Хæдбардзинад æмæ адæмы иудзинады боны цытæн
Æвзæнгты республикон библиотекæйы ацы бонты уыдис цымыдисон мадзал — Хус-сар Ирыстоны ногдæр историйыл библиографион афæлгæст. Уыцы бон библиотекæмæ фæуазæг сты Колыты Аксойы номыл Аивæдты паддзахадон лицейы 8-æм къласы ахуыргæнинæгтæ сæ ирон æвзаг æмæ литературæйы ахуыргæнæг Гæбæраты Фатимæйы сæргълæудæй.
Мадзалмæ æрбацыдысты нæ горæты библиотекæты кусджытæ, сывæллæтты ныййарджытæ æмæ æндæр уазджытæ. Хистæр библиотекарь Дриаты Нателæ лæмбынæг æрдзырдта Хуссар Ирыстоны ногдæр историон цаутыл. Загъта, зæгъгæ, сæм абон фæуазæг ирон æвзаг æмæ литературæйы ахуыргæнджытæй сæ авторитетондæртæй иу — Гæбæраты Фатимæ йæ хъомылгæнинæгтимæ. Нателæ библиографион афæлгæст сарæзта хуссарирыстойнаг дзыллон информацийы фæрæзты фæстаг цалдæр азы ирон лæппуты хъайтардзинæдты тыххæй мыхуыргонд æрмæджытыл. «Профессор Битарты Зояйæн йæ зæрдæ тынг риссы мадæлон æвзагыл. 2015 азы йæ уац „Ирыстоны ногдæр историйы райдиан“-ы фыссы, зæгъгæ, 1989 азы 23-æм ноябры гуырдзиæгтæ Цхинвалмæ æрбаирвæзынмæ куы хъавыдысты, уæд сæ ныхмæ слæууыдысты цалдæр ирон лæппуйы æнæ хæцæнгæрзтæй æмæ равдыстой æнахуыр сгуыхтдзинад».
Дриаты Нателæ банысан кодта, зæгъгæ, рæзгæ фæлтæр хъуамæ зоной сæ истори æмæ радзырдта 2018 азы газет «Республика»-йы историон зонæдты кандидат Пухаты Къоста (дзæнæттаг) Цхинвалы равæрды фæдыл цы уац ныммыхуыр кодта, уый тыххæй. Зæгъгæ, Цхинвал тынг ахсджиаг у гуырдзиæгтæн. Газеты ацы номыры ма Коцты Ингæйы уацы ис ирон хъайтар лæппуты мысинæгтæ. Зæгъойты Рада та фыссы, зæгъгæ, уæйгæнæг инæлар Малюшкины бардзырдмæ гæсгæ Пухаты Алихан æмæ Цхуырбаты Иналы (Цхинвалы раздæры мэр) гуырдзиæгтæ акодтой Гурмæ. Сæ хъуыддаг бæлиццаг нæ уыдаид, Цхуырбайы фырт (Джахъо) куы нæ фæцарæхстаид, уæд. Уый бацыд Малюшкинмæ æмæ йын загъта, зæгъгæ, сæ куынæ рауадзын кæна, уæд, зæгъ, махмæ дæр ис амынæты цалдæр гуырдзиаджы æмæ сæ скуынæг кæндзыстæм. Кæй зæгъын æй хъæуы, уæйгæнæг инæлар фæтарст æмæ сæ рауадзын кодта.
Дриаты чызг загъта, зæгъгæ, сарæзта цыбыр библиографион афæлгæст, библиотекæйы ссардзыстут цы чингуытæ æмæ уæ газеттæ бахъæуа, уыдоны. Зонгæ кæнут уæ радтæг ирон адæмы историимæ, — бахатыд аудиторимæ Дриаты Нателæ.
Ахуыргæнинæгтæ бакастысты Харебаты Леонид, Тасойты Ботаз æмæ Цгъойты Аринæйы фыст æмдзæвгæтæ. Гæбæраты Фатимæ радзырдта йæ мысинæгтæ 1989 азы 23-æм ноябры цауты тыххæй. Загъта, зæгъгæ, ирон адæм уæды хуызæн æнгом никуы уыдысты.
Æвзæнгты республикон библиотекæйы кусджытæ Æхсардзинад æмæ адæмы иудзинады боны цытæн кæй бацæттæ кодтой сæрмагонд стенд Мæхъиты Тамаз æмæ Дзуццаты Тамерланы ист къамтимæ. Мадзалы кæрон библиотекæйы кусджытæ сæ уазджытæн балæвар кодтой Хуыгаты Уасилы чиныг «Во имя Осетии».
ДЖИОТЫ Екатеринæ
