Æцæг хæлар тыхст рæстæджы кæй фæбæрæг вæййы, уымæй растдæр ницы загъдæуыд. Фæстаг цалдæр мæйы дунейы хъусдард здæхт у, бынтон æнæнхъæлæджы цы коронавирусы эпидеми фæзынд, уымæ.

Коронавирус уæлдай тынгдæр цы бæстæты апарахт ис, уыцы паддзахадтæ иунæгæй аззадысты сæ бæллæхимæ. «Евроцæдисы номы бын иугонд хæдзары» бæстæты арæнтæ æхгæд æрцыдысты æмæ сæ дарддæр дæр æхгæнынц. Евроцæдисы бæстæтæй ма алчидæр кæны æрмæстдæр йæхи мæт.

Уæззау уавæры бахауд Итали дæр. Бæстæйы къухдариуæгад æнхъæлмæ каст æххуысмæ йе ‘мцæдисон бæстæтæй, фæлæ фыдæнхъæл фæци. Италийы къорд политикы, уыцы нымæцы бæстæйы парламенты дæллаг палатæйы вице-спикер дæр рæстæгмæ систой Евроцæдисы тырысатæ, кæцытæ сагъд уыдысты национ тырысайы фарсмæ. Оппозицион парти «Лига»-йы лидер Маттео Сальвини ацы бонты фехъусын кодта, зæгъгæ, горæт Кадонегейы мэр Марко Скиесаро дæр горæты администрацийы бæстыхайæ райста Евроцæдисы тырыса, Евроцæдисы уæнгты ‘хсæн фаг æмзæрдæдзинад кæй нæй, уымæ гæсгæ. «Европæ нын нæ баххуыс кодта,  махæй цахæм Европæ æнхъæлдтам, ахæм нæ разынд. Уый адæмты Европæ нæу, фæлæ Германы цæхæрадон. Нæ дадатæ æмæ уыдоны фыдтæ Европæйы ссæрибар кæныны тыххæй сæ туг уый тыххæй нæ калдтой, цæмæй йæ æртыккаг хатт Германæн радтæм. Европæйæн бындур æвæрд æрцыд Дыккаг дунеон хæсты пырхæнтыл», – банысан кодта горæты мэр.

Ахæм къахдзæф ма сарæзтой ноджы цалдæр мэры, æмæ Сальвини йæхæдæг та, кæцы раздæр дæр критикæ кодта «Брюсселы бюрократийы», иу æмæ дыууæ хатты нæ фæаххосджын кодта Евроцæдисы æмуддзинады хъуагдзинады тыххæй æмæ коронавирусы пандемийы уавæрты Италийæн кæй нæ баххуыс кодтой, уымæй. Парти «Братья Италии»-йы лидер Джорджа Мелони йæ Твиттеры ныффыста, зæгъгæ, депутатты палатæйы вице-сæрдар Фабио Рампелли парламенты йæ кабинетæй айста Евроцæдисы тырыса. «Нæ ныстуан ис уый мидæг, æмæ Европæ Италийы иунæгæй ныууагъта, бæстæйы Европæйы æххуыс иууыл тынгдæр куы хъуыд, уæд. Европæ хъуамæ аскъуыддзаг кæна, дарддæр ма уæвынад кæндзæн æви немыцæгты эгоизмы батайдзæн, уый», – загъта Мелони, ныртæккæ Италийы иууыл популярондæр политиктæй иу. Рим æмæ Брюсселы быцæу цæуы хицауады æмвæзадыл дæр. Италийы премьер-министр Джузеппе Конте йæ къух не ‘рфыста Евроцæдисы фæстаг уæлвæткон саммиты хатдзæгон документыл. Хатдзæгон документы хынцыд цыд ног паддзахадон хæсты карз уавæртæм гæсгæ фидыны тыххæй. Итали æмæ Европæйы къорд бæстæйы домынц «коронабондтæ» рауадзыныл, кæцытæ хынцдзысты æмхуызон уавæртæ æппæт бæстæтæ-æмхæлæарады уæнгтæн. Фæлæ йæ ныхмæ рацыдысты Герман æмæ цæгат Европæйы бæстæтæ, кæцыты æддагон хæс у къаддæр æмæ сæ экономикон уавæр та – стабилондæр.

Еврокъамисы сæргълæууæг Урсула фон дер Ляйен раздæр фарсхæцынады ныхæстæ загъта Италийы адресыл, кæцы Европæйы уæлдай тынгдæр хъыгдард баййæфта эпидемийæ. Фæлæ уый фæстæ сразы ис Берлинимæ «коронабонустæ» ма райсыны тыххæй.

Æдасдзинады фæдыл Мюнхены конференцийы сæргълæууæг Вольфганг Ишингеры ныхæстæм гæсгæ, Европæйы гуымирдæр рæдыд уыд, Италийæн кæй нæ баххуыс кодта, уый. Бæстæйы цæрджытæ Евроцæдисæй фыдæнхъæл фесты. Ишингер хъусдард аздæхта уымæ, зæгъгæ, Евроцæдисæй Италийы рахизыны тыххæй социалон хызæгтæ æрæмбырд кодтой 850 мин æмхъуыдыгæнæджы. Уый хыгъд Уæрæсе Китай æмæ Италийæн ссис ирвæзынгæнæг. Политик зæрдыл æрлæууын кодта, зæгъгæ, Европæ æххуыс кæны Италийæн, фæлæ проблемæ ис уый мидæг æмæ европæйаг æххуыс æгæр кæй бафæстиат. Пандеми гæнæн ис суа Евроцæдисы кæрон, мадзæлттæ ист куынæ æрцæуой, уæд, – банысан кодта немыцаг политик. Италийы цæрджыты 60% нымайынц, зæгъгæ, сын Европæ æппындæр не ‘ххуыс кæны æмæ сæ хъысмæты æвджид ныууагъта. Евроцæдис ныртæккæ хъуамæ сараза æнæмнæгхъæуæг ын цы у, уый, науæд уый уыдзæн йæ кæрон.

Æмцæдисонтæ кæрæдзийæн куыд кад æмæ аргъ кæнынц, уый бæрæг у уымæй дæр, æмæ АИШ-ы президент Дональд Трамп кæй спайда кодта Корейаг хæсты рæстæджыты закъонæй, цæмæй америкæйаг корпораци 3М медицинон нысаны товарты экспорт æндæр бæстæтæм  ма бауадза. Уыимæ ма Берлин фæаххосджын кодта АИШ-ы «нырыккон абырæгдзинады», сæ бæстæмæ сын кæй хъуамæ арвыстаиккой, уыцы  200 мин респираторон маскæйы Америкæмæ æрвыст куы æрцыдысты, уый фæстæ. Мидæггагон хъуыддæгты фæдыл Берлины сенаты минæвар Андреас Гайзель æрсидт Трампы администрацимæ, цæмæй хъахъхъæной дунеон базарады уагæвæрдтæ. «Трансатлантикон æмцæдисонæн афтæ нæ аразынц. Æгæрыстæмæй глобалон кризисты рæстæджы дæр нæй гæнæн Хъæддаг Ныгуылæны методтæй пайда кæнын», – загъта уый.

Америкæйæгтæ ма æппынфæстаг Китайы аэропорты балхæдтой, Францæн кæй хъуамæ арвыстаиикой, уыцы медицинон товарты егъау парти дæр. Афтæмæй Францы ныууагътой æнæ маскæтæй. 2-æм апрелæй райдайгæйæ, Америкæйы Иугонд Штаттæ райдыдтой медикаментты партитæ ахсын, кæцытæ нысан уыдысты æндæр бæстæтæн.  АИШ ма сæхи бакодтой, Бразилийæн кæй æрвыстой, уыцы медикаменттæ дæр.

Ахæм цау æрцыд Чехийы дæр. Ацы бæстæйы хицауад сконфискаци кодта Китайæ Италимæ цы медицинон маскæтæ æрвыстой, уыдоны.

Уæдæ, ахæм уавæрты Евроцæдисæн фидæн ис æви нæй, уый та рæстæг фенын кæндзæн.

Мыхуырмæ йæ бацæттæ кодта

ДЖИОТЫ Екатеринæ

Comments are closed, but trackbacks and pingbacks are open.