РХИ-йы Президент Бибылты Анатоли хайад райста Уæлвæткон æмæ æххæстбарджын минæвар Виталий Чуркины ном æрымысыны сæраппонд дунеон конференцийы.
Конференци уагъд æрцыд Уæрæсейы фæсарæйнаг хъуыддæгты министрады Дипломатон академийы. Хайад дзы райстой УФ-йы фæсарæйнаг хъуыддæгты министр Сергей Лавров, Уæрæсейы РХИ-йы Уæлвæткон æмæ æххæстбарджын минæвар Гасситы Знауыр, дунеон хъуыддæгты фæдыл Уæрæсейы Федерацийы Федералон Æмбырды Паддзахадон Думæйы комитеты сæрдар Леонид Слуцкий, фæсарæйнаг хъуыддæгты министрады Дипломатон академийы ректоры хæстæ æххæстгæнæг Михаил Троянский.
Сергей Лавров йæ раныхасы Виталий Чуркины схуыдта зынгæ дипломат, уæлдæр къласы профессионал.
«Йæ профессионалон миниуджытæ йын фадат лæвæрдтой Уæрæсейы приоритеттæ размæ кæнынæн, уыцы иурæстæджы йын ахъаз кодтой уæрæх дунеон партнерондзинад тыхджындæр кæнынæн. Æнæфау репутацийы хицау уæвгæйæ, Виталий Иваны фыртæн кад кодтой йæ фæсарæйнаг коллегæтæ сæ политикон цæстæнгасмæ нæ кæсгæйæ, хуыдтой йæ «дипломатийы маэстро», – банысан колдта Сергей Лавров.
Бибылты Анатоли йæ раныхасы зæрдыл æрлæууын кодта Хуссар Ирыстонæн уæззау историон дуджы Виталий Чуркины архайды нысаниуæджы тыххæй. «2008 азы августы ИНО-йы Æдасдзинады советы йæ оппоненты уайдзæфтæн, Виталий Иваны фырты реакци уыд арф аргументацигонд, йæ оппоненттæн сæ бон нæ уыд уæрæсейаг позици ма банкъардтаиккой, кæцы бындуриуæг кодта фидар юридикон бындурыл. Рæстдзинады тыххæй уæрæсейаг дипломаты ныхæстæ æмæ Уæрæсейы фидар позици ныфс лæвæрдтой, зæгъгæ, агрессоры архайдтытæн дуне карз аргъ скæндзæн æмæ тугкалдæн æрцæудзæн кæрон», – загъта Бибылты Анатоли.
Президент радзырдта конференцийы хайадисджытæн, зæгъгæ, «тохгæнæг Цхинвалыл бомбæтæ калыны æмæ æхстытæй æхстыты ‘хсæн адæм фæлвæрдтой Хуссар Ирыстонæн æддейæ цы цæуы, Мæскуы æмæ дунейæн цы ахаст ис гуырдзиаг агрессимæ, уый базоныныл». «Хуссар Ирыстонмæ хъуыстысты ИНО-йы Æдасдзинады советы цæуæг хъусынгæинæтæ дæр. Нæ адæммæ афтæ каст, цымаЧуркин дзырдта сæ номæй. Минæвар Чуркины дипломатон уæлахизæн Хуссар Ирыстоны стыр нысаниуæг кæй радтой, ууыл дзурæг у уый дæр, æмæ уый кæй у РХИ-йы уæлдæр хорзæх – Уацамонгæйы ордены кавалер. Ацы хорзæх лæвæрд цæуы тохты рæстæджы равдисгæ стыр сгуыхтдзинæдты, хъайтардзинад æмæ ныфсхастдзинады тыххæй», – банысан кодта йæ раныхасы Бибылты Анатоли.
Хуссар Ирыстоны Президент раарфæ кодта конференцийы организатортæн сæ хорз инициативæйы тыххæй, йæ хайадисджытæн та йæ бафæндыд æнтыстджын куыст.
Comments are closed, but trackbacks and pingbacks are open.