Цæгат Ирыстоны

ФÆЗЫНД НÆМ НÆХИ КОСМЕТИКÆ

Æхсызгон хъуыддаг вæййы нæ чысыл республикæйы, æхсæнадæн пайда чи вæййы, ахæм куыстуат куы фæзыны, уæд. Цæгат Ирыстоны советон дуджы бирæ куыстуæттæ уыд, фæлæ нæм абоны онг косметикæ ничи уагъта. Уыцы бæллиц фæзынд компани «Лето»-йы директор Инна Игнатовичмæ 2015 азы. Хæс сæвæрдта йæ разы Кавказы æрдзæй сыгъдæг косметикæ æмæ гигиенæйы дзау-мæттæ уадзын. Йе ‘мцæдисонтимæ сæ проект бавдыстой фæсивæдон форум “Машук – 2015”-мæ. Проект нымад æрцыд хорзыл æмæ рамбылдта грант 300 мин сомы. Уыцы æхцайæ хæдзардзинæй спайда кодтой организатортæ. Райдайæны зайæгойтæ æмбырд кодтой сæхæдæг. Уыдонæй уал уагъд æрцыд чысыл парти “Лето”, зæгъгæ, ахæм брендимæ. Цыбыр рæстæгмæ экологон сыгъдæг продукци адæм зæрдиагæй æлхæнын райдыдтой. Ныртæккæ компани уадзы бирæ алыхуызон продукци, уыдонимæ: кремтæ, сапæттæ, шампунтæ, цæсгомы маскæтæ æмæ бирæ æндæртæ. Аразынц сæ кæрдæджытæй, дидинджытæй, сырх сæнæй, мыдæй, æлыгæй, æхсырæй æмæ æндæр экологон сыгъдæг продукцийæ. Куыстуаты специалисттæ сты дохтыр – косметологтæ, биотехнологтæ, химиктæ æмæ фармацевттæ. Ныртæккæ кусынц кары ныхмæ ног продукцийы хуызыл.

Цæгат Ирыстоны бизнес – рæзты инвестортимæ куысты фæдыл агентады директор Кирилл Ерохин куыд нымайы, афтæмæй ацы куыстуат республикæйæн æрхæсдзæн стыр пайда: “Организатортæ равдыстой ныфс æмæ тырнындзинадæн цы фæстиуджытæ ис, уый. Компани сыгъдæг экологон продукци кæй уадзы, уымæн стыр нысаниуæг ис. Зæрдиагæй йæ исынц Мæскуы, Санкт-Петербург, Краснодар æмæ æндæр стыр горæтты базарадон центртæ. Ацы бонты бадзырд бафыстам Дард Скæсæны регионтимæ дæр. Закъазтæ куыд рæзой, афтæ рæздзæн нæ пайда æмæ нæ кусджыты нымæц дæр”, – загъта Ерохин.

Косметикæ уадзæн компани “Лето” йæ куыст кæд 2015 азæй райдыдта, уæддæр официалон æгъдауæй куыстуат нымад æрцыд ныр. Йæ продукци экспортæн дæр ахсджиаг кæй у, уый тыххæй ма сын программæ “Старт”-ы фæлгæтты лæвæрд æрцыд дыууæ милуан сомы. Æввахс рæстæджы йæ продукци фæфылдæр кæнын æмæ йæ кус-джыты нымæцмæ бафтауыныл архайы компани “Лето”.

Нæ уацх.