Ӕвзонг техникты станц кусы ныр дзӕвгар азты ӕмӕ кӕддӕриддӕр ӕрыгон цымыдисгӕнӕг скъоладзауты хотыхджын кӕны сæрмагонд зонындзинӕдтӕй. Ам ис алыгъуызон къордтæ ӕмӕ ӕвзонг чызджытӕ ӕмӕ лӕппутӕ тынгдӕр цӕмӕ цымыдис кӕнынц, уый равзарынц.
Ацы уагдон 2008-ӕм азы августы хӕсты рӕстӕджы тынг бахъыгдард ӕмӕ дзы ахуыр кӕнынӕн нал уыд ӕмбӕлон уавӕртӕ. Фӕлӕ республикӕйы разамынад ӕркаст ацы фарстмӕ ӕмӕ дзы уый фӕстиуӕгӕн арӕзтадон-цалцӕггӕнӕн куыстытӕ конд ӕрцыд ӕмбӕлон ӕгъдауӕй. Ныр уырдӕм бахизгӕйӕ, адӕймаджы зӕрдӕ рухс кӕны йӕ райдзаст ӕмӕ хӕрзӕфснайд кусæн хатæнтæй, ифтонг сты хъӕрмадӕй дӕр.
Станцы директоры хӕстӕ ӕххӕстгӕнӕг Касаты Людӕ куыд радзырдта, уымӕ гӕсгӕ иууыл фылдӕр ахуыргӕнинӕгтӕ цӕуы ахӕм къордтæм, куыд арӕхстджын къухтӕ, электротехникӕ, хъӕдӕрмӕджы куыст, математикӕ ӕмӕ ӕндӕртӕм. Техникты станцы уыдзӕн ног къорд – хуыйны робототехникӕ. Ацы къорды сӕргъ лӕууы Плиты Инал ӕмӕ, дызӕрдыггаг нæу, ахуыргӕнинӕгтӕ ацы дӕсныйад кӕй уарздзысты ӕмӕ йыл цыбыр рӕстӕгмӕ кӕй фӕхӕст уыдзысты, ууыл. Раздӕры азты ам уыд радиоспорты къорд дӕр, фӕлӕ йӕ фӕлындзынад ныппырх хӕсты рӕстӕджы, ницыуал дзы баззад. Ныр нӕ зӕрды ис уый ногӕй сӕндидзын кӕнын. Уый тыххӕй кусынмӕ ӕрбахуыдтам, ацы хъуыддаг хорз чи зоны, ахӕм специалисты. Райдианы ахуыртӕн йӕхимӕ ис чысыл фӕлындзæнтæ дӕр ӕмӕ уал уыдонӕй пайда кӕндзӕн ахуыртӕ уадзгæйæ. Уый фӕстӕ йын сфӕрӕз кӕндзысты нырыккон ифтонггӕрзтӕ ӕмӕ уӕд ахуыртӕ дӕр цӕудзысты рӕвдздӕр. Скъоладзаутӕ тынг уарзынц хъӕдӕрмӕгыл алыгъуызон нывтӕ кӕнын, уый та фӕаразынц хъæдæрмæгыл судзгӕ хӕххыты фӕрцы. Ацы къорды сӕргъ лӕууы йӕ хъуыддаджы дӕсны Кокойты Светланӕ ӕмӕ сын ӕнӕвгъауӕй лæвар кæны йӕ зонындзинӕдтӕ. Къаддӕр цымыдис нӕ кӕнынц, хъӕдӕрмӕджы куыст чи бауарзта, уыдон дӕр, ӕмӕ уыцы къордтæм ӕрвылбон дӕр разӕнгардӕй фӕцӕуынц, уымӕн ӕмӕ сын арф зонындзинӕдтӕ дæттынц сӕ ахуыргӕнджытӕ Цхуырбаты Роланд ӕмӕ Табуты Георги. Уымӕй дарддӕр ма станцӕн къордтæ ис Дзауы астӕуккаг скъолайы дӕр, уыдон та сты хими ӕмӕ физикӕимæ баст. Цӕмӕй уыдон куыст ӕмбӕлон ӕгъдауӕй цӕуа, ууыл кӕддӕриддӕр тыхсы станцы разамынад ӕмӕ сӕ абӕрӕг кӕнынц, куы бахъӕуы, уӕд сын раттынц ӕмбӕлон амындтытӕ. Къордтæ сын ис Цхинвалы скъола-интернаты дӕр. Кӕй зӕгъын ӕй хъӕуы, ахӕмтæ хъуамӕ уаид Знауыр ӕмӕ Ленингоры районты дӕр, уымӕн ӕмӕ республикон станцыл нымад у, фӕлӕ сын нырма уыцы фадӕттӕ нӕй.
Ӕвзонг техникты станцы ахуыргӕнджытӕ æрæджы рацыдысты аттестаци ӕмӕ сын лӕвӕрд ӕрцыд уӕлдӕр категоритӕ. Уый уымӕн, ӕмӕ кусынц тынг рагӕй, сӕ куыст зонынц ӕмӕ сӕ бирӕ зонындзинӕдтӕ рӕдауӕй хæлар кæнынц ӕвзонг курдиӕттӕн.
Хуыбиаты Никъала
Comments are closed, but trackbacks and pingbacks are open.