БОКС

Ирон боксер Гасситы Мурат та ногæй рахиздзæн рингмæ. 26-æм августы уый хайад райсдзæн Боксы æхсæнадæмон боны цытæн  Сербийы уагъдцæуæг боксы изæры. Æхсæнадæмон боксы федерации ( IBF)  æмæ æппæтдунеон боксы ассоциацийы (WBA) верситæм гæсгæ раздæры дунеон чемпионы ныхмæлæууæг уыдзæн 42-аздзыд америкæйаг боксер Карлуз Уэлч. Турниры организатортæ сты проумотерон компанитæ «Уралбокспромоушн» æмæ «Патриот», афтæ ма Уæрæсе æмæ Сербийы боксы федерацитæ.

«Æнæрхъæцæй æнхъæлмæ кæсын ацы тохмæ. Æрæмысыдтæн профессионалон ринг. Хъыгагæн, травмæйы аххосæй мæ бон не ссис 2021 азы декабры мæйы Сочийы украинæйаг Андреем Руденкойы ныхмæ рахизын. Мæ ног ныхмæлæууæг хорз боксер у, ис ын тыхджын цæф. Мæ сæйраг хæс у тохмæ мæхи хорз бацæттæ кæнын», – банысан кодта Гасситы Мурат.

Йæ комментаритæ загъта Мураты тренер Сланты Витали дæр.

«Нæ тренировкæтæ сты сæ тæмæны. Фыццаг этапы иу мæйы бæрц Кисловодскы куыстам иумæйаг физикон цæттæдзинадыл. Ныр тренировкæтæ кæнæм Дзæуджыхъæуы. 30 июль кæнæ 1-æм августы атæхдзыстæм Сербимæ, цыран кæндзыстæм спаррингон куыст. Ныфс нын бавæрдтой дзæбæх спарринг-партнертæй, сæ нæмттæ сын развæлгъау барæй нæ дзурын. Æнæ уыдон зын уыдзæн Мураты бацæттæ кæнын. Нæ хæс у тохтæм хизын æмæ уæззау уæзы дунейы чемпион суæвын», – фехъусын кодта Сланты Витали.

СПОРТИВОН ЕРЫСТÆ – ФИЗКУЛЬТУРОНЫ БОНЫ ЦЫТÆН

Традицион ссис æрвылаз дæр Дзауы поселочы Физкультуроны бон нысан кæнын. Уый цытæн уагъд фæцæуынц алыгъуызон спортивон ерыстæ. Ныр та уагъд æрцыд турнир футболæй. Хайад дзы райстой 7 командæйы.

«Физкультуроны бон нысангонд фæцæуы августы дыккаг æмбисы. Фæлæ ныр сфæнд кодтам ацы бæрæгбон раздæр банысан кæнын. Цæмæй дзы хайад райсой нæ районæй Уæрæсейы уæлдæр ахуыргæнæндæтты чи ахуыр кæны, уыдон дæр, кæцытæ æрцыдысты каникулты. Хъыгагæн, ацы аз турниры хайад нал райстой уæрæсейаг æфсæддонтæ, бирæтæ сæ Уæкраинæйы сæрмагонд æфсæддон операцийы хайад кæй исынц, уый фæстиуæгæн», – фехъусын кодта Дзауы районы администрацийы спорты хайады сæргълæууæг Джиоты Алик.

Ерысты æвзарæн хъæзтытæ акæныны фæстæ финалмæ ахызтысты командæтæ «Уыцы фарс» æмæ «Дзау». Хуыздæр ахъазыдысты «Дзауы» футболисттæ, бантыст сын 5:1 хыгъдæй рамбулын æмæ систы турниры сæйраг призы хицæуттæ. Командæ «Уыцы фарс» та ацыд дыккаг бынатыл. Ерысты бронзæйон призертæ та систы командæ «Леуахи»-йы футболисттæ.

Турниры бæрæг æрцыдысты хуыздæр хъазджытæ дæр. Сæрмагонд призтæй хорзæхджын æрцыдысты кулдуаргæс Джиоты Денис («Дзау»), хъахъхъæнæг Гасситы Сæрмæт («Дзау»), æрдæгхъахъхъæнæг Тыджыты Алан («Уыцы фарс»), размæбырсæг Санахъоты Артур («Леуахи») æмæ хуыздæр бомбардир Санахъоты Сослан («Леуахи»). Турниры иууыл хуыздæр хъазæгыл та нымад æрцыд «Уыцы фарс»-ы футболист Цомайты Марат.

  ХУРИТЫ Батрадз