ДÆ ЦÆСТ АХÆСС ДУНЕЙЫЛ

С. Лавровы кусæгон балц

УФ-йы Фæсарæйнаг хъуыддæгты министр Сергей Лавров Балкантæм йæ кусæгон балц райдыдыта Словенийы столицæйæ. Ведомствойы сæргълæууæг фембæлд йæ словайнаг коллегæ Карл Эрьявецимæ, афтæ ма йæ йæхимæ райста Словенийы президент Борут Пахор, кæцы ивгъуыд аз февралы мæйы æрцыд Мæскуымæ. Лавров венок сæвæрдта, словайнаг зæххыл Фыццаг æмæ Дыккаг дунеон хæстыты Советон Цæдисы æмæ Уæрæсейы хæстонтæй чи фæмард, уыдонæн Любляны уæлмæрды цы цырт ис, ууыл. 2016 азы 30-æм июлы монумент байгом кодтой Уæрæсейы æмæ Словенийы Президенттæ. Эрьявецы ныхæстæм гæсгæ, Люблянайы фæндид, цæмæй Брюсселæн бастдзинæдтæ уа Мæскуыимæ иууыл бæрзонддæр æмвæзадыл куыд политикæйы, афтæ æфсæддон хаххыл дæр.

***

Люблянайæ уæрæсейаг министр ацыд Белградмæ, цыран æй йæхимæ райста Сербийы Президент Александр Вучич. Ацы аз Уæрæсе æмæ Серби нысан кæнынц дипломатон ахастытæ сфидар кæныны 180 азы бон. Баныхæсты рæстæджы дзырд цыд Сирийы уавæрыл æмæ æндæр ахсджиаг фарстытыл. «Нæдæр Уæрæе æмæ нæдæр Серби кæрæдзийæн тыхæй ницы аразын кæнынц. Мах кæрæдзийæ никуы фæдомæм иу кæнæ иннæ бæстæимæ мауал ныхас кæныны тыххæй. Мах алыхатт дæр стæм уый æвварс, цæмæй алы бæстæйæн дæр уа равзæрсты сæрибардзинад», – загъта С.Лавров.

«Серби нæ аивдзæн йæ политикæ Уæрæсейы ахасты. Æз дзырдтон Вашингтоны дæр, Мæскуыйы дæр æмæ Брюсселы дæр,  Серби Уæрæсейы ныхмæ санкцитæ кæй нæ бакæндзæн, уый тыххæй», – банысан кодта Александр Вучич. Уый ма куыд загъта, уымæ гæгæ Серби дарддæр дæр æлхæндзæн уæрæсейаг газ, уыцы нымæцы арæзтцæуæг «Турецкий поток»-ыл дæр. Фæрстæ банысан кодтой æнтыстджын æфсæддон-техникон æмгуыстады. Дзырд цыд Украинæйы тыххæй дæр.

 

Украинæ – банкрот

Украинæйы паддзахадон хæс ахызт дыууæ триллион гривенæй. Уый у цыппар триллион сомы кæнæ 77 миллиард доллары. 2017 азы февралы Киевы паддзахадон фæфæлдæхты фæстæ бæстæйы хæс сырæзт цыппар хатты. Закъонон хицауады куы раппæрстой, уæдæй фæстæмæ бæстæйы экономикæйы уавæр æвзæрæй-æвæзæрдæр кæны. «Абон реалонæй Украинæ у банкрот. Уырны мæ бæстæйы дефолт кæй æрцæудзæн, уый», – банысан кодта Украинæйы Уæлдæр Радайы раздæры депутат Владимир Олейник. Экономион кризисы аххосгтæй сæ иу у Уæрæсеимæ экономикон бастдзинæдтæ кæй фехæлдтой, уый. Украинаг товартæ нæ хъæуынц нæдæр Европæйы æмæ нæдæр Америкæйы, – загъта Украинæйы экс-премьер Николай Азаров.

 

Ног закъон

УФ-йы Президент Владимир Путин йæ къух æрфыста закъоныл, кæцымæ гæсгæ уæрæсейаг æмбæстæгтæн фæсарæйнаг паспорт райсыны æмгъуыд къаддæр кæны цыппар мæйæ æртæ мæймæ.

 

Аварийы фæмард сты 44 адæймаджы

Перуйы автобус бæлццæттимæ ахаудта  200 метрон бæрзæндæй. Уый фæстиуæгæн 44 адæймаджы фæмард сты æмæ цæфтæ та фесты цалдæрæй.

 

Адавдæуыд 45 милуан сомы

Лев Додины театрæй адавдæуыд 45 милуан сомы. Уыцы æхцатæ хицæн æрцыдысты Академион Чысыл драмон театры ног сценæйы проектæн. Æдасдзинады федералон службæйы управленийы кусджытæ æрурæдтой, кæцытæм зæрдæ КæМæ фехсайдта бюджетон æхцатæ адавынæй, уыцы адæймæгты архайд. Факты фæдыл баконд æцыд уголовон хъуыддаг.

 

Нал æй уадзынц Украинæмæ

Михаил Саакашвилийы адвокат Руслан Чернолуцкий «Интерфаксæн» куыд фехъусын кодта, уымæ гæсгæ уый райста йæ фарстæн дзуапп Паддзахадон арæнгæрон службæйæ. Уым дзырдæуы, зæгъгæ, Мостискаг (Львовы область) арæнгæрон къорды хистæр райста уынаффæ Гуырдзыстоны экс-президент Михаил Саакашвилийæн Украинæмæ æрбацæуыны бар кæй нæй 2021 азы 13-æм февралмæ. Саакашвили украинаг хицауады уынаффæйы фæдыл загъта, зæгъгæ, уыцы уынаффæ арæнхъахъхъæнджытæ нæ рахастой, фæлæ «фыртасæй чи сæрра, уыцы барыга», кæцы, зæгъ, цæмæдæр гæсгæ хъуыды кæны, зæгъгæ, уый хицауиугад кæндзæн ноджы æртæ азы. «Мемæ æви æнæ мæн, ацы хицауадæн æрцыд кæрон, æмæ æз æрбаздæхдзынæн мæ хæдзармæ  Украинæмæ тагъд рæстæджы. Гæнæн ис, æмæ Петрæн ахæстонмæ хæссинæгтæ бахæссон.

 Информацион агентадты хъусынгæнинæгтæм гæсгæ