Цæгат Ирыстоны

ИРАН – ИРЫСТОНЫ ХÆЛАР

Иран æмæ Ирыстоны ‘хсæн хæлардзинад азæй-азмæ фидардæр кæй кæны, уымæн бирæ дæнцæгтæ ис. Уый тыххæй ЦИПУ-йы рагæй кусы ирайнаг культурон центр, студенттæ ахуыр кæнынц ирайнаг æвзаг, культурон æмæ наукон бастдзинæдты фæлгæтты декабры амынд уагдоны арæзт æрцыд дунеон конференци.

Ныр та ацы бонты Дзæуджыхъæуы йæ дуæрттæ байгом кодта ног æхсæнад “Иран – Ирыстон”. Уый у Петербурджы фæстæ æнæхъæн уæрæсейы дыккаг. Ирайнаг культурæ æмæ истори цымыдисаг кæмæн сты, уыдонæн уыцы хъуыддаг стыр циндзинад æрхаста. Йæ байгомыл зæрдиагæй бацархайдта Пысылмон Республикæ Ираны минæварад Уæрæсейы, культурæйы хъуыддæгты фæдыл атташе Реза Малеки. Уый зæгъы:

“Фæстаг рæстæг Уæрæсе æмæ Ираны ‘хсæн ахастдзинæдтæ дидинæг калынц, сты бæрзонд æмвæзадыл. Нæ бастдзинæдтæ иууыл фидардæр кæнынц Ирыстонимæ. Фыццагдæр Ирыстонмæ куы æрцыдтæн, уæд мæм тынг диссаг фæкаст, алы адæмыхæттытæ æмæ дины конфесситæ иумæ куыд хæларæй цæрынц, уый. Уый у ахсджиаг, аргъ кæмæн нæй, ахæм æууæл. Уыимæ мæ дисы æфтауы ирон адæмы истори æмæ культурæ, уæлдайдæр не ‘взаджы æмхуызондзинæдтæ. Ныфс мæ ис, ацы æхсæнад нæ иудзинадæн ноджы стырдæр ахъаз кæй фæуыдзæн, уымæй”.

Ног æхсæнады сæйраг нысан у дыууæ субъекты ‘хсæн æмгуыстады рæзт æмæ хæлардзинад сфидар кæнын. Культурон, зонадон, хъуыддагон бастдзинæдтæ саразын æхсæнадон, спортивон æмæ дины организацитимæ. Æхсæнады Президент у Цæгат Ирыстоны ахуырады раздæры министр Хъуысаты Таймураз.

Нæ уацх.