Æрæджы мыхуыры рацыд ног чиныг «Большая трагедия маленького народа», зæгъгæ.  Йæ автор æмæ аразæг у РХИ-йы Ветеранты советы сæрдары хæдивæг, булкъон Уалыты Гайоз. Уый райгуырд Хуссар Ирыстоны Дменисы хъæуы, астæуккаг скъола каст фæуыны фæстæ йæ ахуыр адарддæр кодта Цæгат Кавказы æфсæддон ахуыргæнæндоны. Советон æфсады службæ кодта 1988 азы онг афицеры чины. Йæ рæстæджы куыста Хуссар Ирыстоны Гарзджын Тыхтæ саразыныл, уыд Фидауынгæнæг тыхты командиры хæдивæг. РХИ-йы Æдасдзинады паддзахадон комитеты бахæсмæ гæсгæ куыста РХИ-йы Арæнгæрон службæ саразыныл. Арæзт æмæ техникæ, хисæрмагонд скондæй комплектгонд æрцыдысты 12 арæнгæрон застæвæйы. Булкъон Уалыты Гайоз отставкæйы ацæуыны фæстæ æвзæрст æрцыд РХИ-йы Ветернанты советы сæрдары хæдивæгæй.

Ацы чиныджы авторы сæйраг нысан у, 2008 азы августы гуырдзиаг неофашисттæ радон хатт ирон адæмæн геноцид кæй сарæзтой, уыцы трагкион цауты равдисын. Гуырдзыстоны авантюрон хицауад йæ разы æрæвæрдта хæс, цæмæй скуынæг кæной ирон адæмы, æгæрыстæмæй, нæ æлгъ кодтой сывæллæтты, сылгоймæгты æмæ зæрæдты марыныл, ирон хъæуты басудзын æмæ сын сæ цæрджыты стигъыныл, æгъатырæй сабыр цæрджыты, лигъдæтты марыныл, амынæттæн тынг тæссаг, фыдбойнаджы методтæй хъизæмар кæныныл Ахæм æнæадæймагон митæ нæ арæзтой, æгæрыстæмæй, немыцаг фашисттæ  дæр Стыр Фыдыбæстæйон хæсты рæстæджы.

Автор бакодта цымыдисон æмæ хъæуæг куыст, объективонæй æвдыст æрцыдысты 2008 азы августы хæсты катастрофон фæстиуджытæ. Æрæмбырд кодта Хуссар Ирыстонмæ Гуырдзыстоны æрбабырсты фæдыл бирæ публицистон информаци. Цы æрмæджытæ æрæмбырд кодта, уыдон мыхуыр æрцыдысты дзыллон информацийы фæрæзты. Хæсты трагикон цаутæн æвдисæн уыд чиныджы автор  йæхæдæг дæр. Уалыйы фырт зæрдæйæ кæй фæрыст йæ радтæг адæмы трагедийыл, уый ирдæй зыны йæ арæзт чиныгмæ цы æрмæджытæ бахаста, стæй йæ номæй дæр. Бирæ бафыдæбон кодта, фæлæ нæ фæтарст зындзинæдтæй йæ радтæг адæмы рис æмæ рæстдзинад равдисыны сæраппонд. Æппæт уыцы æрмæджытæ æрæмбырд кæныныл цъус рæстæг куынæ бахардз кодта, мыййаг.

Чиныджы сыфтæ фæлдахгæйæ, цæстытыл ауайынц 2008 азы августы хæсты трагикон цаутæ, æмæ та сног  вæййынц зæрдæйæн, зæрдæ та уæлдай рыст скæны æмæ нырхæндæг вæййы. Чиныджы æрмæг ис 1989 азты цауты тыххæй дæр – «Тревожная осень 1989 года – начало тревожного лета 2008 года»,  зæгъгæ.  2008 азы августы хæсты тыххæй дзы бакæсæн ис ахæм уацтæн куыд, зæгъæм, «Раненный Ацамаз умер в день своего рождения», «Откуда нам было знать, что это их последний путь», «Их тела сложили друг на друга, облили соляркой и подожгли», «Тая Сытник пыталсь уберечь сына от любого несчастья, но 9 августа ей пришлось закрыть ему глаза», «Через несколько дней Георгия ждали в Москве, в аспирантуре», «На нас полетели куски человеческого мяса», «Отец и сын погибли вместе», «Подвиг Олега Галаванова», «Оставь меня. Лучше позаботься о себе, подумай о детях», « Я был уверен, что после такой бомбежки в городе живых не осталось…», æмæ бирæ  æндæр зæрдæскъуынæн уацтæ.

5-æм сентябры Уалыты Гайоз Цхинвалы администрацийы йæ кусæн хатæнмæ æрбахуыдта Стыр Фыдыбæстæйон хæсты æмæ куысты ветеранты, афтæ ма гуырдзиаг-ирон ныхмæлæуды рæстæджы знæгты ныхмæ тохты активон хайад чи иста, уыдонæй дыууæйы –  Гæззаты Владимир æмæ Абайты Рутены. Ветеранты æмæ иннæ уазджыты æрбахуынды нысан уыд, цæмæй сæ базонгæ кодтаид йæ чиныджы мидисимæ. «Ацы чиныг саразын мæ хæсыл уымæн банымадтон, æмæ хъуамæ фидæны фæлтæртæн ныууадзæм историон æрмæджытæ, цæмæй уыдон зоной сæ ныййарджытæ, сæ дадатæ æмæ нанатæ дæргъвæтин азты дæргъы цы уæззау фæндагыл рацыдысты, уый тыххæй. Науæд бирæ цаутæ ферох вæййы æмæ ирон адæмы суинаг фæлтæртæ та æнæмæнгæйдæр хъуамæ зоной знаг сын чи у æмæ сын хæлар чи у, уый. Мæ зонгæтæй мæ бирæ чидæртæ афæрсынц, зæгъгæ, чиныг уæййаг ис дуканиты. Нæй, ацы чиныгæн уæйгæнæн нæй, уымæн æмæ дзы сты Ирыстоны тугæрхæм хъæбулты тыххæй æрмæджытæ, цæссыгæй йемыдзаг у, хуылыдз у ирон мæдты цæссыгæй, хъæрзын дзы хъуысы æмæ йæ куыд хъуа-мæ ауæй кæнон. Æз нæлгоймаг дæн, фæлæ æрмæджытæ куы æмбырд кодтон æмæ-иу сæ куы бакастæн, уæд-иу мæ цæссыг нæ баурæдтон кæд æмæ хæсты æппæт цаутæн мæхæдæг дæр æвдисæн уыдтæн, уæддæр. Абон ардæм фæхуыдтам Тая Сытникы, кæцыйæн йæ иунæг тæхудиаджы хъæбул Гоша фæмард 9 августы æмæ йын йæ цæстытыл йæхæдæг бахæцыд. Ахæм уæззаудæр цауы фæстæ ма зæрдæскъуыд мад цæргæ кæны? Нырма йæ баныгæдтой хæдзары раз æмæ йæ 16 августы та баныгæдтой Згъудеры уæлмæрды. 24 августы та у йæ райгуырæн бон æмæ йæм мæрдтыбæстæм арфæтæ фервиты йæ рыстзæрдæ мад… Уадз, æмæ ацы чиныг ирон адæмæн суа стъолы къæлиндары хуызæн, цæмæй ма ферох кæной гуырдзыйы аххосæй ирон адæм цы хъизæ-мæрттæ бавзæрстой, уыдоны тыххæй. Ирон адæм рохгæнаг адæм сты сæ фырхæларзæрдæйы аххосæй æмæ та тас у, цалдæр азы фæстæ та куы айрох уой æппæт уыцы трагикон цаутæ. Истори та алыхатт дæр фæлхаттгонд æрцæуы. Ацы чиныгмæ кæд искæйы фæнды æндæр факттæ бахæссын дæр, уæд, табуафси, æрбахæссæт æрмæджытæ, фæмардуæвджыты биографитæ æмæ нывтæ, баххæст æй кæндзыстæм æмæ йæ ногæй уæрæхдæрæй рауадздзыстæм. Арæхдæр фыссын хъæуы куыд  хæсты рæстæджы чи фæмард, уыдоны хъайтардзинæдты тыххæй, афтæ сæрæгасæй чи баззад, уыдоны тыххæй дæр.

Стыр бузныг зæгъын мæ фæнды рауагъдады директор Тедеты Валяйæн. Уый нын бирæ баххуыс кодта. Бузныг зæгъын мæ фæнды компани «Мегафон – Южная Осетия»-йæн генералон директор Роман Ковригайы сæргълæудæй, РХИ-йы капиталон арæзтады управленийы хистæр Джиоты Роберт, РХИ-йы автомобилон фæндæгты æмæ арæзтады фæдыл комитеты сæрдар Гуызыдтаты Эдуард æмæ Цхинвалы типографы директор Икъаты Мадинæйæн чиныг рауадзынæн финансон æххуыс кæй бакодтой, уый тыххæй», – загъта Уалыты Гайоз.

Æрæмбырдуæвджыты раз ма чиныджы тыххæй йæ хъуыдытæ загъта РХИ-йы Ветеранты цæдисы сæрдар Бесаты Вячеслав. «Ацы чиныг хъæуæг чиныг у. Ноджыдæр æй уæрæхдæрæй æмæ стырдæр тиражæй рауадзын хъæуы, цæмæй уа алы ирон бинонты хæдзары дæр. Уадз, æмæ ирон адæм зоной сæ хъайтарты тыххæй. Стыр Фыдыбæстæйон хæсты рæстæджы ирон адæмæй æбæрæгæй чи фесæфт, уыдонæй ссардтой бирæты æмæ сын сæ бæрæггæнæнтæ байуæрстой мыггæгтыл. Мæнмæ дæр дзы радтой цыппар адæймаджы документтæ, фæлæ дзы дыууæйы не ссардтон. Бацыдтæн Присы хъæумæ дæр, фæлæ сæ хъæубæстæй дæр ничи зыдта. Афтæмæй фесæфдзæн сæ ном. Абон мах дæр куынæ батыхсæм гуырдзиаг-ирон хæсты рæстæджы цаутæ историйы ныууадзыныл, уæд сомбоны Ирыстоны фидæны фæлтæртæ дæр нал зондзысты сæ хъайтарты тыххæй», – банысан кодта Бесаты Вячеслав.

Мадзалы кæронбæттæны Уалыты Гайоз йæ чиныг балæвар кодта æрæмбырдуæвджытæй алкæмæн дæр. Уый ма сиды, гуырдзиаг-ирон хæсты рæстæджы йæ хъæбулы, мад, фыды, хойы, æфсымæры чи фесæфта, уыдонмæ: «Æрбацæут Цхинвалы администрацийы бæстыхайы дыккаг уæладзыджы РХИ-йы Ветеранты цæдисмæ, цæмæй уын балæвар кæнон ацы чиныджы».

Джиоты Екатеринæ

Comments are closed, but trackbacks and pingbacks are open.