Цхинвалы музыкалон ахуыргæнæндон – дунеон музыкалон чемпионаты уæлахиздзау

Æлборты Феликсы номыл Цхинвалы музыкалон ахуыргæнæндоны национ зарæджы хоры хайадисджытæ систы Дыккæгæм дунеон музыкалон чемпионат «Лазурная волна – Сочи 2017»-ы уæлахиздзаутæ. Чемпионат уагъд цыд 18-23 июны горæт Сочийы Лазаревскы районы», – хъусын кæны РХИ-йы Культурæйы министрады пресс-службæ.

«Чемпионат «Лазурная волна – Сочи 2017» уагъд цыд ахæм номинациты: «Академион вокал», «Адæмон вокал», «Эстрадон вокал», «Эстрадон ансамблтæ æмæ чысыл формæтæ», «Солисттæ-инструменталисттæ», «Хо-ры коллективтæ, ансамблтæ». Музыкалон чемпионаты «Инструменталон æххæсткæнынады» номинацийы уæлахиздзау ссис хуссарирыстойнаг курдиатджын гармонист Къæбысты Сæрмæт. Уый сæххæст кодта попурри кавказаг музыкæйæ. Музыкалон ахуыргæнæндоны национ зарæджы хор бацахста фыццаг бынат æмæ хорзæхджын æрцыд сыгъзæрин майданæй, афтæ ма йын лæвæрд æрцыд дунеон чемпионат «Лазурная волна – Сочи 2017»-ы лауреаты кадджын ном дæр. Хоры коллектив жюрийы размæ рахаста Æлборты Феликсы уацмыстæ – «Ирон чындзæхсæв» æмæ «Чызгай», – загътой Культурæйы министрады пресс-службæйы.

Пресс-службæйы ма куыд банысан кодтой, уымæ гæсгæ «Лазурная волна – Сочи 2017»-ы организатортæ сты Дунеон Артийскы комитет, Уæрæсейы Национ Артийскы комитет, Гнесинты номыл Музыкæйы уæрæсейаг академи, Евразийы композиторты сфæлдыстады дунеон академи æмæ композиторты цæдис.

Музыкалон чемпионатмæ Хуссар Ирыстоны минæвæртты балц организаци æрцыд РХИ-йы Президент Бибылты Анатолийы финансон æх-хуысы руаджы.

Хуссар Ирыстоны минæвæрттæй дарддæр ма музыкалон чемпионаты алыгъуызон хорзæхтыл тох кодтой 120 артистæй фылдæр Сомихстон, Абхаз æмæ Уæрæсейæ. Музыкалон чемпионаты хицæндзинад ис уый мидæг, æмæ сценæмæ кæй рахызтысты куыд профессионалон æххæстгæнджытæ, афтæ хæдархайгæ артисттæ æмæ коллективтæ дæр. Кæд æмæ чемпионат нырма æвзонг у, уæддæр цырд темптæй популярон кæны. Ныр дыккаг хатт горæт Сочийы Лазаревскы район музыкалон чемпионат ауадзынæн радта бынат Уæрæсейы Национ Артийскы комитет æмæ йæ партнер – Гнесинты номыл музыкæйы уæрæсейаг академийæн.