу мæй. Уыцы иу мæйы дæргъы сывæллæттæ æхцонæй цыдысты репетицитæм, уымæн æмæ сæм уыд стыр разæнгарддзинад. Кæй зæгъын æй хъæуы, ахсджиаг уыд зынгæ æхсæнадæмон конкурсы республикæйы ном бахъахъхъæнын æмæ рамбулын.

Мæскуыйы уæвгæйæ, сы-вæллæттæн фадат фæци Кремлы назбæлас фенын, Сырх             фæзуаты атезгъо кæнын, хъарагъулы ивды рæсугъд церемони фенын, уазæгдоны цур цы зынгæ бынæттæ уыд, уыдони-мæ базонгæ уæвын. Сывæллæттæ тынг райгондæй баззадысты æмæ, сæ ныхæстæм гæсгæ, уыцы æхсызгон эмоцитæ сæ зæрдæйы баззайдзысты.

«Фæнды мæ бузныджы ныхæстæ зæгъын «Альбион»-ы директор Гуыцмæзты Иринæ Ильяйы чызгæн æмæ нæ иузæрдион æмбал, æххуысгæнæг, нæ мадзæлтты æнæаивгæ æххуысгæнæг Плиты Дзерассæ Лаверы чызгæн. Афтæ ма мæ фæнды бузныг зæгъын Ахуырад æмæ зонады министрадæн, ахæм фадат нын кæй радта. Ныфс мæ ис, дарддæр дæр кæй исдзыстæм хайад æндæр конкурсты æмæ та хорз æнтыстытимæ кæй здæхдзыстæм фæстæмæ», – загъта Дзабиты Екатеринæ.

Конкурсмæ балц организаци æрцыд Ахуырад æмæ зонады министрады хъæппæрисæй фæсивæды монон-хæрзнамысон хъомылады паддзахадон программæйы фæлгæтты.

Comments are closed, but trackbacks and pingbacks are open.