24 майы нæ республикæйы астæуккаг скъолаты 506 рауагъдонæн айзæлдысты фæстаг дзæнгæрæджы зæлтæ, уыдонæй фараст сты сыгъзæрин майданы претенденттæ. Уыцы ахуыргæнинæгтæ сты гимназитæ «Рухс» æмæ «Альбион»-æй, Хъахъхъæнынады министрады Кадетон скъолайæ æмæ горæт Цхинвалы дыккæгæм æмæ иуæндæсæм скъолатæй. Рауагъдонты фылдæр хай сты горæттаг скъолатæй – æдæппæт 410 ахуырдзауы.
Ахæм сыгъдæг æмæ райдзаст бæрæгбонмæ сæхи развæлгъау фæцæттæ кæнынц куыд ахуырдзаутæ, афтæ педколлективтæ дæр. Сфæлыстой скъолаты бахизæнтæ æмæ срæсугъд кодтой мадзалуадзæн бынат. Бирæ скъолаты рауагъдонтæн айтыгътой сырх гауызтæ æмæ сыл сæ ахуыргæнджытимæ сæрбæрзондæй рацыдысты. Сæхæдæг дæр уыдысты бæрæгбонон фæлыст æмæ сæ уындæй зæрдæ радис. Кæмдæрты дзы ахуырдзауты æмæ ахуыргæнджыты фенæн уыдис цæссыгкалгæйæ – бирæ азты дæргъы кæрæдзийыл сахуыр сты, кæрæдзийæн хион адæймæгты хуызæн систы æмæ йæ ныр банкъардтой, нырæй фæстæмæ кæй ахицæн уыдзысты сæ фæндæгтæ.
Рауагъдонтæн нырма разæй сты фæлварæнтæ æмæ сын стæй 23 июны та бацæттæ кæндзысты цытджын мадзал – рауагъдонты бал. Ацы мадзалы организатор иннæ хæттытау уыдзæнис Сывæллæтты сфæлдыстадон галуан.