Цæгат Ирыстоны

                    ÆРГЪТЫ  РÆЗТЫ  НЫХМÆ – МАДЗÆЛТТÆ

Нæ ирон æмбисæндтæ æцæгдæр сты цардæй ист. Зæгъæм: «Иутæ фæдисмæ, иннæтæ – къæбицмæ» хорз æвдисæн у нæ абоны уавæрæн. Æмæ æрмæст абоны нæ, фæлæ тынг арæх. Тыхст замантæ ныл куы скæны, иутæ сæ туг куы фæкалынц, сæ фыдызæхх куы фæхъахъхъæнынц, уæд иннæтæ та сæ хæдзæрттæм ссивынмæ фæвæййынц. Хæст дæр кæмæндæрты пайда кæй у, уый æмбæхсинаг нæу.

Афтæ у ныр дæр. Ацы æнæхайыры низ нæ æрдæгыл банцайын кодта. Адæм æй нал зонынц чердæм ма цы кæной, уый. Ацы тыхст уавæрæй чи цæмæй спайда кодта, уыдонæн се ппæты кой нæ кæндзынæн, фæлæ та хойраджы продукттæ уæлæмæ ныццавтой. Ахæм змæст рæстæджы бирæ æхца бакусæн кæй ис, уый хорз зонынц фæлхасгæнджытæ æмæ дзы цæуылнæ хъуамæ спайда кæной.  Дзæвгар фæзынаргъдæр сты социалон нысаниуæджы продукттæ: дзул, ссад, сæкæр, нæлхæ, зети, æхсыр, æйчытæ æмæ бирæ æндæртæ. Хъуыддаг уыйонг æрцыд æмæ Уæрæсейы Хицауады Сæрдар Михаил Мишустин федералон министрадтæн бафæдзæхста егъаудæр базарадон хызæгтимæ иумæ, цыбыр æмгъуыдмæ æргъты рæзты аххосæгтæ базонын æмæ сын гæрæнтæ сæвæрын.

Ацы бонты Уæрæсейы æппæт регионты, уыимæ Цæгат Ирыстоны дæр райдыдтой генералон прокуратурæты рейдтæ антимонополон службæтимæ иумæ, продуктты æнæбындур рæзты аххосæгтæ сбæрæг кæныны тыххæй.

  Республикæйы прокуратурæйæ куыд фæхъусын кодтой, афтæмæй карз ныхкъуырд ратдзысты адæмы тыхст уавæрæй чи пайда кæны, уыцы æдзæсгом базаргæнджытæн . Уыдон хъуамæ дзуапп раттой, æргъты рæзтæн цы аххосæгтæ ис, уый тыххæй æмæ æргътæ сæ раздæры æмвæзадмæ æркæной.

Æппæт регионты уыцы куыст куыд цæуы, уый бæрæг кæндзæн Уæрæсейы Хицауад æмæ прокуратурæ, стæй субъектты разамонджытæ. Уыцы куыстытæ хъуамæ конд фæуой 21 декабрмæ.  

ФÆЗЫНДЗÆН  НÆМ  МЫДЫКУЫСТГÆНÆГ КООПЕРАТИВ

Тагъд Алагиры фæзындзæн мыдыкуыстгæнæг кооператив «Горная пчелка».  Акционерон æхсæнад «Князь Святослав»-ы  коммерцион директор,  Роман Чубанецы зæрды ис, уым цы авд мыддарды зæхкусæг-фермерон хæдзарады ис, уыдон иумæ æрбаиу кæнын æмæ дзы стыр кооператив саразын. Ныртæккæ ацы чысыл хæдзарадтæ афæдзмæ дæттынц фондз тонны мыд, кооператив куы суа, уæд продукци дæттдзæн æппынкъаддæр дæс тонны мыды алыхуызон продукттæ. Уый стыр пайда æрхæсдзæн республикæйы бюджетæн, фæзындзæн бирæ кусæн бынæттæ.

«Кооператив саразгæйæ мах æппæтæй дæр сифтонг кæндзыстæм мыддарджыты. Республикæйы уæрæх фадæттæ ис ацы къабаз раразмæ кæнынæн. Ныридæгæн арæзт цæуы нæ продукцийы бренд, кæцы базарады нырыккон домæнтæн дзуапп дæтты», – загъта амалхъом.

Ахсджиагыл банымадта продукцийы бренд республикæйы Сæргълæууæг Битарты Вячеслав дæр. Куыд банысан кодта, афтæмæй Ирыстоны уагъд цы продукци цæуы, уыдоныл хъуамæ уа маркæтæ республикæйы номимæ, кæнæ хисæрмагонд бренд. Йæ ныхæстæм ма куыд бафтыдта, афтæмæй адæмæн пайда цы куыстуат дæтта, уый сырæзтæн кæддæриддæр æххуыс уыдзæн республикæйы бæджетæй грантты хуызы.

                                                                                    Нæ  уацх.