Цхинвалы районы Тъбеты хъæууон Культурæйы хæдзары директорæй æрæджы кусын райдыдта, йæ хъуыддаг хорз чи зоны æмæ æнтысгæ архайдмæ чи тырны, ахæм куыстуарзаг сылгоймаг Хаситы Ленæ. Ленæ астæуккаг скъолайы ахуыры азты дæр æмхиц уыд аивадмæ, хайад иста хæдархайгæ аивадон къордты. Фæстæдæр та, адæмон театры артист уæвгæйæ, дырысæй æххæст кодта режиссеры амындтæ æмæ йæ сæххæстгонд фæлгæнцтæй рухс кодта сценæмæкæсджыты зæрдæтæ.
Хаситы чызгмæ йæ ног бынаты ис бирæ хъуыдытæ æмæ фæндтæ, тырны, цæмæй культурæйы артдзæст суа хъæууон цæрджыты уарзон бынат, аивадмæ курдиатджын фæлтæр та сæ тыхтæ фæлварой зард, кафт æмæ драмон къордты. Культурæйы хæдзар исы периодикон мыхуыр æмæ ардæм æрбацæуджытæ фæзонгæ кæнынц нæ республикæ æмæ уымæн æддейæ æрцæугæ цаутимæ. Хæдархайгæ къордтæн, уæлдайдæр та, кафты аивады хорз æнтыстытæ кæй уыд, сценæмæкæсджыты зæрдæтæ сæ кæй рухс кодтой, уый бæрæг у, æндæр æмæ æндæр азты цы грамотæтæ æмæ æппæлæн фыстæджытæ фæистой, уыдонæй дæр.
Уыцы бон дæр хæдахуыр æвзонг чызджытæ æмæ лæппутæ кодтой репетици. Кафты алы фезмæлд дæр сын лæмбынæг амыдта сæ аивадон къухдариуæггæнæг, Республикæ Хуссар Ирыстоны сгуыхт артист Санахъоты Инал. Уый сын йæ фæлтæрддзинад амоны къуыри æртæ хатты, куыд загъта, афтæмæй йæ хъомылгæнинæгтæ тынг цымыдис кæнынц кафты фæзилæнтæ бæстон базонынмæ æмæ цыбыр рæстæгмæ хорзæрдæм фæзыны сæ аивадон рæзтыл. Кафджыты къорды хайад исынц 18 адæймаджы, фæлæ директоры фæнд у, цæмæй уыцы нымæц ноджы фæфылдæр кæной. Ирон фæндырыл цæгъды Джыккайты Владислав æмæ гуымсæгыл та – Яралов Александр. Æвзонг лæппутæй иутæ та бацыдысты гуымсæгыл цæгъдыны къордмæ. Ам ма ис драмон къорд дæр æмæ хæдахуыр артисттæн иуактон пьесæтæ æвæры Хаситы Ленæ йæхæдæг. Æввахс бонты Фыдыбæстæ хъахъхъæнæджы боны цытæн хъæууон цæрджытæн равдисдзысты концерт, уый фæстæ та – Сылгоймæгты æхсæнадæмон бон – 8-æм марты цытæн бацæттæ кæндзысты бæрæгбонон мадзал. Уырдæм ма фæхондзысты бирæсывæллонджын мæдты æмæ сын зæгъдзысты арфæйы ныхæстæ.
ХУЫБИАТЫ Никъала
Comments are closed, but trackbacks and pingbacks are open.