Уæрæсейы Федерацийы къухдаруæгадимæ Президент Бибылты Анатолийы бадзырдмæ гæсгæ Хуссар Ирыстон æмæ Уæрæсейы минæварады ‘хсæн къухтæ æрфыстæуыд Электроэнергетикон инфраструктурæйы объектты технологонæй æрбаиу кæныны тыххæй Сразыдзинадыл.
Документыл къухтæ æрфыстой Мæскуыйы 2020 азы 2 сентябры, Уæрæсейы Хуссар Ирыстоны Уæлвæткон æмæ Æххæстбарджын минæвар Гасситы Знауыр æмæ Уæрæсейы Энергетикæйы министры хæдивæг Евгений Грабчак.
Ацы цауæн комментари дæтгæйæ, Хицауады Сæрдары хæстæ рæстæгмæ æххæстгæнæг Бекъойты Геннади банысан кодта, зæгъгæ, республикæйы стабилон электроифтонгад у Хицауады сæйраг хæс.
«Нæ хæс у фæлхасгæнджыты æмæ социалон инфраструктурæ электроэнергийæ сифтонг кæнын. Кабелон хæххыты арæзтад райдайдзæн 2020 азы цыппæрæм кварталы. Проект ныртæккæ ис экспертизæйы, æнхъæлмæ кæсæм хатдзæгтæм сентябры кæрон. Электроифтонгадимæ проблемæтæ республикæйы фæзынынц регуляронæй, уæлдайдæр фæззыгон-зымæгон рæстæджы, æмæ сæйраджыдæр баст сты, архайгæ электрохаххы 11-æм километр кæй цæуы уæлхæххон зынвадат фадыгыл, кæцымæ зымæджы вæййы зын бацæуæн. Рукъы тъунелыл электрокабель ауадзын фадат ратдзæн ацы проблемæ аскъуыддзаг кæнынæн, уымæн æмæ ацы хахх аразыны фадат уыдзæн кæцыфæнды рæстæджы дæр», – фехъусын кодта Бекъойты Геннади.
Хицауады Сæрдары хæстæ рæстæгмæ æххæстгæнæг куыд банысан кодта, афтæмæй республикæйы æнæкъуылымпыйæ электроэнергийæ сифтонг кæныны æнæмæнгхъæуындзинады фарст Хицауады боны фæткы ис 2010 азæй фæстæмæ. Фæлæ æрмæст ныр баввахс стæм ацы фарст аскъуыддзаг кæнынмæ.
Бибылты Анатолийы инициативæ æмæ Уæрæсейы Федерацийы къухдариуæгады æххуысæй Уæрæсейы æмæ Хуссар Ирыстоны профилон ведомствоты ‘хсæн уагъд æрцыд цæттæгæнæн куыст барадон базæ аразыны фæдыл, кæцы æнæмæнгхъæуæг у Сразыдзинадыл къухтæ æрфыссынæн, кæцыйæн йæ сæйраг нысан у республикæйы территорийыл уæвæг электрохаххы уæрæсейаг электрохæххытæм баиу кæныны технологон фарстытæ æрбæстон кæнын.
Comments are closed, but trackbacks and pingbacks are open.