Цæгат Ирыстоны

ХУЫЗДÆР  ДОХТЫРТÆН – КАД

Уæрæсейы регионтæн цы иумæйаг проект скодтой «Æнæниздзинад хъахъхъæнынады къабазы кусæндæттæ дæсны специалисттæй сифтонг кæнын», зæгъгæ, уый æнтыстджынæй цæуы республикæйы дæр. Йæ нысан у дохтырты кад æмæ фæлтæрддзинад фæуæлдæр кæнын.

Цæгат Ирыстоны Сæргълæууæг Битарты Вячеславы хъæппæрисæй царды уагъд æрцыд дыууæ проекты: «Земский доктор», æмæ «Лучший терапевт»,  «Лучший педиатр».

Фыццаг проекты нысан у хъæуты медицинон кадрты цухдзинæдтæ æххæст кæнын. Фондз азы хъæууон бынаты чи бакуса, уый райсдзæн фатер.

Дыккаг проект у конкурсы бындурыл. Куырдиæттæ балæвæрдтой фæндзайы бæрц медицинон кусæджы. Уыдон рацыдысты цалдæр фæлтæрæны теори æмæ практикæйæ. Сæ зонындзинæдтæ сын бæрæг кодта сæрмагонд къамис. Дæрддзæгмæ хуызы хъæлæс кодтой республикæйы цæрджытæ дæр. Конкурс цыди мæйы дæргъы æмæ, æппынфæстаг, рабæрæг сты хуыздæрты хуыздæртæ.

Номинаци «Участокы хуыздæр терапевт»-ыл нымад æрцыд Æрхонкæйы поликлиникæйы дохтыр Гæбуты Алисæ æмæ номинаци «Участокы хуыздæр педиатр»-ы уæлахиздзау та ссис Дзæуджыхъæуы 2-æм поликлиникæйы дохтыр Хуыгаты Мæдинæ.

Дыууæ уæлахиздзауы дæр Битарты Вячеславы къухтæй райстой фатерты дæгъæлтæ. Дыккаг æмæ æртыккаг бынаты уæлахиздзаутæ дæр хорзæхджын æрцыдысты сæрмагонд дипломтæ æмæ зæрдылдарæн лæвæрттæй.

Специалистты хъуыдымæ гæсгæ, уый хорз ахъаз у, цæмæй медицинон кусджытæ сæ дæсныйады къæпхæн фæуæлдæр кæнынмæ, фылдæр зонындзинæдтæ райсынмæ тырной.

                                                                *  *  *

Æрæджы Цæгат Ирыстоны ацыд республикæйы пысылмæтты 10-æм съезд. Архайдтой дзы республикæйы разамынд, стæй Цæгат Кавказы алы горæттæй Пысылмæтты духовон управлениты дины минæвæрттæ. Съезд арæзт æрцæуы æрвыл фондз азы. Ныр йæ сæйраг нысан уыд республикæйы Пысылмæтты духовон управленийæн ног муфтий равзарын. Уазджытæ æмæ фысымтæ æмхуызонæй рахæцыдысты Гуæцæлты Хадзымураты кандида-турæйы æвварс æмæ ногæй æвзæрзт æрцыд фондз азы æмгъуыдмæ управленийы муфтийæ. Ацы бынаты Хадзымурат бакуыста фондз азы.

   Битарты Вячеслав куыд загъта, афтæмæй Гуæцæлы-фырт стыр бавæрæн бахаста республикæйы сабырдзинадмæ.

                                                                                       Нæ  уацх.