Хуссар Ирыстоны районты цытджын æгъдауæй банысан кодтой Стыр Уæлахизы бæрæгбон.
Стыр Фыдыбæстæйон хæсты фæуæлахизы 71 азы боны цытæн цымыдисон мадзал уагъд æрцыд Цхинвалы районы Дменисы хъæуы. Мадзал бацæттæ кодтой Дменисы Культурæйы хæдзары директор Икъаты Ануси æмæ библиотекæйы кусджытæ Джиголаты Заремæ æмæ Æлборты Мадинæ.
Мадзалмæ æрбацыдысты Цхинвалы районы администрацийы сæргълæууæг Плиты Алан, хъæуы цæрджытæ, скъолайы ахуыргæнинæгтæ æмæ ахуыргæнджытæ. Хуынд ма йæм æрцыдысты Фыдыбæстæ хъахъхъæнджытæ: Дыгъуызты Мераб, Бибылты Анатоли, Бестауты Радион æмæ æндæртæ.
Мадзалы хайадисджытæ дидинджытæ æмæ веноктæ сывæрдтой Стыр Фыдыбæстæйон хæсты фæмардуæвджыты цырты раз.
Районы сæргълæууæг Плиты Алан æрæмбырдуæвджытæн раарфæ кодта бæрæгбоны цытæн. Бæрæгбонон арфæтæ ма ракодтой скъолайы директор Дудайты Земæ, хъæууон администрацийы номæй Дзанайты Заретæ, Фыдыбæстæ хъахъхъæнджыты номæй та Дыгъуызты Мераб.
Дменисы Культурæйы хæдзары хæдархайгæ къордтæ равдыстой концерт. Кафджыты къорд (йæ къухдариуæггæнæг Козаты Радион) акафыд цалдæр ирон кафты — «Симд», «Хонгæ», «Чызджыты кафт» æмæ æндæртæ. Зарæггæнджыты къорд азарыд зарæг «Катюша». Хæстон темæйыл аив бакастысты æмдзæвгæтæ ахуыргæнинæгтæ Джиголаты Арсен, Ибрагим, Марат, Батиаты Автандил æмæ æндæртæ.
Бæрæгбонон мадзал уагъд æрцыд гом арвы бын. Мадзалмæ æрбацæуджытæ райгондæй баззадысты æмæ арфæйы ныхæстæ кодтой йæ организатортæн ахæм цымыдисон мадзалы тыххæй.
Дзебысаты Г.
Comments are closed, but trackbacks and pingbacks are open.