Президент Бибылты Анатоли æмбырд ауагъта 2020 азæн Республикæ Хуссар Ирыстоны социалон-экономикон рæзтæн ахъазгæнæг Инвестицион программæ реализаци кæныны фарстыты фæдыл оперативон штабы. Йæ куысты хайад райстой Хицауады Сæрдары хæстæ æххæстгæнæг Бекъойты Геннади, Финансты министры хæстæ æххæстгæнæг Хæбæлаты Азæ, Арæзтад, архитектурæ æмæ цæрæнуатон-коммуналон хæдзарады министры хæстæ æххæстгæнæг Зæгъойты Эдуард, афтæ ма æндæр æмæ æндæр ведомствотæ æмæ подрядон организациты къухдариуæггæнджытæ.

Рабадты райдианы Хæбæлаты Азæ радзырдта, Инвестпрогарамæйæн йæ финансон хай куыд æххæст цæуы, уый тыххæй. Йæ ныхæстæм гæсгæ абоны бонмæ хардз æрцыдис Инвестицион программæ реализаци кæнынæн снысангонд суммæйæн йæ 75 проценты.

Фактон æгъдауæй объектты арæзтад куыд æххæст цæуы, уый тыххæй та фехъусын кодта Зæгъойты Эдуард. Йæ дæлбар министрады зонæнтæм гæсгæ сæххæстгонд куыстыты гуырахст у 90 проценты.

Рабадты хайадисджытæ æруынаффæ кодтой, Инвестпрограммæйы фæлгæтты реализаци чи цæуынц, уыцы объектты арæзтады темпты тыххæй дæр. Цæвиттон, дзырд цыдис Гуфта-Къуайсайы автомобилон фæндаджы, Цхинвалы уынгты, Уанат-Цхинвалы магистралон донуадзæны, хъæбæрцардуагон брæтты паддзахадон резервон бæстыхайы арæзтадыл.

Президент банысан кодта, зæгъгæ, æппæт ацы объекттæн документацитæ бацæттæ кæнын хъæуы тагъдыл. Уый æрсидт контролгæнæг организацатæм, цæмæй æппæт документтыл дæр бакусой, цас гæнæн ис, афтæ тагъддæр.

«Мах хæсджын стæм, цæмæй фенын кæнæм фæстиуæг. Къуырийы кæронмæ æппæт объектты фæдыл дæр æппæт финансон документаци бавдыст хъуамæ æрцæуа», – банысан кодта паддзахады сæргълæууæг.

Нæ уацх.

Comments are closed, but trackbacks and pingbacks are open.