Цхинвалы цæгатварсы арæзтады перспективæтæ

Цхинвалы территори рагæй нал уæрæхдæр кодта. Æрмæстдæр ивгъуыд азы республикæйы хицауады уынаффæмæ гæсгæ сбæлвырд сты Цхинвалы районы æмæ Цхинвалы горæты ’хсæн ног арæнтæ.

Цхинвалы абоны территори æххæссы Гуджабары хъæуæй Хурзæрины микрорайонмæ фæзилæны онг. Горæтмæ бафтыд æртæ ног цæрæн массивы — Мæскуыйаг, Цæгаттаг æмæ Хурзæрин. Уыдонæй дарддæр ма ам сты, арæзтæдтæ кæм нæ цæуы, ахæм сæрибар зæххытæ. Ацы зæххы фадгуыты фæдыл æхсæнады цæуынц дискусситæ. Горæтæн цæгатæрдыгæй фарс арæзтадты перспективæты тыххæй радзырдта Цхинвалы администрацийы сæргълæууæг Æлборты Алан.

«Горæты цæгатварс алыгъуызон объекттæ саразын бынæттон инвестортæй бирæты фæнды. Азы дæргъы æппæт потенциалон инвестортæ-аразджытæн фадат уыдис сæ проекттæ горæты администрацимæ æрбавдисын. Уыдон æвзæрст цыдысты карзæй. Хъуыддаг уый мидæг ис, æмæ бакуыст æрцыд горæты арæзтæдты Генералон план, æмæ алы объект, алы арæзтад дæр хъуамæ органикон æгъдауæй сфидауа генпланы сбæлвырдгонд иумæйаг стилы. Хæццæ, кæй куыд фæнды, ахæм арæзтæдтæ аразыны рæстæг аивгъуыдта. Горæтмæ бахизæн, зæгъæн ис, у куыд столицæйы, афтæ республикæйы хæдхуыз æвдисæг. Уымæ гæсгæ ацы территориты объекттæ аразынæн ис принципиалон нысаниуæг, — загъта Æлборты фырт. — Генпланмæ гæсгæ ацы территоритæ хæрзарæзт цæудзысты афтæ, цæмæй фæндаджы фæрсты цæрæн хæдзæрттæ ма уа. Уы-мыты план цæуы æхсæнадон-хъуыддагон нысаниуæджы объекттæ аразын. Ацы территорийыл мах иу фадыг дæр никæмæн ратдзыстæм, потенциалон объектаразæг куынæ æрбавдиса, нæ домæнтæн дзуапп чи дæтта, ахæм проект, уæд. Æрсидтæуыдзæн горæтарæзтадон совет, проекттæм хъуамæ æркæсой æмæ сæ хорзыл банымайой хицауады дæр. Æрмæстдæр уый фæстæ уыдзæн дзурæн амалиуæггæнджытимæ, кæцыты мах базонгæ кодтам нæ фæндæттимæ — цахæм объект аразын хъæуы æмæ цыран хуыздæр рафидаудзæн. Растдæр ахæм схемæмæ гæсгæ æххæст цæудзæнис территориты дих кæнын.

Инвестортæ æрбавдыстой бирæ оригиналон проекттæ. Горæты хицауиуæгады сæйраг домæн у æппæт объектты фæдыл дæр проектон-сметæйон документаци бавдисын. Уый фæстæ, горæтарæзтадон совет куы æркæса æппæт бавдисгæ проекттæм, уæд ист æрцæудзысты уынаффæтæ».

Æлборты Алан банысан кодта, зæгъгæ, абоны бонмæ горæты администрацимæ бавдыст æрцыдысты 12 проекты, æмæ баззайдзысты уыцы инвестортæ, кæцытæн сæ проектон-сметæйон документаци у фæуынхъус.

«Объектты фæдыл кæройнаг уынаффæ ист æрцæудзæн мæйы æмгъуыдмæ. Инвестортæ æрбахæссынц рæсугъд нывтæ нæ, фæлæ арæзтады конкретон плæнттæ. Зæххы фадгуытæ арæзтадæн дæтгæйæ, хицæн уынаффæйæ амалиуæггæнæгыл бæрндзинад æвæрд цæудзæн — кæд æмæ, цы зæххы фадыг ын лæвæрд æрцыд, уым афæдзы дæргъы ницы куыстытæ бакодта, уæд ын ист æрцæудзæнис æмæ йыл уынаффæ кæндзæнис горæтарæзтадон совет. Ам аскъуыддзаг кæндзысты, приоритетон уагыл æндæр инвестортæй кæмæн лæвæрд æрцæуа, уый».

Æлборты Аланы ныхæстæм гæсгæ, абоны бонмæ горæты администраци нырма иу зæххы фадыг дæр никæмæн радта ленкгæнæн бассейн «Дельфин»-æй «Цæгаттаг» микрорайонмæ фæзилæны онг территорийыл. Фæлæ уæддæр ауылты чи фæцæуынц, уыдон æнæфæхатгæ нæ фæвæййынц, æмбонд чи сты, ахæм зæххы фадгуыты, арæзтадон куыстытæ сæ кæй кæнынц. Хъуыддаг уый мидæг ис, æмæ цалынмæ ацы территоритæ горæты скондмæ нæ рахызтысты, уæдмæ цалдæр фадыджы лæвæрд æрцыдысты нæ республикæйы цæрджытæн. Æмæ дзы уыдон дæр райдыдтой арæзтадон куыстытæ. Иуæй-иутæ та сæ æрмæстдæр æхгæнгæ æркодтой.

«Цхинвалы районы администраци цы зæххы фадгуытæ радта, уыдоны мах æвзардзыстæм хицæнæй, — зæгъы Æлборы фырт. — Ис дзы амалиуæггæнджытæ, кæцытæ кæнынц арæзтадон куыстытæ. Мах, кæй зæгъын æй хъæуы, цы объекттæ арæзт æрцыдысты, уыдоны пырх нæ кæндзыстæм, фæлæ мах хъуыдымæ гæсгæ кæд иумæйаг хуыз фыдуынд кæндзысты, уæд барадон бындурыл æрдомдзыстæм, цæмæй сæ æндæр исты сарæзтæуа.

20 азы дæргъы горæты хæрзарæзтады, йæ архитектурон стилы фарстытæм хъусдард здæхт нæ цыд. Уый та фæзынд горæты иумæйаг бакастыл. Горæты хицауиуæгад йæ разы цы хæс æвæры, уый у æнæзакъонон арæзтæдтæ ныппырх кæнын, архитектурон план фехалгæйæ цахæмфæнды объекты арæзтад дæр ма бауадзын.

 

Цхинвалы горæты администрацийы пресс-службæ