Цæгат Ирыстоны

Цæгат Ирыстоны Паддзахадон университеты   архайы ирайнаг культурон центр

Цæгат Ирыстоны Паддзахадон университеты 2014 азæй фæстæмæ кусы ирайнаг культурон центр. Йæ бындурыл ма гом æрцыдысты персайнаг æвзаджы курсытæ. Æрæджы ацы курсыты фæрцы студенттæн фæзынди фадат Иранмæ стажировкæ кæнынмæ ацæуын.

Ирайнаг культурæйы центр кусын райдыдта Ираны минæвар Уæрæсейы Мехди Санаийы хъæппæрисæй. Ныридæгæн Иранмæ иу æмæ дыууæ ахуырдзауы æрвыст не ‘рцыдысты.

Ныртæккæ историкон факультеты ис цалдæр хайады. Уыцы хайадты студенттæн сæ кæцыдæр хай цæуы ацы центры курсытæм. Стажировкæ кæнынмæ чи ацæуы, уыдон та райсынц бирæ ног зонындзинæдтæ. Æвзаг хуыздæр базонынц. Уыимæ ма, æнгомдæр базонгæ вæййынц Ираны культурæимæ. Абон æрмæст Цæгат Ирыстоны Паддзахадон университеты студенттæн нæ, фæлæ ма кæй фæнды, уыдонæн дæр ис фадат бацæуæн ацы курсытæм. Кусынц къуыри дыууæ хатты, сты лæвар.

Цæгат Ирыстон Сочийы равдисдзæн бальнеологийы райрæзтимæ баст проект

Сочийы Инвестицион форумы Цæгат Ирыстон равдисдзæн бальнеологийы райрæзтимæ баст проект. Специалисттæ рагагъоммæ сарæзтой минералон дæтты иртæстытæ.

Уæрæсейы инвестицион форуммæ республикæ бацæттæ кодта 34 проекты. Бальнеологийы райрæзтимæ баст проектæн ис хицæн концепци. Иртæстытæ саразынæн специалисттæ систой лабораторон хуызæгтæ. Уыдоны хатдзæгтæм гæсгæ сбæлвырд кæндзысты, санаторон-курортон бæстыхæйттæ кæм хуыздæр аразгæ сты, уый. Ныхас цæуы дзæбæх-гæнæн суадæтты цур инфраструктурæ саразыныл.

Цæгат Ирыстоны ахæм хуызы фæнд кæнынц санаторон туризмы райрæзтыл бакусын. Суадæттæн сæрмагонд иртæстытæ куы саразой, уæд уыцы донгуырæнты цур гæнæн ис æмæ фæзыной ног санаторон-курортон бæстыхæйттæ. Ахæм объектты арæзтадæн республикæйы хицауад агурдзæн инвесторты. Инвестицион форумы Сочийы уагъд цæудзæн 12-æй 14-æм  февралмæ.