1906 азы 23 июлы 111 азы размæ рацыд фыццаг «Ирон газет»-ы фыццаг номыр. Уый нысанæн 1996 азæй фæстæмæ Хуссар Ирыстоны нысан цæуы национ информацион фæрæзты бон. Ацы аз дæр та цытджын уавæрты нысан æрцыд киноконцертон зал «Чермен»-ы. Хайад дзы райстой Республикæ Хуссар Ирыстоны Президент Бибылты Анатоли, Хицауады Сæрдар Пухаты Эрик, Хуссар Ирыстоны УФ-йы Æххæстбарджын минæвар Мурат Кулахметов, Хицауады уæнгтæ, информацион фæрæзты алы фадыджы кусджытæ.
Хуссар Ирыстоны Информаци æмæ мыхуыры паддзахадон комитеты сæрдар Хъотайты Мария йæ арфæйы ныхасы радзырдта ацы бæрæгбоны историйыл. Дарддæр банысан кодта, зæгъгæ, абон Хуссар Ирыстоны информацион фæрæзты минæвæрттæ архайынц рæстæгимæ æмдзу кæныныл. Паддзахадон газеттæ, журнал, сайттæ, телеуынынадæй дарддæр алы уагдонæн, партитæн фæзынд сæхи сайттæ æмæ газеттæ. Бирæ адæм информаци агурынц социалон хызæгты. Фæлæ рæстæгæй-рæстæгмæ информаци парахат кæныны фæдыл технологитæ куыдфæнды ма ивой, уæддæр æнæивгæйæ баззайдзæн журналисты куыст. Уымæн æмæ йæ нæ зоны, цахæм уыдзæн йæ сомы кусгæ бон.
«Цæмæй газеткæсæг кæнæ телеуынынадмæ кæсæг объективон информаци иса, уый тыххæй журналист хъуамæ принципиалон уа. Нæ куысты, мацы дзурын æмæ исты пайдадзинад ахадгæ не сты. Уый нæ, фæлæ иууыл та тæссагдæр темæтæ рæгъмæ хæссынц журналисттæ. Уымæ гæсгæ Уæрæсейы, фæсарæнты æмæ, æгæрыстæмæй, Кавказы регионты журналистты, репортерты куыст у иуыл тæссагдæр», – банысан кодта уый.
Марияйы ныхæстæм гæсгæ журналист хатт йæ алы ныхасæй дæр фæархайы æууæнкдзинад раздахын. Йæ ныхасы кæрон информацион фæрæзтæн йæ цæст бауарзта, цæмæй кæдфæндыдæр уой объективон æмæ принципиалон, хорз, ног хабæрттæ æмæ æвæрццаг хъуыддæгтæ рæгъмæ хæссой.
Цытджын æмбырды Республикæ Хуссар Ирыстоны Президент Бибылты Анатоли йæ раныхасы информацион фæрæзты куыст банымадта уæздан æмæ уæзгæ хъуыддагыл. Сымах, зæгъгæ, нæ тæрсут проблемæтæ æвдисынæй, сымах стут нæ республикæйы рæзт æмæ уæвынады истори æвдисджытæ.
«Кæй зæгъын æй хъæуы, уыд проблемæтæ, информацион блокадæ, фæлæ уæ æмархайд цæгатирыстойнаг коллегæтимæ – Тæболты Сергейы бинонтимæ айгæрстат информацион блокадæ. Мах æвдисæн стæм куыд æнгомæй куыстой нæ ветерантæ-журналисттæ», – дзырдта Президент. Банысан кодта, Комитеты алы рæстæджыты йын чи къухдариуæг кодта, уыдон уæззау æмæ егъау куыст бæстæйы хæрзæбон æмæ размæ-цыдæн.
Журналистты плеядæйæ, зæгъгæ, ныры фæлтæры журналисттæ исынц хорз дæнцæг.
«Æз афтæ нымайын æмæ журналистæн хъуамæ уа хъуыдыкæнынады сæрибардзинад, сфæлдыстадон сæрибардзинад, хисæрмагонд æмæ мидсæрибарзинад. Æнæ ацы æууæлтæй журналист æххæстæй нæ бакусдзæн, цы æрмæг ын у цымыдисон, ууыл.
Æмæ ма ноджы иу: паддзахады сæргълæууæгæн, министрæн æнæмбæлон фарстатæ ма хъуамæ уа, кæд æмæ адæймаг кусы, архайы паддзахадон уагдоны, уæд. Бибылты Анатоли æрсидт информацион фæрæзтæм – газетты, телеуынынады, сайттыл кусджытæм, цæмæй рæгъмæ хæссой бæстæйы проблемон фарстытæ.
«Мах стæм журналисты нысанмæздæхт, æмбаргæ позицийы фарс иу кæнæ иннæ проблемæмæ ахасты. Сымах æххуыс кæнут, иу кæнæ иннæ бынаты адæймаг цы нæ уыны, уый фенынæн», – дзырдта бæстæйы сæргълæууæг.
Бибылты Анатоли ма дзырдта, зæгъгæ, журналисты куыстæн аргъ ис. Ууыл дзурæг у уый, æмæ дзы бирæтæ кæй сты хорзæхджын паддзахадон хорзæхтæй. Хуссар Ирыстоны къухдариуæгады ‘рдыгæй информацийы фæрæзтæн уыдзæн уавæртæ, цæмæй рæзой æмæ æмбæлон æмвæзадыл уа сæ куыст. Ноджыдæр сын йæ цæст бауарзта фидар æнæниздзинад, профессионалон æнтыстытæ æмæ хорз, хæларадон æмæ хъуыддагон æрмæджытæ.
Национ политикæ, культурæ, ахуырад, зонад, религи æмæ дзыллон информацийы фæрæзты фæдыл парламентон комитеты сæрдар Гæбæраты Юри хорз зонгæ у ацы фадыджы куыстимæ. Уый йæ ныхас райдыдта уымæй, зæгъгæ, йын ацы бæрæгбон уæлдай æхсызгон у.
«Ацы бæрæгбон раздæр куыд нысан цыд, ууыл нæ цæст куы ахæссæм, уæд, куы цины, куы хъыджы æнкъарæнтæй байдзаг вæййæм. Хъыджы уымæн æмæ нæм цы не ‘мбæлд, ахæм бирæ хъизæмæрттæ бавзæрстам. Цины та уымæн, æмæ сыл фæтых стæм æмæ уæлахизæй рацыдыстæм», – дзырдта Юри.
Дарддæр зæрдыл æрлæууын кодта ацы бæрæгбон нысан кæныны истори. Ацы бæрæг-бон, зæгъгæ, бирæ фæлтæртæ æрхастой махæн æмæ нæ фарсмæ чи нал ис, уыдонæн сæ ном арынæй мах кад кæндзыстæм нæхицæн. Нæ ирон дзырды фарн, нæ ирон мыхуыр, зæгъгæ, уадз, размæ цæуæд æмæ нæ Ирыстоны зæххыл иунæг æвзæр хабар фыссын æмæ æвдисыны сæр дæр макуы уал бахъæуæд.
Цытджын æмбырды Президент Бибылты Анатоли Паддзахады бæрзонд хорзæхтæй, Кады грамотæтæй схорзæхджын кодта республикæйы дзыллон информацийы фæрæзты иуæй-иу куысджыты.
Бæрæгбонон мадзал адарддæр хиирхæфсæн концертæй.
***
Информаци æмæ мыхуыры фæрæзты къорд кусджытæ ма бæрæгбонон хорзæхтæ райстой Республикæйы Хъахъхъæнынады министры хæстæ æххæстгæнæг Гассеты Ибра-гимы бардзырдмæ гæсгæ. Хорзæхтæ цытджын æгъдауæй балæвар кодта министры хæдивæг Æлборты Игорь.
Къæбулты М.
Comments are closed, but trackbacks and pingbacks are open.