Советон дуджы Хуссар Ирыстоны библиотекæтæ регулярон æгъдауæй æххæст цыдысты алыгъуызон чингуытæй, уымæн æмæ сæ чиныгкæсæг агуырдта зæрдиагæй æмæ сæ нымæц дæр уыд дзæвгар фылдæр. Фæлæ ма дæргъвæтин азты хæстон уавæрты цæргæйæ кæй æндæвдтой чингуытæ. Стæй  нæ царды Интернеты æмæ алыгъуызон нырыккон технологиты фæзындимæ чиныгæн уадиссаг кад нал уыд. Фæлæ та, ныр чиныгмæ цæрджыты цымыдисдзинад фылдæр кæнын райдыдта. Уый бæрæг у уымæй дæр, æмæ нырма кæд раздæрау нæ, уæддæр адæм чиныгагур цæуын кæй райдыдтой библиотекæтæм, чиныгуæйгæнæн магазинтæм. Кæй зæгъын æй хъæуы, змæст æмæ хæстон азты нæ республикæйы библиотекæты чингуыты фонд тынг скадавар, фæлæ ныр хъуыддаг хуыздæрæрдæм ивын райдыдта.

Ацы бонты нæ горæты Æвзæнгты республикон библиотекæйы цалдæр стъолыл фенæн уыд чингуыты рæдзæгъдтæн. Хъуыддаг уый мидæг ис, æмæ РХИ-йы Культурæйы министрады финансон фæрæзты руаджы радон хатт нæ республикæйы библиотекæтæн æлхæд æрцыд ног чингуыты стыр парти.

РХИ-йы Культурæйы министрады библиотекæты куысты фæдыл сæйраг специалист Дриаты Нателæ куыд банысан кодта, уымæ гæсгæ чингуытæ кæм æрæвæрдтаиккой, цæмæй сæ æмхуызонæй республикæйы библиотекæтыл адих кодтаиккой, уый тыххæй сын бынат кæй нæй, уымæ гæсгæ та сæ радон хатт æрбаластой Æв-зæнгты республикон библиотекæмæ. Иннæмæй та сæм чингуытæ адих кæнынмæ алы хатт дæр æнæзивæгæй фæкæсынц ацы библиотекæйы кусджытæ сæ директор Тототы Ленæйы сæргълæудæй. Республикæйы библиотекæтæ фæхъæздыгдæр уыдзысты ахæм чингуытæй, куыд  Тургенев – «Ася», «Первая любовь», Рыбаков – «Дети Арбата», Пастернак – «Доктор Живаго», Толстой – «Исповедь о жизни», Маяковский – «Во весь голос», Островский – «Гроза», «Бесприданница», Тургенев – «Дворянское гнездо», Салтыков-Щедрин – «История одного города», Шолохов – «Судьба человека», Ахматова – «Бег времени», Лермонтов – «Герой нашего времени», Булгаков  «Белая гвардия», Куприн – «Гранатовый браслет» æмæ æндæр уырыссаг æмæ фæсарæйнаг фысджыты чин-гуытæ.

РХИ-йы Культурæйы министрады библиотекæты куысты фæдыл сæйраг специалист Дриаты Нателæ нын афтæ радзырдта: «Райстам чингуыты егъау парти культурæйы министрады руаджы. Чингуытæ æввахс рæстæджы дих æрцæудзысты нæ республикæйы библиотекæтыл. Иумиагæй нæ республикæйы ис 64 библиотекæйы æмæ уыдонæн се ‘ппæтæн дæр фæхъæздыгдæр уыдзæн сæ чингуыты фонд. Чингуытæ æлхæд æрцыдысты 27-æм майы библиотекæйы бонмæ библиотекон форум бацæттæ кæныны фæлгæтты. Ацы форумы фæлгæтты ма уагъд æрцæудзысты бирæ æндæр алыгъуызон мадзæлттæ. Чингуыты егъау парти асламæй балхæнын нæ къухты кæй бафтыд, уый тыххæй мæ стыр бузныг зæгъын фæнды Хъайтарты уынджы чингуытæуæйгæнæн магазин «Чингуыты дуне»-йы директор Уалыты Белæйæн. Уый Уæрæсейы регионты ссардта асламæй нын чин-гуытæ чи рауæй кодтаид, ахæм рауагъдадтæ æмæ нын сæ æрласта. Æдæппæтæй балхæдтам 1601 экземпляры».

Дриаты Нателæ ма куыд банысан кодта, афтæмæй нæ республикæйы библиотекæтæ хъуагдзинад æййафынц сывæллæтты литературæйæ æмæ, зæгъ, кæд амалиуæггæнджытæй искæмæн йæ бон у хæрзаудæн акци саразын сывæллæтты литературæ балхæныны хуызы, уæд дзы стыр бузныг фæуаиккам.

Джиоты Екатеринæ

Comments are closed, but trackbacks and pingbacks are open.