Дæргъвæтин гуырдзиаг-ирон конфликты хæстон архайдтыты фæстиуæгæн республикæйы цардуагон архайды æппæт сферæтæ, горæт Цхинвалы æппæт инфраструктурæ практикон æгъдауæй пырх æрцыд.
Ныртæккæ нæ цæстыты раз республикæ æндидзыд цæуы, рæзы æмæ æндидзыд цæуы маргъ Фениксау. Арæзт цæуынц ног бæстыхæйттæ (уагдæттæ) цæрæн корпустæ, социалон æмæ æндæр ахсджиаг объекттæ. Æхсæнад æппæт сферæты дæр рæзы, кæд нæ куыд цырд темптæй фæнды, афтæ нæ, уæддæр 25 азы уæззау уавæрты царды фæстæ хъуыддæгтæ размæ цæуынц.
Æгæрыстæмæй, иууыл рагондæр историон рæстæджыты дæр паддзахады дидинæфтыды тыххæй ахсджиагдæр сферæтæй сæ иу уыд базарадон ахастыты рæзт. Абоны бонмæ Хуссар Ирыстоны, республикæйы къухдариуæгады архайды руаджы ис бæрæг размæцыдтытæ æддагонбазарадон бастдзинæтæ æрнывыл кæныны процессы. Фæлæ банысан кæнын хъæуы уый дæр, æмæ ныртæккæ Хуссар Ирыстоны сæйраджыдæр кæй рæзы чысыл æмæ астæуккаг бизнес.
Фæстаг дæсгай азты базарадон сферæйы минæвæрттæн, уыцы нымæцы бынæттон фермертæн дæр нæ уыд фадат нормалон уавæрты цæрджытæн сæ товартæ уæй кæнынæн, афтæ ма бынæттон базары нæ уыд æмбæлон уавæртæ базар кæнынæн.
Уымæ гæсгæ республикæйы къухдариуæгад йæ разы хæс æрæврдта ног базар саразыны тыххæй, кæцы дзуапп дæтдзæн нырыккон стандарттæн æмæ æмбæлон уыдзæн санитарон-эпидемиологон нормæтæн. РХИ-йы Арæзтад, архитектурæ æмæ цæрæнуатон-коммуналон хæдзарады министры хæдивæг Гаглойты Сергей куыд загъта, уымæ гæсгæ базар ныридæгæн цæттæ у эксплуатацимæ радтынмæ, баззад ма дзы иуæй-иу юридикон нюанстæ кæронмæ фæуын.
«Базарадон комплексы арæзтад æххæст цæуы 2016 азæн Хуссар Ирыстоны социалон-экономикон рæзтæн ахъазгæнæг Инвестицион программæ сæххæст кæныны фæлгæтты. Куыстытæ æххæст кæны бынæттон организаци ООО «Престиж». Арæзтадон фирмæйы къухдариуæггæнæг Беппиты Инал ныридæгæн цæттæ кæны документтæ объекты экс-плуатацимæ радтыны тыххæй. Æнæмæнгхъæуæг у райсын проекты фæдыл «Æмбæлоны тыххæй хатдзæг», æндæр ныхæстæй арæзт цæуынц документтæ, цæмæй объект лæвæрд æрцæуа горæт Цхинвалы администрацимæ», – загъта уый.
Горæты 2-æм базары арæзтады хайад истой куыд бынæттон, афтæ подрядчикы æрхонгæ специалисттæ дæр. Гаглойты Сергейы ныхæстæм гæсгæ, объекты арæзтады аргъ у æнудæс æмæ æрдæг милуан сомы. Объект конд у дыууæ хайæ – æхгæд базар мидæгæй цалдæр павильонимæ, кæцытæ сты дзидза, кæсаг æмæ æхсыры продукци уæй кæнынæн æмæ гом тæрхджытæ халсартæ æмæ дыргътæ уæй кæныны тыххæй. Базары ис 120 базарадон бынаты, цыран арæзт æрцыдысты æппæт уавæртæ дæр. Уагъд æм æрцыдысты коммуникацитæ – дон, канализаци, санитарон æлхынцъытæ, афтæ ма дзы хынцыд æрцыдысты къæвдадæтты цæуæнтæ, кæцыты руаджы дон иуран нæ лæудзæн базары территорийы.
«Базар проектмæ гæсгæ хынцыд нæу сæудæджерадон товартæ уæй кæнынæн. Арæзтады рæстæджы æппæт проблемæтæ дæр скъуыддзаг цыдысты республикæйы къухдариуæгадимæ, горæт Цхинвалы администрациимæ. Къуырийы размæ æрæмбырд кусæгон къамис, цыран бацамынд æрцыдысты чысыл фиппаинæгтæ, кæцыты мах аиуварс кодтам цалдæр бонмæ. Иумæйагæй объекты арæзтад хорзыл банымадтой», – банысан кодта Гаглойты Сергей.
Сæйраг горæты администрацийы фæндонмæ гæсгæ базары территорийыл арæзт æрцыдысты автомашинæтæ æруромæн бынæттæ.
Республикæ Хуссар Ирыстоны информацион портал
Comments are closed, but trackbacks and pingbacks are open.