“РÆСТДЗИНАД”-æн – НОГ РЕДАКТОР
5 февралы хицауады æмбырды республикон адæмон газет “Рæстдзинад”-æн нысан æрцыд ног сæйраг редактор – Хозиты Барис. Уый уыцы бынаты раивта Битарты Маринæйы. Маринæйы æрæджы раивтой “Рæстдзинад”-æй “Северная Осетия”-йы газеты сæйраг редакторы бынатмæ. Уый тыххæй дзыллон информацийы фæрæзтæн фехъусын кодта республикæйы хицауады администрацийы разамонæг Челæхсаты Рустем.
Уый куыд банысан кодта, афтæмæй Хозиты Барис у республикæйы зындгонд адæймаг, ирон æвзагыл æцæгæй йæ зæрдæ кæмæн риссы æмæ йæ хæр-зæбонæн æппæт дæр чи аразы, газеты куысты арфæйаг традицитæ дарддæр чи акæндзæн, ахæм.
Ног редакторы тыххæй йæ хъуыдытæ загъта ЦИПУ-йы журналистикæйы фа-культеты декан Хæбæлаты Фатимæ дæр: “Хозиты Барисæн йæ бон у ацы бынаты æнтыстджынæй бакусын. Уымæн æмæ у курдиатджын, хорз зоны æвзаг, зонадон куыст, теоретикон æмæ практикон куыст. Сæйрагдæр та, æгæрон уарзт кæны йæ мадæлон æвзаг. Уырны мæ, газет ныр ноджы фылдæр кæй æххуыс кæндзæн курдиатджын фæсивæдæн, кæцытæ фыссынц иронау. Хозийы фырты тыххæй фидарæй зæгъæн ис, уый кæй у ирон культурæ дарддæргæнæг”.
Хозиты Барис у филологон зонæдты кандидат, Цæгат Ирыстоны культурæйы сгуыхт кусæг, Уæрæсейы Фысджыты æмæ журналистты цæдисы уæнг. Фæстаг азты куыста ЦИПУ-йы ирон филологийы факультеты деканæй. У бирæ чингуытæ æмæ зонадон куыстыты автор.
Ног сæйраг редакторы хæдивджытæ сты Бутаты Эльзæ æмæ Хетæгкаты-Уаниты Оксанæ.
Мах дæр арфæ кæнæм Хозиты Барисæн йæ ног бынаты тыххæй. Цы газеты сæргъы æрлæууыд, уый хорз хабæрттæ хæссæг уæд Ирыстоны къуымты.
Нæ уацх.
Comments are closed, but trackbacks and pingbacks are open.