Сентябры фыццаг бон. Фæззыгон рог уддзæф уæнгтæ рог кæны æмæ афтæ зыны, цыма уый дæр цин кæны æмæ рæвдауы, скъолайы къæсæрæй та чи бахиздзысты, уыцы цардбæллон æвзонг лæппутæ æмæ чызджыты. Алкæй цæсгомыл дæр сæ хъазыд мидбылхудт, цин кодтой кæрæдзийыл, æрмæст нырма сабыр æмæ æфсæрмдзæстыгæй кастысты фыццагкъласонтæ. Уæдмæ сæххæст банысангонд рæстæг æмæ райдыдта мадзал. Зонындзинæдты бон хъæлдзæг æмæ цины æнкъарæнтимæ банысан кодтой Цхинвалы районы Къостайыхъæуы астæуккаг скъолайы педколлектив æмæ скъоладзаутæ. Ардæм ма фæуазæг сты район æмæ республикæйы разамонæг кусджытæ, скъолайы раздæры рауагъдонтæ, хъæубæстæ æмæ иумæ банысан кодтой ног ахуыры азы фыццаг бон.

Скъола æххæст цæттæйæ æмбæлы ног ахуыры азыл, стæй, фаронимæ абаргæйæ, ацы азы фыццагкъласонтæ сты фылдæр – 6 ахуырдзауы æмæ уый дæр сомбоны ныфсы хос у.

Цытджын линейкæйы ралæууыдысты ахуырдзау фæсивæд æмæ сæ хъæлдзæг цæстæнгас æмæ мидбылхудт бæрæгбоны ноджы уæлдай мидисджындæр кодта. 2016-17-æм ахуыры азы æрбалæуды тыххæй арфæйы ныхас загъта хистæркъласон Козаты Илонæ. Уый фæстæ æрбацæуæг адæм, иу уысм æдзæмæй алæугæйæ, ссардтой, 12 азы размæ Беслæны фыццæгæм скъолайы теракты рæстæджы чи фæмард сты, уыдоны рухс нæмттæ. Райдыдта цытджын мадзал æмæ арфæйы ныхæстæ ракодта скъолайы раздæры директор, РХИ-йы сгуыхт ахуыргæнæг Хуыбиаты Зоя:

– 1988 азæй райдыдтон кусын скъолайы директорæй. Кæд зын æмæ уæззау рæстæджытæ уыдысты, уæддæр ахуыргæнджытæн сæ къухы ахуыр-хъомыладон куысты æфтыд æнтыстытæ. Уыцы азты рауагъдонтæй бирæтæ æрлæууыдысты фæллойы фæндагыл, æндæртæ райстой уæлдæр ахуырад æмæ сæ иутæ ахуыр-хъомыладон куыст кæнынц сæ уарзон скъолайы. Мæ фыццаг рауагъдонтæй сæ иу у скъолайы ахуыргæнæг Тыбылты Алекси Тузары фырт дæр. Азтæ цæуынц, ныр хæрзбон зæгъын ацы бæрнон бынатæн мæхи фæндон æмæ куырдиатмæ гæсгæ. Фæлæ скъолайы та хъуамæ дарддæр дæр уа, æрыгон фæлтæрыл зæрдиагæй чи ауда, ахæм разамонæг æмæ фæндон хæссын, цæмæй уырдæм ра-размæгонд æрцæуа ацы æрыгон æмæ курдиатджын педагог Тыбылы фырт.

Уыцы фæндоныл сразы сты се ‘ппæт дæр.

Йæ хæдфæстæ ныхасы рацыд скъолайы ног директор Тыбылты Алекси æмæ арфæ ракодта æрæмбырдуæвджытæн. Дарддæр æрдзырдта, ахуыр-хъомыладон куысты тыххæй йæ разы цы хæстæ æрæвæрдта, уыдон тыххæй. Бафæндыд æй, цæмæй коллективимæ иумæ хъомыл кæной уарзон Ирыстонæн аккаг хъæбултæ. Уый фæстæ нæ Парламенты фракци «Иууон Ирыстон»-ы номæй депутат Лохты Мендик скъолайон хызынтæ балæвар кодта, ацы аз фыццаг къласмæ йæ къах чи æрбавæрдта, уыдонæн æмæ сын загъта ахуыры иууыл хуыздæр фæндиæгтæ. Раныхас ма кодтой æмæ ног ахуыры азы æрбалæуды тыххæй зæрдиаг арфæтæ ахуыргæнинæгтæ æмæ ахуыргæнджытæн загътой Президенты Администрацийы къухдариуæггæнæджы хæдивæг Гобозты Вячеслав, районы администрацийы адæмон ахуырады хайады сæргълæууæг Лолоты Барис æмæ фыццагкъласонты ахуыргæнæг Гаглойты Тамилæ. Сæхи рады ахуыргæнинæгтæ кастысты æмдзæвгæтæ, зары-дысты зарджытæ æмæ сæххæст кодтой цалдæр кафты. Фæстæ нæ фæлæууыдысты фыццагкъласонтæ дæр æмæ дзырдтой æмдзæвгæтæ. Уый фæстæ 11-æм къласы ахуыргæ-нинаг Тыджыты Владислав йæ хъæбысмæ систа фыццагкъласон Мæлдзыгаты Аланæйы æмæ уый ныццагъта ног ахуыры азы æрбалæуды тыххæй дзæнгæрæг. Ахуыргæнинæгтæй алчи дæр атындзыдта йæ къласмæ æмæ та æрлæууыдысты ахуыры фæрнæйдзаг фæндагыл.

Хуыбиаты Н.

Comments are closed, but trackbacks and pingbacks are open.