27 майы нæ горæты Мамсырайы фырты уынджы Централон библиотекæйы кусджытæ банысан кодтой сæ профессионалон бæрæгбон – Ӕппæтадæмон библиотекæйы бон.
Мадзалы хайад райстой библиотекæты кусджытæ, скъолаты ахуыргæнинæгтæ æмæ активон чиныгкæсджытæ.
Горæты Централон библиотекæйы директор Прокопенко Иринæ, æрдзырдта библиотекæйæн адæймаджы царды цы стыр ахадындзинад ис, уый тыххæй: “Традицимæ гæсгæ мах æрвылаз дæр 27 майы банысан кæнæм нæ профессионалон бæрæгбон – Ӕппæтадæмон библиотекæйы бон. Ацы рæсугъд бон мæн фæнды цалдæр ныхасы зæгъын библиотекæйы куысты тыххæй. Рагæй фæстæмæ дæр библиотекæйы куыстæн йæ апп æппындæр нæ ивы. Библиотекæйы куыст хъæугæ куыст у, афтæ ма у культурæ æмæ ахуырады артдзæст дæр. Цалынмæ библиотекæ цæры, уæдмæ цæрынц адæм дæр. Зæххыл библиотекæтæ куынæуал уой, уæд адæм сафынц сæ истори, сæ ивгъуыд цард, æмæ, кæй зæгъын æй хъæуы, нæй сын сомбон дæр.
Библиотекæ канд чингуыты хъæздыг фонд нæу, ам сæйраг бынат ахсынц адæм, ахуыргонд уа, гъе та хуымæтæг адæймаг, кæцыты фæрцы нæ библиотекæтæн сæ бон у схизын уæлдæр къæпхæнмæ. Мæн тынг зæрдиагæй фæнды, цæмæй раздæхæм нæ ивгъуыд цардмæ æмæ кæстæрæй хистæрмæ нæ царды уавæртæм гæсгæ-иу хатт нæ къах дæр бавæрæм библиотекæмæ. Библиотекæ у ахуыр æмæ зонды артдзæст. Уым райхъал вæййы адæймаджы монон миддуне. Ныртæккæйы рæстæджы нæ рæзгæ фæсивæды хъæуы разæнгард кæнын цæмæй цæуой библиотекæтæм æмæ кæсой “удæгас” чиныг”. Хъыгагæн, абон не скъоладзаутæ тынгдæр нал кæсынц чиныг, куыд фæзæгъынц, цæттæ хæринаг æнцондæр хæрæн у. Ӕмæ уæдæ не скъоладзаутæ чысыл бафыдæбон кæной, уый сæ нал фæнды, цæттæйæ æрмæг исынц интернетæй. Мæ ныхасы кæрон ма зæгъын уый дæр, цæмæй не скъолаты ахуыргæнджытæ разæнгард кæной скъоладзауты библиотекæмæ цæуыныл.
Дарддæр мадзалы раныхас кодта библиотекæйы кусæг Букуылты Маринæ. Уый æрдзырдта ныры дуджы библиотекæйæн æхсæнады цы ахадындзинад ис, ууыл: “А фæстаг дæс æмæ ссæдз азы рæстæг афтæ тагъд згъоры, æмæ лæг дугъон бæхыл куы сбада, уæддæр æй нал аййафдзæн. Фæзындысты адæймаджы сæрымагъз чи къуымых кæны, ахæм алыгъуызон компьютертæ, планшеттæ, телефонтæ, интернет æмæ афтæ дарддæр. Ацы ногдзинæдтæ ныры рæстæгæн хорз сты, цард размæ цæуы, фæлæ уæддæр чиныг кæсгæйæ адæймаджы сæрымагъз арфдæр хъуыды кæны. Раздæр хъæугæ чиныг ссарæн тынг зын уыд, фæлæ ныр кæцыфæнды библиотекæмæ дæр куы бацæуай, фендзынæ тæрхджытыл рæсугъд æфснайд алыгъуызон чингуытæ, ивгъуыд дугæй абоны ног рæстæгмæ».
Букуылты Мадинæ дæр йæ раныхасы банысан кодта, нæ рæзгæ фæлтæры кæй хъæуы разæнгард кæнын библиотекæтæм цæуыныл.
Ныхасы ма рацыдысты Централон библиотекæйы рагондæр кусджытæ Къæбысты Валентинæ æмæ Колыты Азæ. Ацы рæсугъд боны тыххæй раарфæ кодтой сæ коллегæтæн æмæ уазджытæн. Ӕрдзырдтой ма раздæры æмæ ныры дуджы куыстыл дæр. Кæд чиныгкæсджытæ фæкъаддæр сты, кæд раздæрау библиотекæмæ нал цæуынц, уæддæр абон сæ домæнтæ фæмидисджындæр сты.
Абонементы кусæг Хъæцмæзты Вандæ бацæттæ кодта æвзонг чиныгкæсджытимæ чысыл инсценировкæтæ библиотекæйы цардæй.
Уагдоны кусджытæ Тедеты Эльзæ æмæ Битарты Нелли бæрæгбонон мадзалмæ цы чингуыты равдыст бацæттæ кодтой, уыимæ базонгæ кодтой æвзонг чиныгкæсджыты. Ам фенæн уыдис алыгъуызон цымыдисон литературæйæн. Афтæ ма раарфæ кодтой сæ коллегæтæн сæ профессионалон бæрæгбоны тыххæй æмæ æрцæугæ уазджытæн.
Раныхасгæнджытæй алчи дæр бакаст æмдзæвгæ библиотекæйы боны цытæн.
Кæронбæттæны ма æмдзæвгæтæ арфæйы ныхæстимæ бакастысты горæты скъолаты ахуырдзаутæ: Хъазиты Сабинæ, Дзеранты Вероникæ, Тедеты Мария æмæ Бибылты Аннæ.
ÆЛБОРТЫ Агуындæ
Comments are closed, but trackbacks and pingbacks are open.