«Махмæ ничи хъуыста. Байхъусут нæм ныр»

1-æм марты УФ-йы Президент Владимир Путин ныстуан сарæзта Федералон Æмбырдмæ, цыран уый равдыста йæ цæстæнгас æввахс фидæны бæстæйы рæзты сæйраг здæхтыты тыххæй. Путин ныхас кодта дыууæ сахаты, фыццаг хатт мультимедион фадæттæй спайда кæнгæйæ. «Махмæ ничи хъуыста. Байхъусуст нæм ныр», – загъта уый ныгуылæйнаг партнертæм æмæ дунеон æмæхсæнадмæ сидгæйæ æмæ банысан кодта уæрæсейаг æфсæддон сæудæджерадон комплексы ног æнтыстыты тыххæй.  Путин радзырдта ногдæр хæцæнгарз  стратегион ракетон комлекс «Сармат»-ы, донбындзугæнæг æнæпилотоны, авиацион ракетон комплекс «Кинжал»-ы, базырджын блокимæ гиперзæлон комплексы æмæ æфсæддон лазерон ифтонгады тыххæй. Йæ ныхæстæм гæсгæ, Уæрæсе у дунеон лидер ног физикон принциптыл перспективон хæцæнгарз аразыны хъуыддаджы. Путин радзырдта æнæарæнгонд дæрддзæгы базырджын ракетæйы тыххæй. Ног хæцæнгарзæн ном нæма ис. Путин радзырдта стратегион ядерон тыхтæ кæй райстой 80 ног æхсæнконтиненталон баллистикон ракетæйы, донбындзæуæг науты 102 баллистикон ракетæйы, стратегион нысаниуæджы 3 ракетон донбындзугæнæг крейсертæ «Борей»-ты тыххæй. 12 ракетон полкы гæрзифтонг æрцыдысты ног ракетон комплекс «Ярс»-тæй». Уыимæ Путин банысан кодта,  зæгъгæ, Уæрæсе никæцы бæстæмæ хъавы бабырсынмæ, æрмæстдæр хъавы йæ бæстæ æмæ йе ‘мцæдисонты бахъахъхъæнынмæ. Йæ ныстуаны уæрæсейаг лидер æрдзырдта бирæ æндæр ахсджиаг фарстытыл.

Суазæг сæ кодтой ирон уæливыхтæй

Федералон Æмбырдмæ Владимир Путины ныстуаны рæстæджы æрæмбырдуæвджыты цы хæрингæтæй суазæг кодтой, уыдоны ‘хсæн уыдысты ирон уæливыхтæ дæр. Масштабон мадзалы оранизатортæ фыццаг хатт бахастой менюмæ национ хæринаг ныстуанмæ хъусджыты суазæг кæныны тыххæй. Ирон уæливыхтæ аккаг бынат ссардтой стъолыл æмæ равзæрын кодтой стыр ажиотаж журналистты ‘хсæн, кæцытæй алчидæр тырныдта йæ кæрдих райсынмæ.

Уынаффæ кодтой ахсджиаг

проблемæтыл

УФ-йы Президент Владимир Путин Кремлы фембæлд Австрийы федралон канцлер Себастьян Курцимæ. Политиктæ уынаффæ кодтой дунеон сæйрагдæр фарстытыл, уыцы нымæцы Сири æмæ Украинæйы уавæрыл, афтæ ма санкциты фарстыл дæр. Курц хъусдард аздæхта дыууæ бæстæйы экономикон æмгуыстады позитивон тенденцитæм. Канцлеры ныхæстæм гæсгæ, Уæрæсе æмæ Австрийæн ис дæргъвæтин хæларадон ахастытæ.

Характерæн байсæн нæй

УФ-йы Президент Владимир Путин Кремлы паддзахадон хорзæхтæй схорзæхджын кодта Пхенчханы Зымæгон Олимпион хъæзтыты уæлахиздзауты æмæ призерты. Уый сæрмагондæй рахицæн кодта фигуристкæтæ Алина Загитова æмæ Евгения Медведевайы æнтыст æмæ банысан кодта, зæгъгæ, байсæн ис цахæмфæнды атрибутикæйæн дæр, фæлæ характерæн байсæн нæй æмæ сымах уæ характер  равдыстат уæ ралæудтытæй, бæстæмæ уæ ахастæй.

Æндидзыд æрцыд статус

Дунеон Олимпион комитет фехъусын кодта официалон хъусынгæнинаг Уæрæсейы Олимпион комитеты статус сæндидзын кæныны тыххæй. Хъусынгæнинаджы куыд дзырдæуы, уымæ гæсгæ 2018 азы Хуссар Кореяйы Пхенчханы Зымæгон Олимпион хъæзтыты хайадисæг уæрæсейаг атлеттæй сисгæ допинг-тесттæ равдыстой æппæрццаг фæстиуджытæ. Уæрæсейаг спортсменты «сыгъдæг» допинг-пробæты фæдыл Дунеон Олимпион комитеты Уæрæсейы Олимпион комитеты уæнгад æндидзыд цæуы.

Цæттæ кæнынц уынаффæ

Минскы Украинæйы фæдыл контактон къорд цæттæ кæны 5-æм мартæй «абсолютон фидыдады» фæдыл уынаффæ. 2015 азы 12-æм февралы Минскы сразыдзинæдтыл къухтæ æрфыссыны фæстæ «сабырдзинады режим» сфидар кæныны тыххæй бафæлвæрдтытæ ист цæуынц ныр 18-æм хатт. Фæлæ, уымæ нæ кæс-гæйæ, уæддæр хæстон ныхмæлæудтытæ дарддæр кæнынц. Конкретон документыл хъуамæ сразы уой фæрстæ æмæ уый фæстæ мыхуыр æрцæудзæн.

Æртæ хатты сатакæ кодтой гуманитарон къæлидор

Сирийы хицауадон æфсæдтæ æртæ хатты ныхкъуырд радтой Скæсæйнаг Гутайы гуманитарон паузæйы рæстæджы боевикты атакæтæн. Боевиктæ раздæрау нæ хъахъхъæнынц хæстон архайдтытæ æруромыны режим æмæ фадат нæ дæттынц сабыр цæрджытæн тæссаг зонæйæ рацæуынæн. Фæрсты фидыдады фæдыл уæрæсейаг центры минæвар Владимир Золотухины ныхæстæм гæсгæ, террористтæ сабыр цæрджытæй пайда кæнынц куыд удæгас  уарт, афтæ, цæмæй æхсой хицауады æфсæдты æмæ Дамаскы цæрæн кварталты.

Ликвидаци æрцыдысты

2017 азы Уæрæсейы сликвидаци кодтой 14 террористон къорды, – уый тыххæй фехъусын кодта Мидхъуыддæгты министрады сæргълæууæг Владимир Колокольцев. «Æдасдзинады органтæ æмæ Уæрæсейы гвардийы дæлхæйттимæ иумæ ликвидаци æрцыдысты дунеон террористон организацийы 14 чыры æмæ æртæ бандитон къорды», – загъта уый.

Рахæцыд процедурæйы æвварс

Европарламент рахæцыд  Польшæйы ныхмæ санкцион процедурæ бакæныны тыххæй Еврокъамисы уынаффæйы æвварс. Брюсселы нымайынц, зæгъгæ, польшæйаг национ тæрхондонон реформæ халы европæйаг принциптæ. Брюссель йе нæразыдзинад равдыста тæрхонгæнджыты нысан æмæ иуварс кæныны уагæвæрдты фæдыл. Реформæ, сæрмагондæй, тыхджындæр кæны юстицийы министры æххæстбартæ, афтæ ма дзы хынцыд цæуы национ тæрхондонон совет Сейм кæй æвзардзæн, уый тыххæй. Евроцæдисы нымайынц, зæгъгæ, ацы реформæ гæнæн ис æмæ тæрхонгæнджытæн байса сæ хæдбардзинад.

Фехъусын кодта отставкæйы тыххæй

Каталонийы раздæры лидер Карлес Пучдемон фехъусын кодта йæ отставкæйы тыххæй. Уый загъта, чи йæ раива, уый ном дæр – Жорди Санчес, Каталонийы хæдбардзинады тыххæй змæлды лидертæй иу. Ныртæккæ Санчес ис ахæстоны, уый фæдыл се нæразыдзинад равдыстой йæ фарсхæцджытæ. Пучдемон ма æрсидт Парламентмæ, цæмæй тагъддæр райдайой диалог хицауады сæргълæууæджы бынатмæ ног кандидат равзарыны тыххæй.

Ног рекордтæ

«Газпром» 8 боны дæргъы æвæры ног рекордтæ дард фæсарæнтæм газы суткæйон экспортæй. 28-æм февралы суткæйон рекорд уыд 699,3 милуан кубометры. Европæйы аномалон уазæлттæ кæй ис, уый тыххæй «Газпром» 21-æм февралæй фæстæмæ æрвылбон дæр журналисттæн хъусын кæны дард фæсарæнтæм газы экспортæй суткæйон рекордты тыххæй.

Исдзысты импортон хъалонтæ

АИШ-ы президент Дональд Трамп фехъусын кодта, зæгъгæ, йæ бæстæ  иннæ къуырийæ бакæндзæн импортон хъалонтæ æндон æмæ алюмины тыххæй. Трампы ныхæстæм гæсгæ, АИШ-мæ йæ продукци чи ласы, уыцы бæстæтæн æндоны хъалон уыдзæн 25% æмæ алюминæн та – 10 проценты.

Информацион агентадты хъусынгæнинæгтæм гæсгæ

Comments are closed, but trackbacks and pingbacks are open.