СÆЙРАГДÆР – ФÆСИВÆДЫ ХЪОМЫЛАД

Æрæджы, Хицауады Сæрдары хæдивæг Сæбæтхъуаты Æхсарбег фембæлд Цæгат Ирыстоны республикæйы разамынады хицæн минæвæрттимæ æмæ æрныхас кодтой, 2015 азæй 2020 азмæ Ирыстоны федералон программæ «Рæзгæ фæлтæры патриотикон хъомылад» куыд æххæст цæуы, уый фæдыл.

Æмбырды архайдтой РЦИ-Аланийы культурæйы, ахуырад æмæ зонады, физикон культурæ æмæ спорты, национ ахастдзинæдты фарстаты фæдыл министрадты разамонджытæ, алыхуызон комитеттæ æмæ ведомствоты сæргълæуджытæ.

Хатдзæгтæ кæнгæйæ сæ алчидæр æрдзырдта, программæйы уынаффæтæ æххæст кæныны æмгъуыдмæ цы мадзæлттæ скодтой, цæмæй рæзгæ фæлтæрмæ гуырын кæной Фыдыбæстæмæ уарзондзинады æнкъарæнтæ æмæ, Уæрæсейы цæрæг адæмы ‘хсæн æнгом æмæ хæлардзинады ахастдзинæдтæ ныффидар кæныны мадзалæн хорзæй цы сарæзтой, уый тыххæй.

Уæлдай хъæппæрис ацы хъуыддаджы равдыстой паддзахадон автономон кусæндон “РЦИ-Аланийы фæсивæды хæстон-патриотон хъомылады центр”. Сæ куысты тыххæй дæнцæгæн равдыстой видеоролик. Арфæйаг у сæ архайд патриотон акцитæ: «Хъæбатыры номыл уынг», «Фыстæг фронтæй», «Цъæх кæлмæрзæн», «Георгион лентæ», «Æнæмæлгæ полк»-æн. Сæрдыгон лагерь «Горец» æмæ спортивон-хæстон лагерь «Балц» дæр стыр бавæрд хæссынц республикæйы фæсивæды патриотон хъомыладмæ. Хорз æнтыстытæ равдыстой ДОСААФ, 58-æм арми æмæ РЦИ Аланийы Ахуырад, стæй ахуырады æмæ зонады министрад дæр.

Патриотон хъомылады темæйæ уæлдай ма ныхас цыд нæ рæзгæ фæлтæры нозт æмæ наркотиктæй бахизыныл. Хицауады Сæрдары хæдивæг куыд радзырдта, афтæмæй нæ республикæйы наркологон диспансеры æмæ Медицинон профилактикæйы республикон центры дохтыртæ арæх саразынц фембæлдтытæ æрыгæттимæ.

Ахæм фембæлдтыты нысан вæййы æрыгæттæм фæхæццæ кæнын пайдайаг информаци, цæмæй нæ кæстæртæ бамбарой – наркотикты азары цæмæй бахауой æмæ цардæй се ‘мгъуыдæй раздæр цæмæй ахицæн уой, уый тыххæй сæ нæ хъомыл кодтой сæ ныййарджытæ, фæлæ цæмæй цард адарддæр кæной æмæ сæ фидæн рæсугъд уа, уый тыххæй. Специалисттæ сын бакæсынц лекцитæ, равдисынц сын кинонывтæ, радзурынц, наркотиктæй йæхицæн бынтæ чи кæны, уыцы фыдгæнджыты дзæмбытæм се ‘мгæрттæ куыд бахауынц, уый тыххæй. Нæ фæсивæды нын цæмæй наркотиктæ мауал цæгъдой, уый тыххæй не ‘ппæты дæр хъæуы нæ тыхтæ баиу кæнын æмæ наркоманийы ныхмæ фидар фæлæууын.

Дарддæр æмбырды ныхас цыд фидæны плантыл, кæстæрты хъомылады фæдыл цы программæ æххæст цæудзæн, уый ахсджиагдæр хæстыл. Сæбæтхъуаты Æхсарбег æрдомдта, цæмæй цыбыр рæстæгмæ программæйæ аивой иуæй-иу пункттæ æмæ йæм бахæссой ногдзинæдтæ. Уыцы ног пункттæй та кæцыдæртæ царды уагъд хъуамæ æрцæуой Стыр Уæлахизы бæрæгбон –  9-æм маймæ.

Нæ уацхæссæг

Comments are closed, but trackbacks and pingbacks are open.