Нæ республикæйы 5-æм астæуккаг скъолайы уæвы  сывæллæтты организаци «Ногдзау», кæцыйы сконды ис  182 ахуыргæнинаджы.  Кæд Ногдзауты змæлд массон нæу, уæддæр нæ горæты цалдæр скъолайы архайынц ахæм организацитæ æмæ дарддæр кæнынц советон дуджы традицитæ. Уыдон кæнынц æмгуыст, ауадзынц иумиаг æмæ алыгъуызон мадзæлттæ, сæ ахуыр æмæ уагахастæй дæр сты цæвиттойнаг.

Банысангонд скъолайы дæр дарддæр кæнынц Советон Цæдисы ногдзауты хуыздæр традицитæ. Ацы бонты «Ногдзау»-ы уæнгтæн уыд цытджын линейкæ. Уый райдыдта Республикæ Хуссар Ирыстоны паддзахадон гимнæй. Ногдзаутæ се ‘ппæт дæр уыдысты сырх галстукты, кæцыты кæддæр сæрыстырæй хастой раздæры Советон Цæдисы ногдзаутæ. Къорды Советты минæвæрттæ радтой рапорт æмæ лæмбынæгæй радзырдтой, фыццаг семестры сын ахуыры, спорты æмæ культурæйы фадыджы цы æнтыстытæ ис, уыдоны фæдыл. Афтæ ма ранымадтой, мæгуырау чи ахуыр кæны, ахæмтæ сæ къорды цал ис, цал ахуыргæнинаджы рауагътой уроктæ, уыдæттæ. Уый фæстæ ныфс бавæрдтой, æрмæстдæр хорз æмæ иттæг хорз нысæнттыл кæй ахуыр кæндзысты. Ахуыргæнинæгтæй сæ иу банысан кодта, зæгъгæ, ахуыры азы фыццаг семестры сæ къласы ахуыргæнинæгты ахуырфæразондзинад бæрæг кæй фæхуыздæр ис.

Фæндзæм скъолайы ногдзаутæ фыццаг семестры активон хайад истой алыгъуызон олимпиадæты, спортивон ерысты, конкурсты æмæ фестивалты. Иууыл æнтыстджындæр-тæ хорзæхджын æрцыдысты Кады грамотæтæй. 5-æм астæуккаг скъолайы ахуыргæнæг Бестауты Азæ арфæ ракодта сывæллæттæн, бафæндыд æй уыдонæн æнтыстытæ сæ ахуыры. Ногдзаутæн ма зæрдæбын арфæтæ загъта скъолайы ног директор Туаты Мадинæ дæр.

В.И. Ленины номыл ногдзауты Æппæтцæдисон организаци арæзт æрцыд 1922 азы. Ног-дзаутæ сæрыстырæй сæ хъуыртыл хастой сырх галстуктæ. Уый зæрдыл лæууын кодта, революцион тырысайы хай кæй у, уый. Ногдзау уæвгæйæ, æнæмæнг  уыдис хорз ахуыр кæнын, цæсгомджын уæвын, æрмæстдæр уæд уыд гæнæн ногдзауты организацийы рæнхъытæм бацæуын.

Кокайты Зæринæ

Comments are closed, but trackbacks and pingbacks are open.