АБАЙТЫ ВАСО ÆМÆ ПЛИТЫ ГРИСЫ НОМЫЛ СТИПЕНДИТÆ

Цӕгат Ирыстоны Хицауад йӕ радон ӕмбырды сфидар кодта уынаффӕ, уымӕй уӕлдӕр ахуыргӕнӕндӕтты хуыздӕр студенттӕн саккаг кодтой Абайты Васо ӕмӕ Плиты Грисы номыл сӕрмагонд стипендитӕ.

Уыцы уынаффӕйы бындурыл Абайты Васойы номыл стипенди исдзысты ЦИПУ-йы ирон филологийы факультеты аспиранткӕ Бететы Фатимӕ, Гуманитарон ӕмӕ социалон иртасӕнты институты аспиранткӕ ӕлборты Тамарӕ, Плиты  Грисы номыл стипенди та саккаг кодтой Цӕгат Ирыстоны паддзахадон педагогон институты филологон факультеты дыккӕгӕм курсы студенткӕ Уырымты Мӕдинӕ ӕмӕ  ЦИПУ-йы ирон филологийы факультеты фӕндзӕм курсы студенткӕ Дзабиты Илонӕйӕн.

Абайты Васойы номыл стипендийы бӕрц у 8 мин сомы, Плиты Грисы номыл стипенди та -5 мин сомы.

БАЙГОМ КÆНДЗЫСТЫ АХУЫРАДОН КАФЕДРÆТÆ

Арæзтадон компаниты бындурыл Цæгат Ирыстоны байгом кæндзысты ахуырадон кафедрæтæ. Уый тыххæй фехъусын кодта республикæйы сæргълæууæг Битарты Вячеслав.

Уыцы хъуыддаг бахæс кодта вице-премьер Азымты Иринæ æмæ ахуырад æмæ зонады министр Людмила Башаринæйæн. Куыстуæтты материалон-техникон бындурыл æнцайгæйæ, спайда кæнын хъæудзæн æппæт гæнæнтæй дæр. Бæрнон кусджытæ бацæттæ кæндзысты фæндагон картæ. Уым бæрæггонд уыдзæн, техникумтӕ æмæ училищæты директорты арæзтадон фæзуæттæм кæд цæуын хъæудзæн, уый.

Ныртӕккӕ уал арæзтадон компани СТК-59-имæ бафыстой кафедрæ саразыны бадзырд. Студенттæн дзы фадат уыдзæн практикæ ацæуын æмæ сæ зонындзинæдтæ бынаты сфæлхат кæнын. Уый руаджы æрыгон специалисттæм фæзындзæн хъæугæ фæлтæрддзинад.

СÆ ХЪУС ДАРЫНЦ ЦÆРДЖЫТÆ МАСКÆТЫ ÆНÆМÆНГ ДАРЫНЫ ФÆТК КУЫД ÆХХÆСТ КÆНЫНЦ, УЫМÆ

Дзæуджыхъæуы пъолицæйæгтæ фæлхасгæнджытæм цæстдарды управленийы кусджытимæ иумӕ кæсынц, цæрджытæ маскæты æнæмæнг дарыны фæтк куыд æххæст кæнынц, уымæ.

Æххуыс сын кæнынц æхсæнадон архайджытæ дæр. Профилактикон акцийы фæлгæты адæмæн æмбарын кæнынц, маскæтæ дарын ахсджиаг цӕмӕн у, уый. Мидхъуыддæгты министрады минæвæрттæ федтой базарадон куыстуæтты информацион сыфтæ æмæ дезинфекцигæнæн фæрæзтæй ифтонгад. Цардархайды объектты вирус апарахат кæнын ма бауадзынæн Уæрæсейы фæлхасгæнджытæм цæстдарды управленийы кусджытæ дæттынц сæрмагонд амынддзинæдтæ, æхсæнадон бынæтты уарынц респиратортæ.

САРАЗДЗЫСТЫ 100 ВОЛЬЕРЫ

100 вольеры сараздзысты, Дзæуджыхъæуы сырдтæн цы бынат аразынц, уым. Арæзтадон куыстытæ ныртæккæ сæ тæмæны сты. Горæты администрацийы сæргълæууæг Фæрниаты Тамерлан ӕркаст, куыст куыд цæуы, уымӕ. Бæстыхайæн бынат рахай кодтой Дзæуджыхъæуы Рахизфарсы районы, йæ фæзуат у 1 гектарæй фылдæр.

Ныртæккæ лæгъз кæнынц фæзуат, сæрмагонд æрмæджытæ дзы æвгæнынц, техникæйы фæрцы.

Специалистты ныхæстæм гæсгæ, хæстæгдæр рæстæджы райдайдзысты вольертæ аразын æмæ мидæггаг фæз кæнын. Самайдзысты дзы дыууæ корпусы. Уыдзæн дзы административон агъуыстытæ, хæрæндон æмæ ветеринары пункт. Аразджытæ сæ куыст кæнынц нысангонд фæткмæ гæсгæ, иннæ азмæ дæр пълан кæнынц. Уыцы иу рæстæг дзы бынат хъуамæ уа 350 сырдæн.

Comments are closed, but trackbacks and pingbacks are open.