Культурæ у æнусон мæсыгау. Алы дур дæр йæ хъæддыхдзинадæн вазыгджын æмæ ахсджиаг у. Иу дзы куы рахауа, уæд тæссаг уыдзæн, иууылдæр куы ныккæла, уымæй. Æмæ йæ фидар амайын хъæуы суанг йæ бындурæй.
Фæстаг азты бирæ ивындзинæдтæ цæуы нæ царды хорзæрдæм. Цæрджытæ æнæрахатгæ не сты, нæ горæт бонæй-бон кæй сыгъдæгдæр æмæ рæсугъддæр кæны, уый. Бирæ куыст цæуы йæ хæрзарæзт æмæ цæрынæн хæрзвадат кæныныл.
Нæ горæты йæ цæрджытæ æцæг уарзтæй кæй уарзынц, уый дызæрдыггаг нæу. Йæ алы хорз фæзынд дæр сын цинхæссаг вæййы. О, фæлæ горæты рæсугъддзинадыл барæй исчи фы-даудæн куы фæкæны, уæд уый сæ зæрдæйæн æрхæссы зындзинад.
Цхинвалы, йæ дæргъ 1,7 километры кæмæн у, уыцы Октябры уынг, зæгъæн ис, ногæй арӕзт æрцыд 2015 азы. Арæзтой йæ фондз мӕйы дӕргъы Инвестицион программæйы фӕлгӕтты, бахардз ыл 100 милуан сомӕй фылдӕр ӕмӕ ссис горӕты иууыл фенддагдæр ӕмӕ аивдӕр уынг. Сæрæй кæронмæ уынджы зайынц ӕнусон назбӕлӕстӕ, сӕ быны æвæрд – фæхсбандӕттӕ, изӕрыгон рӕсугъд уынджы ноджы рæсугъддæр кæнынц электроцырæгътæ.
Уынджы астæуты цы аллея цæуы, уымæн йæ иувæрсты дæр декоративон цæджындзтыл конд æрцыдысты фонартæ. Уыдон дæр изæрыгæтты сæ аивдзинад æмæ рухсæй æхцондзинад хастой адæмæн.
Уынг бирæтæн ссис сæхи аирхæфсæн, тезгъогæнæн бынат. О, фæлæ не ‘хсæн разыны ахæм адæймæгтæ, кæцытæн сæ къух æртасы фонарты асæттынмæ æмæ бронкалæн асыччыты цъæл кæнынмæ. Ацы уынг нырма æрæджы æрцыд хæрзарæзт, фæлæ, хъыгагæн, уыцы рæстæгмæ асастæуыд фонартæй бирæты, афтæ ма бронкалæн асыччытæй дæр.
Арæх ахæм æмæ æндæр цауты фæаххосджын кæнæм сабиты, фæлæ ахæм фыдракæнд саби нæ бакæндзæн, уымæн æмæ фонарты цæджындзты бæрзæнд у дыууæ метр æмæ æрдæг. Уыцы бæрзæндмæ чи сæххæсса, уый саби нал у, фæлæ стыр хъуыддæгты бирæ лæгдзинæдтæ чи хъуамæ равдиса, ахæм адæймаг, æмæ уый та хъуамæ хорз зонид, йæ ахæм архайдæй æрмæст йæхи кæй нæ худинаг кæны, фæлæ ма кæй æхсæн цæры, уыцы адæмы дæр.
Горӕты администраци сиды цæрджытæм, цæмæй аудгӕ ахаст дарой горӕты ӕддаг бакастмӕ, Октябры уынджы цы ныппырх кодтой, уыдон саразынӕн та сӕм фӕрӕзтӕ нæй.
«Октябры уынг уыдис раздæр дæр рæсугъд, гъеныр та у ноджы рæсугъддæр. Мæ зæрдæмæ дзы алцы дæр цæуы. Алы райсом æмæ алы изæр дæр æз мæ хъæбулы хъæбултимæ тезгъо кæнын ацы уынджы. Фæлæ мæ цæст саст фонартæ æмæ бронкалæн асыччытыл куы схæцы, уæд мын вæййы тынг зын. Чи сын радта уыцы бар, æмæ уынгты рухсытæ æмæ сæ цъæл кæной?!», – зæгъы пенсиисæг Фатимæ.
Уынджы алы фæхсбандоны фарсмæ дæр æвæрд ис бронкалæн асыччытæ. Уыдонæй абон иу дæр æнæхъæн нал у. Лæууынц цъæлтæ æмæ здыхстытæй. Цалдæр та дзы сæ бынæттæй фæтары сты. Хорз уаид, сæ тыхтæ уыдоныл чи æвзары, уыдон сæ хорз хъуыддæгты куы хардз кæниккой, фæлæ сæ уыцы хъуыды иуæй иутæм не ‘рцæуы æмæ сæ, æвæццæгæн, ахæм зондыл æфтаугæ дæр ничи кæны.
ДРИАТЫ Лейла
Comments are closed, but trackbacks and pingbacks are open.