Мæскуыйы профессионалон боксы изæры сæйраг тохы ирон спортсмен Чилæхсаты Георги фæуæлахиз Карен Маргаряныл. Георги йæ ныхмæлæууæджы рамбылдта 5-æм раунды нокаутæй. 28-аздзыд ирон боксер йæ профессионалон карьерæйы рамбылдта 21 тохы, уый дыууæ хатты фæхæрд æмæ иу тох та фæцис æмдыхæй.
Мæскуыйы спортивон кад хъахъхъæнæг Карен Маргарян та фæхæрд фыццаг хатт.
ГОМ ЧЕМПИОНАТ
Цæгат Ирыстоны уагъд æрцыд паддзахадон хæххон-аграрон уæниверситеты студентты ‘хсæн факультетон гом чемпионат уæгъдибар хъæбысхæстæй. Ерыстæ уагъд цыдысты дыууæ хатты Олимпион чемпион Андиаты Сосланы рухс ном ссарыны тыххæй. Хайад сæ истой æрмæст паддзахадон хæххон-аграрон университеты студенттæ нæ, фæлæ ма РЦИ-Аланийы æндæр ахуыргæнæндæтты минæвæрттæ дæр. Чемпионаты 97 кг уæзы категорийы аккаг ныхмæлæууæг нæ разынд цхинвайлаг Зассеты Арсæмæгæн. Уый финалы рамбылдта Цæгат Ирыстоны пад-дзахадон университеты студент Таугазты Ирбегы. Арсæмæг йæхæдæг та ахуыр кæны паддзахадон хæххон-аграрон университеты автомобилон факультеты. Зассейы фырты тренер у Коцты Тамерлан.
АРМСПОРТ
Ныр æртыккаг хатт цхинвайлаг Бететы Алан армспортæй ссис гарзджын тыхты Кубокы уæ-лахиздзау. Ерыстæ æрвылаз дæр уагъд фæцæуынц Санкт-Петербурджы. Алан уый размæ ерысты уæлахиздзау ссис 2018 æмæ 2019 азты. Ныр дæр та архайдта 100 кг уæзы категорийы æмæ та йын аккаг ныхмæлæууæг нæ разынд дыууæ къухæй хæцгæйæ дæр. Банысан кæнын хъæуы уый, æмæ ма Алан кæй кусы армрестлингы секцийы тренерæй дæр. Уый спорты ацы хуызæй цæттæ кæны рæзгæ фæлтæры.
Хуссар Ирыстоны иннæ минæвар, Санкт-Петербурджы Михайловскы æфсæддон артиллерион академийы студент Плиты Батрадз та ацы ерысты бацахста дыккаг бынат.
ХУРИТЫ Батрадз
Comments are closed, but trackbacks and pingbacks are open.