ДÆ ЦÆСТ АХÆСС ДУНЕЙЫЛ

Ацыд отставкæйы

Сомихстоны премьер-министр ацыд отставкæйы протестон акциты фæстиуæгæн, кæцытæ уагъд цыдысты æппæт бæстæйы,  Серж Саргсяны премьер-министрæй  куы сæвзæрстой, уый фæстæ. Сомихстоны вице-премьер Карен Карапетянæн йæ къухты бафтыд «Гражданский договор»-ы лидер Никол Пашиняны ссæрибар кæнын. Цалдæр сахаты фæстæ Саргсян фехъусын кодта: «Пашинян раст уыд, æз рæдыдтæн». Бæстæйы раздæры президент ма загъта, зæгъгæ, йæ бон уыд конфликт тыхон сценаримæ гæсгæ аскъуыддзаг кæнын æмæ афтæмæй ацы бынаты баззайын, фæлæ, зæгъ, афтæ саразын мæ бон нæу. Протестон акциты хайад райстой 70 мин адæймаджы бæрц. Хицауады отставкæ райста Сомихстоны президент Армен Саркисян. Бæстæйы премьер-министры хæстæ рæстæгмæ æххæстгæнæгæй урæд æрцыд вице-премьер Карен Карапетян. Фæлæ ныр та протестгæнджытæ домынц æмгъуыдæй раздæр парламентон æвзæрстытæ ауадзын.

Ныхас кодтой телефоны

УФ-йы Президент Владимир Путин æмæ Францы президент Эммануэль Макрон ныхас кодтой телефоны. Уынаффæйы сæйраг темæ уыд Сирийы уавæр. Уæрæсейы президент банысан кодта, зæгъгæ, ацы хæстон акци уыд дунеон барадон нормæ гуымир æгъдауæй фехалын, кæцы æркодта сирийаг кризис политикон æгъдауæй æрбæстон кæныны процесс фæвазыгджындæр кæнынмæ. Фæрстæ бадзырдтой ИНО-йы Æдасдзинады советы резолюцийы бындурыл æмæ Сочийы сирийаг национ диалогы Конгрессы хатдзæгтæ хынцгæйæ, сабырадон бадзырдтæ сæндидзын кæныны тыххæй иумиаг куыст адарддæр кæныныл.

Æруынаффæ кодтой дыууæфарсон ахастытыл

Францы президент Эммануэль Макрон æртæбонон хицауадон визиты уыд АИШ-ы. Трампимæ уынаффæ кодтой дыууæфарсон ахастытыл, афтæ ма æдасдзинад æмæ базарадон фарстытыл дæр. Макрон Трампимæ цæттæ у Ираны ног ядерон сразыдзинады тыххæй кусынмæ. Макрон банысан кодта, зæгъгæ, Париж æмæ Вашингтонæн нæ уыд иугъуызон позици Тегеранимæ ядерон бадзырды фæдыл, фæлæ ацы темæйыл Трампимæ лæмбынæг æрныхас кæнгæйæ æрцыдысты иугъуызон хъуыдымæ.

Фæнд кæнынц специалон къорд саразын

Стырбританийы фæсарæйнаг хъуыддæгты министр Борис Джонсон канадæйаг горæт Торонтойы журналисттимæ ныхас кæнгæйæ, цыран уагъд цыд «большая семерка»-йы фæсарæйнаг хъуыддæгты министрты саммит, фехъусын кодта сæрмагонд къорд саразыны тыххæй, кæцы ахуыр кæндзæн «Уæрæсейы уагахаст». «Мах тынг бирæ дзырдтам Уæрæсейы тыххæй æмæ аскъуыддзаг кодтам «большая семерка»-йы сæрмагонд къорд саразын, кæцы йæ хъус дардзæн Уæрæсейы уагахастмæ», – загъта Борис Джонсон. Уыимæ уый банысан кодта, зæгъгæ, специалон къорд сæрмагондæй, йæ хъус дардзæн кибертыгъдады Мæскуыйы архайдмæ, афтæ ма уæрæсейаг фарс «цы дезинформаци парахат кæны», уымæ дæр.

Фæмард 10 адæймаджы

Канадæйаг горæт Торонтойы микроавтобус стыр тагъдадæй баскъæрдта фистæгæй цæуджытыл, кæцыйы фæстиуæгæн фæмард сты 10 адæймаджы 16 адæймагæй фылдæр та хъыгдард баййæфтой. Шофыры æрцахс-той. Канадæйы хицауад æрцæугæ цау банымадта терактыл.

Спайда кодта ветойы барæй

Венгри æртыккаг хатт спайда кодта ветойы барæй Украинæ-НАТО-йы къамисы рабадт ауадзыны тыххæй, кæцы хъуамæ уагъд æрцыдаид 27-æм апрелы Брюсселы альянсы фæсарæйнаг хуыддæгты министрты фембæлды фæлгæтты. «Министрты æмвæзадыл НАТО-Украинæйы къамисы рабадт уагъд не ‘рцæудзæн венгриаг позицийы тыххæй, кæцы у æнæаивгæ».  Будапешты уынаффæ баст у ахуырады тыххæй Украинæйы райсгæ закъонимæ, кæцы фадат нæ дæтты национ къаддæр хæйттæ мадæлон æвзагыл ахуыр кæной, уымæн. Венгрийы хицауад домы Киевæй документмæ ивындзинæдтæ бахæссын. Ахуырады тыххæй закъоныл Порошенко йæ къух æрфыста ивгъуыд аз 25-æм сентябры. Киев национ къаддæр хæйттыл нымайы венгриæгты, румынæгты, полякты, молдованты, болга-йрæгты æмæ уырыссæгты.

Хорзыл ын банымадтой йæ кандидатурæ

АИШ-ы сенаты комитет хорзыл банымадта ацы бæстæйы паддзахадон секретары бынаты Майк Помпеойы снысан кæнын. Америкæйы паддзахадон департаменты къухдариуæггæнæгæй Помпеойы снысан кæныны тыххæй схъæлæс кодтой профилон комитеты фылдæр уæнгтæ. Ныр та йæ хъуамæ сфидар кæна сенаты æххæст сконд къуырийы кæрон.

Райстой 14 документы

Пекины Хицауады резиденцийы Æм-гуыстады Шанхайаг Организацийы (ШОС) фæсарæйнаг хъуыддæгты министртæ сфидар кодтой 14 документы æввахсдæр азты къорд здæхтыты æмгуыстады проекттæ среализаци кæныны тыххæй. «ШОС ис ног историон этапы райдиан стадийы, организациийы раз гом кæнынц ног фадæттæ», – фехъусын кодта Китайы æддагон ведомствойы сæргълæууæг Ван И. Уый банысан кодта, зæгъгæ, къухтæ фыст цы документтыл æрцыдысты, уыдонæй бирæтæ хауынц Циндаойы 9-10 июны ШОС-æн цы саммит уагъд æрцæудзæн, уымæ. Саммитæн уыдзæн уæлвæткон ахсджиаг нысаниуæг.

Иумиаг хъусынгæнинаг

«Большая семерка»-йы бæстæтæ гæнæн ис æмæ Уæрæсейы ныхмæ бакæной ног санкцитæ Донбассы уавæры тыххæй, – уый тыххæй фехъусын кодтой ацы бæстæты фæсарæйнаг хъуыддæгты министрадты сæргълæуджыты иумиаг хъусынгæнинаджы. Уыдон банысан кодтой, зæгъгæ, «семерка» æххæстæй хæцы Украинæйы æвварс. «Большая семерка»-йы бæстæтæ раздæрау аххосджын кæнынц Уæрæсейы дунейы уавæр «дестабилизацийы тыххæй», фæлæ уæддæр цæттæ сты Мæскуыимæ æмгуыстадмæ, –  дзырдæуы  иумиаг хъусынгæнинаджы.

Баурæдтой террористты

Æдасдзинады федералон службæ Татарстаны баурæдта террористон къорды 14 хайадисæджы. Барадхъахъхъæнджытæ куыд дзурынц, уымæ гæсгæ уыдоны ‘хсæн сты къорды лидертæ дæр. Сæ ныхмæ конд æрцыд уголовон хъуыддаг. Фыдгæнджыты хæ-дзæртты куы басгæрстой, уæд ссардæуыд, пайда кæныны бар кæмæй нæй, ахæм литературæ, боевиктæм кæй æрбакодтой, уыдоны номхыгъдтæ æмæ æндæртæ.

Куынæг æрцыдысты

Дагъыстаны Дербенты районы контртеррористон операцийы рæстæджы амардтой майы бæрæгбонты теракт чи цæттæ кодта, уыцы дыууæ боевикы. «Чинары хъæумæ æввахс хъæдрæбын цы дыууæ бандиты уыдысты, уыдонмæ куы бахатыдысты сæ хæцæнгæрзтæ æрæвæрыны тыххæй, уæд æхсын райдыдтой автоматон хæцæнгæрзтæй. Уый фæстиуæгæн дыууæ бандиты куынæг æрцыдысты. Боевиктæм уыд алыгъуызон хæцæнгæрзтæ.

Теракт

Пакистайнаг пысылмонтæ сарæзтой дывæр теракт пакистайнаг горæт Кветтайы. Фыццаг теракт уыд горæты кæрон, кæцыйы фæстиуæгæн фæцæфтæ сты аст салдаты. Дыккаг теракт арæзт æрцыд Кветтайæн йæхи мидæг æрдæг сахаты фæстæ. Теракты фæстиуæгæн фæмард сты аст полициаджы, дæсы бæрц та цæфтæ фесты.

Информацион агентадты хъусынгæнинæгтæм гæсгæ