Хуссар Ирыстоны Президент Бибылты Анатоли хайад райста Кæсæг-Балхъары æмæ Уæрæсейы адæмы иудзинадыл 460 азы сæххæсты бæрæгбоны.

«Цыппар æнусы æмæ æрдæджы размæ Кæсæг-Балхъары адæм сарæзтой цæдис Уæрæсейы паддзахадимæ. Кæсæг-Балхъары адæм цы фæндаг равзæрстой 1557-æм азы, уый цалдæр æнусы дæргъы разæнгард кодта Кавказы бирæ адæмты, æмæ сын ахъаз уыди Уæ-рæсейы ‘рдæм се ‘ргомаздахынæн», – загъта Бибылты Анатоли, Налцыччы цытджын æмбырды ныхасы рацæугæйæ.

Уый банысан кодта, зæгъгæ, æхсæннацион разыдзинад, райгуырæн зæхмæ уарзондзинад, уыдонмæ ма бафтау республикæйæн хъомысджын федеративон субъекты статус кæй дæтты, уыцы фадæттæ, æмæ уыдон систы  КБР-йы æнтысты æмæ размæцыды фæрæзтæ.

Бибылты Анатоли æрымысыд, зæгъгæ «Ирыстоны æмæ Кæсæг-Балхъары адæм баст сты хæлар æмæ æфсымæрдзинады ахастытæй. Уыдонæн æвдисæн у нæ бирæ æгъдæутты, культурæйы, эпикон бынты æнгæсдзинад».

Хуссар Ирыстоны Президент ма банысан кодта, КБР-йы бæрæгбонон мадзæлттæ кæй аргъæвтой Беслæны трагедийы амæттæгты рухс нæмттæ мысæн боны æмзæрдæдзинады нысанæн.

«Уымæн нæй ферохгæнæн. Ахæм амалæй гуырынц æцæг æфсымæрдзинады æнкъарæнтæ», – банысан кодта уый.

Бибылты Анатоли йæ раныхасы банысан кодта, Кæсæг-Балхъары æмæ Хуссар Ирыстоны æхсæн стыр æмгуыстады хъомыс экономикон æмæ культурон бастдзинæдты рæзтæн стыр фадæттæ кæй ис, уый.

КБР-йы бæрæгбонон мадзæлтты хайад райста Уæрæсейы Федерацийы Федерацийы Советы Сæрдар Валентинæ Матвиенко, Цæгат-Кавказы Федералон зылды Уæрæсейы Федерацийы Перзиденты Æххæстбарджын минæвар Олег Белавенцев, Республикæ Абхазы Президет Рауль Хаджимба, Республикæ Цæгат Ирыстон-Аланийы Сæргълæууæг Битарты Вячеслав æмæ УФ-йы æндæр субъектты сæргълæуджытæ.

Уазджытæ ма федтой хъæууонхæдаарадон равдыст, фæуазæг сты ног перинаталон центрмæ, ныхас кодтой Сабиты сфæлдыстады академийы хъомылгæнинæгтимæ.

Comments are closed, but trackbacks and pingbacks are open.