Дæргъвæтин азты фæстæ Дменисы хъæуы арæзт æрцыд донуадзæн хæтæл. Дон цæуы Уанат-Цхинвалы ног резервуартæй. Цхинвалы районы цæрæнуатон-коммуналон хæдзарады сæргълæууæг Уазæгты Мевлуд куыд радзырдта, афтæмæй Дменисы хъæумæ дон цæудзæн æдзухæй.
«Уæллаг Дменис æмæ Уалытысыхмæ дон цæуы октябры мæйæ фæстæмæ. Мах сæвæрдтам ног станц, 80 кубометры дон кæм цæуы, ахæм резервуартæ. Донцъирæн станцæй дон цæуы резервуартæм, уырдыгæй та дих цæуы хъæутыл. Уанат-Цхинвалы резервуарæй йæм рауагъдæуыд 400 метры дæргъæн доны хæтæл», – загъта Уазæгты Мевлуд.
Йæ ныхæстæм гæсгæ донцъирæн станц кусы таймерæй, кæцы баиу вæййы æмæ рахицæн вæййы автоматон æгъдауæй. Æртæ-цыппар сахатмæ станц райсы 80 тоннæйы дон. Уыцы дон у 5-6 сахаты фаг, уый фæстæ та станц таймеры руаджы ногæй баиу вæййы.
Цæрæнуатон-коммуналон хæдзарады сæргълæууæг куыд банысан кодта, афтæмæй нырма Габотысых æххæстæй ифтонг нæ цæуы донæй.
Уазæгты Мевлуд ныфс æвæры, уыцы хъæу дæр тагъд рæстæджы ифтонг кæй æрцæудзæн донæй. Уымæй дарддæр ма хæрзарæзт æрцæудзæн хъæумæ фæндаг дæр.
ИА «Рес»
Comments are closed, but trackbacks and pingbacks are open.