Цæгат Ирыстоны

ХИЦАУАД  АИВТА  ЙЕ  СКОНД

Республикæйы Хицауады Сæрдар Дзанайты Барис æрæвнæлдта йæ фыццаградон нысæнттæ æххæст кæнынмæ. Фыццагдæр уал йæ хæдивджыты нымæц астæй фæкъаддæр кодта æхсæзы онг.

Нырæй фæстæмæ Хицауады сконды уыдзæн æрмæст цыппæрдæс министрады, авд комитеты, цыппар разамынды æмæ æртæ службæйы.

Хъæууон хæдзарад æмæ хойраджы министрад раздæрау фæстæмæ суыдзæн Хæууон хæдзарады министрад; Национ ахастдзинæдты фæдыл министрад ныр хуындзæн Национ политикæ æмæ æддагон бастдзинæдты фарстаты фæдыл министрад, йæ сæргъы министры раздæры хæдивæг Бæгъиаты Алан;  Архитектурæ æмæ горæтарæзтады комитет нырæй фæстæмæ суыдзæн Арæзтад æмæ архитектурæйы министрады иу хай; Информацион технологитæ æмæ бастдзинады управлени нырæй фæстæмæ хуындзæн Нымæцон рæзты комитет.

Уымæй дарддæр  ныртæккæ куыст цæуы Арæзтад æмæ архитектурæйы æмæ Цæрæнуатон-коммуналон хæдзарады министрадтæ баиу кæныныл. Уый цæмæй къухы бафта, уый тыххæй уал хъуамæ ацы дыууæ ведомство сæ размæ æвæрд хæстæ сæххæст кæной. Уыдон та сты алыхуызон программæтæ æмæ проекттæ.

Хицауады разамынды зæрды ма ис бирæ комитетты министрадты дæлбарæй ракæнын, сæ бартæ хæдбарæй куыд æххæст кæной, афтæ.

Республикæйы Сæргълæууæг Сергей Меняйло куыд фæнысан кодта, афтæмæй ног разамынд хъуамæ уой рæстæджы аккаг. Ацы структурæйы архайдæй аразгæ уыдзæн Ирыстоны фидæн, уымæ гæсгæ  рæстæгыл бæрæггонд хъуамæ æрцæуой æппæт ведомствоты æххæстбартæ æмæ хæстæ.

 

ЦЫРТДЗÆВÆНТÆН – НОГ  ЦАРД

Республикæйы бындурон цалцæг цæуынц канд фæндæгтæ æмæ бæстыхæйттæ нæ, фæлæ ма цыртдзæвæнтæ, скульптурæтæ дæр. Æрæджы ног реставрацийы фæстæ байгом сты Колыты Аксойы, Сергей Кировы æмæ Ленины цыртытæ, стæй –  Намысы мемориалы барельеф. Цыртытæн сæхицæй дарддæр базылдысты сæ алфæмблаймæ дæр. Аксойы цыртæн раивтой йæ арка, йæ алыварс плиткæ æмæ гæрæн. Ахæм куыстытæ бакодтой иннæ рæтты дæр. Горæты уынгтæ рафидыдтой ноггонд скульптурæтæй. Специалисттæ куыд зæгъынц, афтæмæй реставраци æрцæудзысты республикæйы æппæт культурон-историон цыртдзæвæнтæ æмæ объекттæ.

 

СКЪОЛАТÆН – НОГ  АВТОБУСТÆ

Ацы бонты та республикæйы скъолаты автопарк фæхъæздыгдæр 17 автобусæй. Адон лæвæрд æрцæудзысты Дзæуджыхъæу, Горæтгæрон æмæ Æрыдоны районты цалдæр скъолайæн. Автобустæ республикæйæн лæвæрд цæуынц федералон программæ «Образование»-йы фæлгæтты, Уæрæсейы Президент Владимир Путины фæстауæрцон фондæй. Фæстаг цыппар азы ацы программæйы бындурыл Цæгат Ирыстонæн лæвæрд æрцыд 81 автобусы. Иннæ азы кæронмæ транспорт хъуамæ райсой æппæт скъолатæ дæр. Автобустæ ифтонг сты сывæллæтты æдасдзинадæн æппæт мадзæлттæй дæр.

 

                                                                                            Нæ  уацх.