Знауыры районы мидхъуыддӕгты управленийы кусджытӕ баххуыс кодтой ӕртӕ иунӕг, кардзыд адӕймагӕн – баластой сын зымӕгмӕ сугтӕ. Милицийы кусджытӕ сын сӕ развӕлгъау ныллыг кодтой ӕмӕ сын сӕ афтæмæй баластой.
Районы бирӕ ис ӕвӕрӕз, иунӕг ӕмӕ кардзыд адӕймӕгтӕ, кӕцытӕм фӕкӕсӕг нӕй. Сӕхи бон нал у зымӕгмӕ суг самал кӕнын ӕмӕ цы пенси исынц, уый та сын нӕ фаг кӕны суг балхӕнынӕн. Районы милицийы управленийӕн уыйбӕрц фӕрӕзтӕ нӕй, цӕмӕй сӕ зымӕгмӕ иууылдӕр сифтонг кӕна сугӕй, фӕлӕ уал ацы аз ӕртӕ адӕймагӕн сӕ къух фӕрог кодтой. Ахӕм лӕварыл тынг бацин кодтой ӕмӕ бузныджы ныхӕстӕ загътой милицийы кусджытӕн.
Ӕрӕджы Мидхъуыддӕгты министр бахӕс кодта фадыгон инспектортӕн, цӕмӕй ахӕм категорийы гоймӕгты арӕхдӕр бӕрӕг кӕной ӕмӕ-иу сӕм, гӕнӕн уӕвгӕйӕ, се ‘ххуысы къух фӕдаргъ кӕной. Уымӕй уӕлдай ма сын сӕ тыхстдзинад, сӕ домӕнтӕ сӕхимӕ нысан кӕнынц ӕмӕ сӕ стӕй фӕхӕццӕ кӕнынц районон администрацитӕм. Ныууадзынц сӕм сӕ телефонты номыртӕ дӕр, цӕмӕй истӕуыл куы фӕтыхсой, уӕд комкоммӕ фӕдзурой сӕ фадыгон инспектормӕ.
ДЖИОТЫ Алыксандр
