Ленингоры районы скъолатæ ног ахуыры азмæ куыд цæттæ сты, уый тыххæй нын лæмбынæг информаци радта ацы районы администрацийы ахуыры хайады сæргълæууæджы хæдивæг Сланты Мадинæ.
«Иумиагæй сисгæйæ, нæ районы скъолатæ цæттæ сты ног ахуыры азы райдианмæ. Цæттæ стæм зонындзинæдты боны цытæн мадзæлттæ ауадзынмæ дæр. Ныридæгæн уал цалцæггæнæн куыстытæ æххæст æрцыдысты поселочы гуырдзиаг скъолайы бæстыхайы, ивд æрцыдысты дондзæуæн хæтæлтæ дæр. Ис нæм æппæт фæрæзтæ дæр, цæмæй ма нын сæйраджыдæр цы куыстытæ баззад саразинаг, уыдон дæр æввахс рæстæджы æххæст æрцæуой», – банысан кодта Мадинæ.
Йæ ныхæстæм гæсгæ уый стыр проблемæйыл нымайы хъæуты цæрджытæ кæй къаддæр кæнынц, уый.
«Хъæуты цæрджытæ азæй-азмæ хуыздæр цардагур кæй лидзынц алы рæттæм, уый бæрæгæй фæзындис Ленингоры районы скъолатыл дæр. Уымæн ирд æвдисæн у, бирæ скъолаты нæм ацы аз фыццагкъласонтæ кæй нæй, уый. Фыццаг кълæстæ нæм скусдзысты æрмæстдæр Ленингоры поселочы уырыссаг æмæ гуырдзиаг скъолаты, стæй Цъинагар æмæ Икъоты хъæуты», – банысан кодта Сланты чызг.
Уый ма куыд загъта, уымæ гæсгæ районы скъолайы кары агъоммæйы уагдæттæ дæр сæхи цæттæ кæнынц ног ахуыры азы райдианмæ. Æппæт сабидæтты дæр 29 августæй 2 сентябры онг ис санитарон бонтæ. Ленингоры районы администрацийы ахуыры хайады сæргълæууæджы хæдивæг Сланты Мадинæйы ныхæстæм гæсгæ сентябры мæймæ сабидæтты æппæт хатæнтæ дæр æрцæудзысты дезинфекцигонд. Ахуырады хайы фæдыл ныридæгæн цæуынц цæттæгæнæн куыстытæ, уагдæттыл байуардзысты методикон литературæ.
Нæ уацх.
Comments are closed, but trackbacks and pingbacks are open.