Бибылты Анатоли æмæ Рашид Нургалиев ауагътой æмбырд Республикæ Хуссар Ирыстоны æдасдзинад æмæ социалон-экономикон рæзтимæ баст уæрæх фарстаты фæдыл.
УФ-йы Æдасдзины советы сæрдары хæдивæг республикæмæ æрцыд æртæ-бонон æхсæнведомствæйон балцы. Цы делегацийы сæргъ лæууы, уый сконды сты Цæгат Кавказы хъуыддæгты фæдыл министрады, Уæлвæткон уавæрты министрады, транспорты министрады, энергетикæйы министрады, хъæууон хæдзарады министрады, Россельхознадзоры, Бæрзонд медицинон технологиты федералон клиникон центры минæвæрттæ.
Афтæ ма æмбырды хайад райстой РХИ-йы министрадтæ æмæ ведомствоты разамонджытæ дæр.
Бибылты Анатоли бузныг загъта Рашид Нургалиев æмæ УФ-йы Æдасдзинады советæн Хуссар Ирыстонмæ сæ хъусдарды æмæ республикæйы æппæтварсон æдасдзинад ифтонг кæнынмæ сæ тырнындзинады тыххæй. Уый банысан кодта, зæгъгæ, цы фарстыл хъуамæ æруынаффæ кæнæм, уыдон иттæг ахсджиаг сты республикæйæн.
“Уыдон арæзт æрцыдысты, Владимир Путинимæ мæ фембæлды рæстæджы цы хъуыдытæ загътон, æмæ уый фæстæ Уæрæсейы Федерацийы Президент цы хæслæвæрдтæ радта, уыдонмæ гæсгæ. Мæ хъуыдымæ гæсгæ, ацы фарстатæ ныри-дæгæн сты скъуыддзаг кæныны стадийы. Уыдон сты энергетикæйы, инфраструктурæйы, фæндæгты хызæджы æдасдзинад, Транскамы архайд. Ацы фарстатæ скъуыддзаг кæнын ахъаз кæндзæн адæмы сæ сомбоныл æууæндынæн æмæ Республикæ Хуссар Ирыстоны рæзтæн», – загъта Бибылты Анатоли.
Рашид Нургалиевы ныхæстæм гæсгæ кусæг къорд Хуссар Ирыстоны кусдзæн дыууæ здæхты – тыхон æмæ социалон-экономикон.
«Нæ куысты хайад исынц нæ сæйрагдæр ведомствоты минæвæрттæ. Командировкæйы фæлгæтты мах план кæнæм, ды, Анатоли Ильяйы фырт, Мæскуыйы уæвгæйæ, УФ-йы Президентмæ цы фарстаты фæдыл бахатыдтæ æмæ уыдоны тыххæй цы хæслæвæрдтæ радта, уыцы фарстаты фæдыл æхсæнведомствæйон архайдмæ æркæсын», – банысан кодта Нургалиев.
Уый куыд загъта, афтæмæй Цхинвалмæ цæугæйæ дæр развæлгъау федтой Транскамы тæссаг фадгуытæ.
«Мах федтам фæндаджы тæссаг фад-гуытæ, цыран аразын хъæуы зæйты ныхмæ галерейтæ. Мах хъуыды кæнæм 16-бонон митзæйты блокадæ æмæ æмбарæм, гæнæн кæй уыд æмæ æрцыдаиккой республикæйы æдасдзинадимæ баст серьезон процесстæ. Транскам у, Хуссар Ирыстон æмæ Уæрæсейы чи бæтты, иунæг ахæм транспортон артери. Ацы азы боныгъæдтæ ноджыдæр сбæрæг кодтой, æдас ыл кæй нæу цæуынæн æмæ проблемæйы кæй хъæуы скъуыддзаг кæнын. Нæ куысты фæстиуджытæм гæсгæ Уæрæсейы транспорты министрад бакусдзæн мадзæлтты комплексыл Транскамы æнæкъуылымпы архайд дыууæфарсæрды-гæй дæр сифтонг кæныны фæдыл, уыдоны нымæцы – зæйты ныхмæ галерейтæ æмæ тъунелтæ саразын дæр», – фехъусын кодта Нургалиев.
Уый ма афтæ радзырдта, энергетикæйы министрадимæ кæй сахуырчындæуыд Ручъы тъунелыл бæрзондвольтон электроадæттæн хаххы кабель ауадзыны фадат.
«Абоны бонмæ профессионалон æгъдауæй аргъ æрцыд, цæмæй Республикæ Хуссар Ирыстон уæлвæткон уавæрты æнæкъуылымпыйæ ифтонг цæуа электроэнергийæ. Ацы куыст дæр æххæст цæуы Уæрæсейы Федерацийы Президенты бацамындтыты фæлгæтты», – загъта Нургалиев.
Уый ма фæндон бахаста, цæмæй æр-кастæуа Зонкъары донæмбырдгæнæнæй спайда кæныны варианттæм.
«Зонкъары донæмбырдгæнæн нæм æвзæрын кæны стыр цымыдис, уæл-дайдæр та – энергетиктæм, уыдон куыд дзурынц, афтæмæй йыл чысыл гидроэлектростанц арæзт куы æрцæуа, уæд дæтдзæн æрмæстдæр 6 мВт «электроэнерги», – загъта Æдасдзинады советы секретары хæдивæг.
Куыд ма загъта, афтæмæй æхсæн-ведомствæйон къорды минæвæрттæ сахуыр кæндзысты Хуссар Ирыстоны арæнгæрон районты медицинон ифтонгады, афтæ ма эпидемиологон тасдзинæдты ныхмæ архайды фарстатæ.
Рабадты уынаффæ цыдис хъæууон хæдзарады рæзты фарстатыл дæр. Бибылты Анатолийы ныхæстæм гæсгæ иу-уыл ахсджиагдæр фарстатæй сæ иу раздæрау у Ленингоры районы Цъинагары зонæйы донæй сифтонг кæнын.
«Ахсджиаг фарст у Абреу, Орчъосан æмæ Цъинагары хъæуты сæрмæ донæмбырдгæнæн саразын. Гуырдзыстон Тирипоны къанау кæй сæхгæдта æмæ ацы хъæутæм дон кæй нал уадзынц, уымæ гæсгæ æнæмæнгхъæуæг у донхæр кæнынæн резервуар саразын. Уым сты иууыл хуыздæр зæххытæ, цæрджытæ та – куыстуарзаг. Уымæ гæсгæ курæг дæн, цæмæй бынаты специалисттæ феной, саргъ кæной æмæ сæ рекомендацитæ радтой», – загъта Президент.
Рабадты хайадисджытæ æруынаффæ кодтой РХИ æмæ УФ-йы тыхон структурæты æмархайды фарстатыл дæр.
Рашид Нургалиев куыд банысан кодта, афтæмæй æхсæнведомствæйон къорд ацы здæхты архайы УФ-йы Æдасдзинады советы аппарат æмæ РХИ-йы Æдасдзинады советы аппараты ‘хсæн къухтæ фыст кæуыл æрцыд, уыцы æмгуыстады планы фæлгæтты. «Йæ хæс у Æмгуыстад æмæ интеграцийы фæдыл Бадзырды фæлгæтты сразыдзинæдтæ реализаци кæнын. Уый хауы Мидхъуыддæгты министрады Информацион-координацион центры куыстмæ, материалон-техникон базæ хуыздæр кæнынимæ бастуæвæг хæрдзтæ финанс кæнынимæ, Мидхъуыддæгты министрады кусджыты социалон гарантитæм. Уый хауы Хъахъхъæнынады министрадмæ дæр, хицæн дæлхæйтты Уæрæсейы Федерацийы Гарзджын тыхты скондмæ бацæуыны фæтк, техникон ифтонгад æмæ æфсæддон службæгæнджыты куыстмыздмæ», – банысан кодта Нургалиев.
Comments are closed, but trackbacks and pingbacks are open.