Дзауы районы Къуайсайы астæуккаг скъолайы дæр ныццагъта фæстаг дзæнгæрæг 11 рауагъдонæн. Бæрæгбонон мадзалмæ фæуазæг сты Къуайсайы горæты администрацийы сæргълæууæг Бæззаты Геннади, Мидхъуыддæгты министр Наниты Игорь, Дзауы районы ахуыры хайы сæргълæууæг Битеты Мария.
Скъолайы директор Хуыгаты Сулико бузныджы ныхæстæ загъта æрæмбырдуæвджытæн æмæ зæрдиагæй раарфæ кодта рауагъдонтæн.
Уый фæстæ рауагъдонты схорзæхджын кодта грамотæтæй.
Скъолайы директор ма стыр бузныджы ныхæстæ загъта бынæттон администрацийæн, милицийы кусджытæн æмæ Дзауы районы ахуыры хайæн, кæцытæ кæддæридæр балæууынц сæ уæлхъус сæ тыхст рæстæджы.
Мидхъуыддæгты министр Наниты Игорь дæр раарфæ кодта рауагъдонтæн æмæ сын бакодта зæрдылдарæн лæвæрттæ.
Наниты Игорь ма Къуайсайы астæуккаг скъолайы ахуыргæнджыты схорзæхджын кодта Мидхъуыддæгты министрады кады грамотæйæ æмæ сын арфæйы ныхæстæ загъта рæзгæ фæлтæрты хъомыладмæ ахæм егъау хайбавæрд кæй хæссынц, уый фæдыл.
Ныхасы ма рацыд Дзауы районы ахуыры хайы сæргълæууæг Битеты Мария дæр. Уый дæр рауагъдонтæн загъта хъарм ныхæстæ æмæ сæм бахатыд, цæмæй макуы рох кæной сæ фыдæлты традицитæ, макуы фæхудинаг кæной сæ ныййарджыты æмæ сæ ахуыргæнджыты.
Арфæйы ныхæстæ ма рауагъдонтæн дзырдтой горæты администрацийы сæргълæууæг Бæззаты Геннади, ныййарджытæ æмæ рауагъдонты къласгæс Кокойты Светланæ.
ДЖИОТЫ Александр
Comments are closed, but trackbacks and pingbacks are open.