Боныгъæд зонынæн адæмы царды раздæр азты дæр уыд стыр нысаниуæг æмæ йæ ахуыр кодтой алы æмæ алы уавæрты. Уый та сын фадат лæвæрдта се ‘рвылбонон хъуыддæгтæ рæстæгыл æмæ æнæкъуылымпыйæ бакæнынæн.
Уыцы зонæнтæй абоны онг дæр æрхæццæ дзæвгар æмæ махæн дæр фадат дæттынц уыдонæй пайда кæнынæн. Зæгъæм, цахæм боныгъæд уыдзæн æввахс рæстæджы, æппæт уыдонæн базонæн вæййы цахæмдæр миниуджытæм гæсгæ, базонæн ма сын ис, иуæй-иу зайæгойтæм нæ хъусдард лæмбынæг куы аздахæм, куы сæ сахуыр кæнæм, уæд. Цæвиттон, ленкоринаг акъацийы сыфтæртæ тæрккъæвдайы размæ райдайынц æнахуыр сыбар-сыбур, йæ сырхварс дидинтæ та æмпылын райдайынц. Бур акъацийы сыфтæртæ та ахæм рæстæджы изæрыгон тынг фæтæф кæнынц. Кæд æмæ уыдон хæрздæф сымах æнкъарат райсомӕй хурбоны, уæд æй зонут, уый йæ фæдыл кæй расайы тæрккъæвда. Мæгуырау боныгъæды размæ сирены тæф фæтынгдæр вæййы, сыгъзæрингъуыз хъæлæрдзы æмæ акъацийы нектар дæр вæй-йы дæвгар.
У сыгъдæг арв, иттæг хорз боны-гъæд, фæлæ æваст бæгъайы дидинтæ сæхи æрбалхъывтой, уый нысан кæны, æввахс рæстæ-джы кæй райдайдзæн къæвда уарын. Боныгъæд базонынæн ма æххуыс у уыгæрдæн дæр. Цæвит-тон, асæст боныгъæды размæ йæ сыфтæ æрбатухы уыгæр-дæны æртæсыфон, къаппа-къуп-па æмæ дзыккайы сыфтæ дæр сæ сыфтæ æрбангом кæнынц.
Уырынгонтæ, мæргътæ æмæ æхсырæйхæссæг цæрæгойтæ тынг æнкъарынц боныгъæды раив-баив. Цъæх цъырцъырæгтæ къæвдайы размæ изæры æруромынц сæ хъæлæба. Асæст боныгъæды размæ та фæхъуысы цъиусуры дæргъвæтин уаст. Тынг æнцонæй базонынц зæрватыччытæ боныгъæды аивд. Кæд æмæ уыдон сæ ахстæттæй атæхой æмæ ратæх-батæх кæной зæхмæ хæрз æввахс, уæд æнхъæлмæ кæсæн ис тæрккъæвдамæ. Уый бæлвырд кæнынц уымæй æмæ цы уырынгонты фæахсынц, уыдон стыхсынц уымæл уæлдæфæй æмæ сæхи æруадзынц бынмæ. Афтæ ма къæвдайы размæ кæсæгтæн дæр фæзыны физиологион ивындзинæдтæ, тынгдæр ныддымсы сæ ленкгæнæн мисындзæг. Зымæджы, æгæрыстæмæй уазал рæстæджы дæр мыст банкъары, иу суткæйы фæстæ кæй ралæудзысты хъарм бонтæ æмæ уæд хъæды хъарм лыстæнæй рахизы миты уæлцъармæ. Карз зымæджы æрцыдмæ тыртына йæ ахстон аразы бæласы бындæр ран æмæ хъарм бонты размæ та – бæрзонддæр бынаты. Æнахуыр сæхи равдисынц уадтымыгъты цæгаттаг æмæ иннæ сагтæ дæр. Мæгуырау боныгъæдты иу суткæ раздæр æнæ исты аххосагæй фæкæнынц цыбыр цæугæцард.
Зымæгон боны фос кæвдæсы зыдæй куы хæрой, уæд æнхъæлмæ кæс æвзæр боныгъæдмæ. Кæрчытæ сæхи сæ бырынчъытæй куы къахой, уæд рауардзæн къæвда. Кæрдæгыл æртæх куы вæййы, уæд æнæ къæвда ахæссы. Зымæг пецы сугтæ тынг куы судзой, уæд хъызт вæййы.
Æрмæг бацæттæ кодта ХУЫБИАТЫ Никъала
Comments are closed, but trackbacks and pingbacks are open.