РААРФÆ СЫН КОДТА ПУТИН

УФ-йы Президент Владимир Путин раарфæ кодта футболæй Уæрæсейы æмбырдгонд командæйы тренер Черчесты Станислав æмæ командæйы уæнгтæн, Испаны æмбырдгондыл кæй фæуæлахиз сты, уый сæраппонд. Уæрæсейаг лидерæн фадат нæ фæцис стадионмæ æрбацæуынæн, фæлæ уый каст матчмæ æмæ иу боны мидæг дыууæ хатты фæдзырдта Черчесты Станиславмæ.

СКУЫНÆГ КОДТОЙ ÆНÆПИЛОТОНТЫ КЪОРДЫ

Уæрæсейаг æфсæддонтæ фехъусын кодтой Сирийы Хмеймимы авиабазæйæ æнæпилотонты къорды скуынæг кæныны тыххæй. «Уæрæсейаг авиабазæйы штатон зенитон фæрæзтæй æппæт уæлдæфон нысæнттæ куынæг æрцыдысты», – фехъусын кодта авиабазæйы минæвар. Специалистты ныхæстæм гæсгæ, авиабазæйы цур дронты скуынæг кæныны тыххæй уæрæсейаг æфсæддонтæ пайда кæнынц «Панцирь-С»-йы комплекстæй.

БАХЪАСТ КÆНДЗЫСТЫ ТÆРХОНДОНМÆ

Уæрæсе бахъаст кæндзæн  дунеон базарадон организацимæ, АИШ уæлæмхас фиддонтæ æндон æмæ алюминийыл кæй фæфылдæр кодта, уый тыххæй. Уæрæсемæ æрбаиу уыдзысты Евроцæдис, Китай, Инди, Канадæ, Мексикæ æмæ Норвеги. Эксперттæ куыд банысан кодтой, уымæ гæсгæ хъуыддаг æвзæрст цæудзæн дæргъвæтин рæстæджы, фæлæ Вашингтон састы бынаты баззайдзæн. Иу цæфæй АИШ фехæлдта дæсгай дунеон сразыдзинады.

СФИДАР КОДТА НАЦИОН ПЛАН

УФ-йы Президент Владимир Путин сфидар кодта коррупцийы ныхмæ национ план 2018-2020 азтæн. Национ планмæ хаст æрцыдысты Федерацийы Совет, Паддзахадон Думæ, Уæлдæр тæрхондон, Нымайæн палатæ, Централон банг æмæ Централон æвзарæн къамисмæ рекомендацитæ документы реализаци сифтонг кæныны фæдыл. План куыд æххæст цæудзæн, уымæ йæ хъус дардзæн сæрмагонд кусæгон къорд.

ФÆФЫЛДÆР СТЫ ФИДДОНТÆ

1-æм июлæй Уæрæсейы Федерацийæ нефты экспорты фиддонтæ фæфылдæр сты 7,3 доллары, ома раздæр кæд иу тоннæ уыд 131,8 доллары, уæд ныр та уыдзæн 139,1 доллары онг.

БАНЫХÆСТÆ ÆРГЪÆВД ÆРЦЫДЫСТЫ

Евроцæдисы Албани æмæ Македони уæнгад æргъæвд æрцыд фæстæдæр æмгъуыдмæ. «Бацæуыны фæдыл баныхæсты райдиан æргъæвд æрцыд Франц, Нидерландтæ æмæ Данийы фæндонмæ гæсгæ. Ацы æртæ бæстæйы Албани æмæ Македонийæ домынц уæлдай фæндви-дардæр къахдзæфтæ коррупци æмæ организацигонд фыдракæнддзинады ных-мæ тох кæнын. Евроцæдисмæ бацæуыны тыххæй кандидаты официалон статус Македони райста 2005 азы, Албани та – 2014 азы.

СÆВЗÆРСТОЙ НОГ ПРЕЗИДЕНТ

Мексикæйы сæвзæрстой ног президенты. Иууыл фылдæр хъæлæстæ – 53 проценты æрæмбырд кодта галиу тыхты коалицийы кандидат Андрес Мануэль Лопес Обрадор. Йæ оппонент Хосе Антонио Мид райста къаддæр хъæлæстæ. Уый ныридæгæн арфæ ракодта йæ ныхмæлæууæгæн. Мексикæйы президент йæ бынатмæ бахиз-дзæн 2018 азы декабры мæйы.

ÆНГУЗЫ БЛОКАДÆ

Инди Иугонд Штаттæн расидт æнгузы блокадæ. Рагон Делийы базар  фæстаг бонты фестад дунеон экономикон блокадæйы. Индийы хицауад Трампы таможнæйон хæстæн сдзуапп кодта йæхирдыгонау æмæ уый фæстиуæгæн æнгузæй бынæттон базаргæнджытæ дæр  240 милуан доллар фесафынæй бахаудтой ацы дзуаппон мадзалмæ. Куыд хицæн хæринаг æмæ алыгъуызон адджинæгтæн æнæмæнгхъæуæг ингредиент, афтæ Индийы популя-рон у æхсæры мыггаг (миндаль), кæцы индиаг базармæ ласт цæуы АИШ-æй. Æмæ æндон æмæ алюминийыл Иугонд Штаттæ фиддонтæ кæй фæфылдæр кодта, уымæ гæсгæ Дели расидт æнгузы блокадæ. Уавæр рараст кæныны тыххæй Индимæ æртахт ИНО-йы АИШ-ы æдзухон минæвар Никки Хейли, кæцы йæхæдæг дæр у этникон индиаг. Индийы премьер-министримæ фембæлды рæстæджы уый уырнын кодта, зæгъгæ, Вашингтон раздæрау у æууæнкджын æмцæдисон. Фæлæ Дели равдыста, Индийы Америкæйы æууæнкджын партнерыл кæй нæ нымайынц, уый.

БАКОДТА ДЗУАППОН ФИДДОНТÆ

Канадæ 1-æм июлæй бакодта АИШ-ы продукцийыл дзуаппон фиддонтæ. Фиддонты аргъ азы мидæг уыдзæн 16,6 миллиард канадæйаг доллары (америкæйаг 12,6 миллиард доллары). «Канадæйæн æндæр гæнæн нæ уыд æмæ сдзуапп кодтам доллар доллары ныхмæйы принципæй”, – фехъусын кодта Канадæйы фæсарæйнаг хъуыддæгты министр Христя Фриланд. Йæ ныхæстæм гæсгæ, ацы фиддонтæ архайдзысты уæдмæ, цалынмæ Трампы администраци  Канадæмæ ахасты æндон æмæ алюминийыл фиддонтæ  аива.

СРÆМЫГЪД

Афганистаны хуссар хайы горæт Джела-лабады  айхъуыст тыхджын срæмыгъд, кæцыйы фæстиуæгæн фæмард сты 19 адæймаджы. Ноджы 20 адæймаджы та цæфтæ фесты теракты фæстиуæгæн. Теракт арæзт æрцыд, бæстæйы президент ацы горæтмæ куы бацыд, уыцы рæстæджы.

ФÆФЫЛДÆР СТЫ АКЦИЗТÆ

Уæрæсейы 1-æм июлæй  10 проценты фæфылдæр сты тамакойы акцизтæ. Афтæмæй иу мин сигареты  схызт 2,335 мин сомы онг. Радон хатт та тамакойы  аргъ 10 проценты схиздзæн 2019 азы 1 январæй.

СÆНДИДЗЫН КОДТОЙ БАСТДЗИНАД

Хуссар Кореяйы æмæ Цæгат Кореяйы ‘хсæн сæндидзын кодтой  æфсæддон-денджызон тыхты æмæ æфсæддон науты бастдзинады хаххы куыст, кæцы урæд æрцыд 10 азы размæ, – хъусын кæнынц Хуссар Кореяйы хъахъхъæнынады министрады. Бастдзинады хахх сæндидзын кæныны тыххæй бадзырд къухты бафтыд, дыууæ паддзахады саммиты фæлгæтты ацы аз апрелы мæйы, куыд æфсæддон æндыгъддзинад фæныллæгдæр кæныны фæдыл мадзæлттæй сæ иу, афтæ.

Информацион агентадты хъусынгæнинæгтæм гæсгæ

Comments are closed, but trackbacks and pingbacks are open.