Дæ цæст ахæсс дунейл

ФЫЦЦАГ АТАХТ

Воронежы уыд ногдæр уæрæсейаг рог æфсæддон-транспортон хæдтæхæг Ил-112В-йы фыццаг атахт. Хæдтæхæгыл куыстой 2014 азæй фæстæмæ. Уый у Уæрæсейы бакуыстгонд фыццаг æфсæддон-транспортон хæдтæхæг Советон Цæдисы ныппырхы фæстæ. Ил-112В уæрæсейаг æфсæддон-уæлдæфон тыхты баивдзæн советон хæдтæхæг Ан-26.

ЙÆ КУЫСТ ФÆЦИС ЭКОНОМИКОН ФОРУМ

Красноярскы экономикон форумы сæйрагдæр фæзуæттæй иу уыд – «Россия – страна возможностей». Къухтæ фыст æрцыдысты регионы рæзты фæдыл дæсгай миллиард сомы аргъ контракттыл. Ацы платформæ саразын у Президент Владимир Путины идея.

ФÆСЫКК КОДТОЙ КЛУБТЫ АРХАЙД

УФ-йы Æдасдзинады федералон службæйы кусджытæ мидхъуыддæгты министрадимæ иумæ фæсыкк кодтой Хъырымы сусæг хъазæн клубты куыст. Урæд æрцыдысты 14 адæймаджы. «Куыд сбæрæгчындæуыд, уымæ гæсгæ Уæрæсейы дыууæ æмбæстаджы 2018-2019 азты сорганизаци кодтой, азартон хъæзтытæ информацион-телекоммуникацион хызæгтæй спайда кæнгæйæ. Сусæг хъазæн залтæ куыстой Керчы æмæ Севастополы компьютерон клубты хуызы бын.

УКРАИНÆЙЫ ПРЕЗИДЕНТОН ÆВЗÆРСТЫТЫ РАЗВÆЛГЪАУ ЗОНÆНТÆ

31-æм марты Украинæйы уагъд æрцыдысты президентон æвзæрстытæ. Суагъæты 65 проценты банымайыны фæстиуджытæм гæсгæ  дыккаг турмæ ахызтысты актер Владимир Зеленский (30,40%) æмæ Петр Порошенко (16,28%). Æртыккаг бынаты ис Юлия Тимошенко (13,10%).

Украинæйы Централон æвзарæн къамис æвзæрстыты фæстиуджыты тыххæй хъуамæ фехъусын кæна 10-æм апрелы онг. Президентон æвзæрстыты дыккаг тур уагъд æрцæудзæн 21-æм апрелы.

ДЗЫЛЛОН АКЦИ

Вашингтоны уагъд æрцыд дзыллон акци, АИШ æндæр бæстæты политикæйы йæхи кæй хæццæ кæны, уый ныхмæ. Протестон акцийы хайадисджытæ æрдомдтой агрессивон æддагон политикæ æруромын. Демонстранттæ æрæмбырд сты Урс хæдзары цур ахæм лозунгтимæ: «Объединимся для борьбы с войнами НАТО», «НАТО убила один миллион иракцев», «Миллионы жертв в Ираке, Югославии, Ливии» æмæ æндæртæ. Фæстаг цаутæм гæсгæ бирæты къухты уыдысты лозунгтæ, зæгъгæ, «Руки прочь от Венесуэлы».

ДЕМОНСТРАЦИТÆ

Венесуэлæйы столицæ Каракасы уагъд æрцыдысты президент Мадуройы фарсхæцджыты æмæ ныхмæлæуджыты демонстрацитæ. Акциты сорганизаци кодтой бæстæйы президент Николас Мадуро æмæ оппозицийы лидер Хуан Гуайдойы фæсидтмæ гæсгæ. Гуайдо æрсидт протестон акцитæ 6-æм апрелы сног кæнынмæ. Йæ рады Мадуро дæр æрсидт бæстæйы цæрджы-тæм, цæмæй «нæ» зæгъой АИШ-ы террористон империализмæн.

БАНЫМАДТА ЙÆ ПРЕЗИДЕНТЫ ХÆСТÆ ÆХХÆСТГÆНÆГÆЙ

Европарламент пленарон сессийы рæстæджы райста резолюци Венесуэлæйы кризис сабырадон æгъдауæй æрбæстон кæныны тыххæй сæрибар президентон æвзæрстытæ сорганизаци кæныны руаджы æмæ бафидар кодта, Хуан Гуайдойы Венесуэлæй президенты хæстæ æххæст-гæнæгæй кæй банымадта, уый тыххæй. Парламентаритæ æрсидтысты Евроцæдисы паддзахадтæ-уæнгтæм, кæцытæ нæма банымадтой Гуайдойы, цæмæй йæ банымайой æвæстиатæй.

НОГÆЙ ТА СÆМ АХУЫССЫД ЭЛЕКТРОЭНЕРГИ

Венесуэлæйы ныр иу мæйы дæргъы электроэнерги ахуыссыд фæндзæм хатт. Электроэнерги нæ уыд бæстæйы 20 штаты æмæ столицæ Каракасы. Венесуэлæйы бастдзинд æмæ информацийы министр Хорхе Родригес фехъусын кодта, зæгъгæ, бæстæйы электроифтонгадыл арæзт æрцыдысты синхронон кибератакæтæ. Уый банысан кодта, зæгъгæ, хицауад архайы ифтонгад сæндидзын кæныныл. «Мах сфидар кæндзыс-тæм нæ электрон системæ, цæмæй æнцонвадат ма уа ахæм атакæтæн», – фехъусын кодта уый.

ПРОТЕСТТÆ

Сектор Газы арæныл протестты рæстæджы фæмард сты цыппар палестинæйаджы æмæ 300 адæймагæй фылдæр та хъыгдард баййæфтой. 40 мин адæймаджы хайад райстой акци «Великий марш возвращения»-йы. Арæнгæрон æмбонды цур боны дæргъы ныхмæлæудтытæ уыд израилаг салдаттимæ, демонстранттæ сыл æхстой дуртæ, сыгътой машинæйы цæлхытæ. Израилаг æфсæддонтæ загътой, зæгъгæ  сыл цалдæр хатты палестинæйæгтæ æрбаппæрстой гранаттæ æмæ хиаразгæ рæмудзæн æрмæджытæ. Дзуаппæн салдаттæ æхсын райдыдтой. Израиль спайда кодта дронтæй, цæмæй демонстранттыл æрæппæрстаиккой цæссыгкалæн газимæ хæс-тон æрмæджытæ.

АРАБАГ ПАДДЗАХАДТЫ ЛИГÆЙЫ САММИТ

Тунисы йæ куыст фæцис Арабаг паддзахадты лигæйы 30-æм саммит. Фембæлды сæйрагдæр фарстытæй иутæ уыдысты Палестинæйы фарст æмæ Голаны бæрзæндтыл Израилы суверенитет банымайыны фæдыл Трампы уынаффæ. Ли-гæйы генералон секретарь Ахмед Абу аль-Гейт скритикæ кодта АИШ-ы президенты уынаффæ Голаны бæрзæндтыл Израилы суверенитет банымайыны тыххæй. Генералон секретары позицийы æвварс рахæцыдысты организацийы æппæт уæнгтæ æмæ саммиты хайадисджытæ – ИНО-йы Генералон секретарь Антониу Гутерриш æмæ фæсарæйнаг хъуыддæгты æмæ æдасдзинады политикæйы фæдыл Евроцæдисы уæлдæр ми-нæвар Федерика Могерини дæр.

«БУР ЖИЛЕТТЫ» 20-æм  АКЦИ

Францы уагъд æрцыд «бур жилетты» радон 20-æм акци. Бæстæйы мидхъуыддæгты министрады бæрæггæнæнтæм гæсгæ уынгтæм рахызтысты 33700 манифестанты бæрц. Парижы протестон акцийы хайад райстой 4 мин адæймаджы. Ивгъуыд сабаты акциимæ абаргæйæ, 20-æм акцийы хайад райстой къаддæр манифестанты. Уымæ ‘нæкæсгæйæ, Францы хицауад ацы хатт сæхи цæттæ кодтой гæнæнуæвæг змæстыты ныхмæ фæлæууынмæ. Урæд æрцыдысты 37 адæймаджы. Манифестанттимæ ныхмæлæудтыты рæстæджы полици спайда кодта цæссыгкалæн газæй. Монпельейы цалдæр полициаджы фæцæфтæ сты.

ФÆУÆЛАХИЗ ÆВЗÆРСТЫТЫ

Словакийы уагъд æрцыдысты президенты бынатмæ æвзæрстытæ, цыран фæуæлахиз адвокат Зузана Чапутова. Хъæлæсты 91 проценты бакусыны фæстæ Чапутова райста æвзарджыты 58 проценты хъæлæсы, йæ ныхмæлæууæг та – 42 проценты. «Словакийы фыццаг сылгоймаг-президент у дидинджыты аккаг æмæ йын арвитдзынæн букет», – загъта йæ ныхмæлæууæг Шефчович.

СРÆМЫГЪД – ЗАВОДЫ

Китайы провинци Цзянсуйы заводы зынгсирвæзты æмæ срæмыгъды фæстиуæгæн фæмард сты авд адæймаджы, ноджы дæс адæймаджы та райстой алыгъуызон травмæтæ. Заводы территори ссыгъд æмæ уый фæстæ спырхт контейнер, цыран уыд згъæр. 21-æм марты та ацы провиницийы химион заводы тыхджын срæмыгъды фæстиуæгæн фæмард сты 78 адæймаджы.

 

Информацион агентадты хъусынгæнинæгтæм гæсгæ